އުމުރުން 4 އަހަރުގެ ކުއްޖަކަށް ޖިންސީ ގޯނާ ކުރި މައްސަލައެއްގައި މީހަކު 15 އަހަރަށް ޖަލަށް ލުމަށް ހައިކޯޓުން ތައީދު ކޮށްފިއެވެ.
ހައި ކޯޓުން ބުނީ ހަތަރު އަހަރުގެ އަންހެން ކުއްޖަކަށް ޖިންސީ ގޯނާ ކުރުމުގެ ކުށް ސާބިތުވެ، ކ. ގާފަރު، އޯކިޑުމާގެ / އަބްދުއްސަލާމް، 15 އަހަރަށް ޖަލަށް ލުމަށް، ކުރިމިނަލް ކޯޓުން ކުރި ހުކުމަށް ހައިކޯޓުން ތާއީދު ކުރާ ކަމަށެވެ.
އޭނާއަށް ކޮށްފައި ވަނީ އިތުބާރު ކުރެވޭ މަގާމެއްގައި ހުރެ ކުޑަ ކުއްޖަކާއެކު ޖިންސީ އަމަލެއް ހިންގުމުގެ ދައުވާއެވެ.
މި މައްސަލަ ބެއްލެވި ހައިކޯޓުގެ ފަނޑިޔާރުންނަކީ ފަނޑިޔާރު ހުސައިން ޝަހީދާއި ފަނޑިޔާރު ހަސަން ޝަފީއާއި ފަނޑިޔާރު ހުސައިން މަޒީދެވެ. އަދި މައްސަލައިގެ ރިޔާސަތު ބެލެހެއްޓެވީ ފަނޑިޔާރު ހަސަން ޝަފީއެވެ.
ހައިކޯޓުން ވަނީ ދާދި ފަހުން ކުޑަ ފިރިހެން ކުއްޖަކަށް ޖީންސީ ގޯނާ ކުރި މައްސަލައެއް ސާބިތުވެ މީހަކު 14 އަހަރަށް ޖަލަށް ލުމަށް ވެސް ހުކުމް ކޮށްފައެވެ.
އެމައްސަލާގައި 14 އަހަރުގެ ޖަލު ހުކުމެއް އިއްވާފައި ވަނީ އދ. ދިގުރަށު ކަނީރުވިލާ ހުސައިން ޔަހްޔާ އަށެވެ. ޔަހްޔާ ޖިންސީ ގޯނާ ކޮށްފައިވާ އެ މައްސަލަ އަކީ 2014 އާއި 2015 އާ ދެމެދު ހިނގާފައިވާ ކަމެކެވެ.
