ފަޅުވެރިއެއްގެ ލޮލަށް ބުޅިއެއް ހެރިގެން އަވަސް ފަރުވާއަށް ޅ. ނައިވަރަށް ގެންގޮސްފިއެވެ.
އެމްއެންޑީއެފުން ބުނީ، ޅ. މުލީ ބޮއި ކައިރިން މަސްވެރިކަން ކުރަން އުޅުނު "ރުއްކުރި" ދޯނީގައި ހުރި ފަޅުވެރިއެއްގެ ލޮލަށް ބުޅިއެއް ހެރި ޒަހަމް ވެފައިވާ ކަމުގެ މައުލޫމާތު ލިބިފައިވާ ކަމަށެވެ. މި ހާދިސާގައި އަނިޔާވެފައި ވަނީ އުމުރުން 35 އަހަރުގެ ދިވެހި ފަޅުވެރިއަކަށް ކަމަށް އެމްއެންޑީއެފުން ބުނެއެވެ.
މިހާރު އެ މީހާ އެމްއެންޑީއެފް ނޮދާން އޭރިއާ ކޯސްޓްގާޑް ސްކޮޑްރަންގެ އެހީތެރި ކަމާއެކު މިއަދު 09:14 ހާއިރު ނައިފަރަށް ގެންގޮސްފައިވާ ކަމަށް ލަފާކުރެވޭ ކަމަށް އެމްއެންޑީއެފުން ބުނެއެވެ.
މިހާދިސާގެ މައުލޫމާތު ލިބިފައިވަނީ މިއަދު ހެނދުނު 07:30 ހާއިރު ކަމަށް އެމްއެންޑީއެފުން ބުނެއެވެ.
މަސްވެރިކަމަށް ނިކުމެ އުޅޭ މަސްވެރިންނަށާއި، ދޯނިތަކުގެ ފަޅުވެރިންގެ ލޮލަށް ބުޅި ހެރި އަނިޔާވާ ހާދިސާތައް މީގެ ކުރިން ވެސް ވަނީ ފެންމަތިވެފައެވެ. އެގޮތުން، މިފަދަ ހުރިހާ ހާދިސާއެއްގައި ވެސް އެމްއެންޑީއެފުން ދަނީ އާންމުންނަށް އެހިތެރިކަން ފޯރުކޮށްދެމުންނެވެ.
މިފަހުން ހިނގާފައިވާ މިފަދަ ހާދިސާތަކަށް ބަލާލާއިރު، ކުޅުދުއްފުށީ ބޮއި ކައިރިން މަސްވެރިކަން ކުރަން އުޅުނު "ނިއުމަތް" ދޯނީގައި ހުރި މީހެއްގެ ލޮލަށް ބުޅިއެއް ހެރިގެން މިދިޔަ މަހު 14ގައި އެމްއެންޑީއެފުން ވަނީ އެހީތެރިކަން ފޯރުކޮށްދީފައެވެ. އެމްއެންޑީއެފްގެ އެހީގައި އެމީހާ ގެންގޮސްދީފައި ވަނީ ކުޅުދުއްފުށީ ރީޖަނަލް ހޮސްޕިޓަލަށެވެ.
