ފަރުވާއެއް ހޯދިފައި ނުވާ ކޮރޯނާވައިރަސް ޑިޒީޒް (ކޮވިޑް-19)ގެ ދެވަނަ ރާޅަކާއި ކުރިމަތިލާންޖެހިފައިވާ ސައުދީ އަރަބިއްޔާއިން، ބަލިމަޑުކަން ކޮންޓްރޯލް ކުރުމަށް، ރައްކާތެރިކަމުގެ ފިޔަވަޅުތައް ވަރުގަދަ ކޮށްފިއެވެ.
ކޮވިޑް ކޮންޓްރޯލް ކުރުމަށް ހަރުކަށި ކުރި ފިޔަވަޅުތަކަށް ބަލާއިރު، ކައިވެނި ހަފުލާތަކުގައި، ކުންފުނިތަކުގެ ބައްދަލުވުންތަކާއި އާންމު އެއްވުންތައް، ކުރިއަށް އޮތް 30 ދުވަހުގެ މުއްދަތަށް، ކުރިއަށް ނުގެންދެވޭ ގޮތް ވަނީ ހަދާފައެވެ.
ކުރިއަށް އޮތް 10 ދުވަހު، އިޖުތިމާއީ އެއްވުންތައް ބޭއްވޭނީ، 20 މީހުންނަށް ވުރެ މަދު އަދަދެއްގެ ބަޔަކާއެކުގައި ކަމަށް ކަނޑައަޅާފައި ވާއިރު، މުނިފޫހިފިލުވުމާ ގުޅޭ ހުރިހާ ހަރަކާތެއް ހުއްޓާލުމަށް ވަނީ އަންގާފައެވެ. މި އުސޫލުން، ސިނަމާ، ޖިމް އަދި ޝޮޕިންގް މޯލްތައް ބަންދުކޮށްފައި ވާއިރު، ރެސްޓޯރަންޓްތަކުގައި ތިބެގެން ކެއިންބުއިމުގެ ހިދުމަތް ދިނުންވެސް ވަނީ ހުއްޓާލާފައެވެ. ލޮކްޑައުންގެ މި ހަރުކަށި އުސޫލުތަކާ ހިލާފުވާ ކެފޭ އަދި ރެސްޓޯރަންޓްތައް، ވަގުތީ ގޮތުން ބަންދު ކުރާނެ ކަމުގެ އިންޒާރުވެސް ސައުދީގެ ކަމާ ބެހޭ ފަރާތްތަކުން ވަނީ ދީފައެވެ.
ސައުދީ އަރަބިއްޔާއިންވަނީ 20 ގައުމަކުން އެ ގައުމަށް ދަތުރުކުރުން މަނާ ކޮށްފައެވެ. މި ގައުމުތަކުގެ ތެރޭގައި އެމެރިކާ، އިނގިރޭސިވިލާތް، ބްރެޒިލް، ސައުތު އެފްރިކާ، ޖަރުމަނުވިލާތް، އެކުވެރި އަރަބި އިމާރާތް، މިސްރު، އިންޑިއާ އަދި ޕާކިސްތާން ހިމެނެއެވެ. މިއީ ވަގުތީ ގޮތުން ތަންފީޒު ކުރާ އަމުރަކަށް ވާއިރު، މި އުސޫލު ތަންފީޒު ކުރަނީ މި ގައުމުތަކުން ސައުދީއަށް ދަތުރު ކުރާ ބިދޭސީންނަށެވެ.
