ކަރަންކާ އިބްރާހީމް ރަޝީދު އަވަހާރަވުމާ ގުޅިގެން ދިވެހި ގައުމީ ދިދަ ބައިދަނޑިއަށް ތިރިކުރުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ނިންމަވައިފިއެވެ.
ރައީސް އޮފީހުން ބުނީ އިބްރާހީމް ރަޝީދު އަވަހާރަވުމާ ގުޅިގެން އެކަމުގެ ހިތާމައިގައި މާދަމާއިން ފެށިގެން ތިން ދުވަސް ވަންދެން ދިވެހި ގައުމީ ދިދަ ބައިދަނޑިއަށް ތިރިކުރުމަށް ރައީސް ހަމަޖައްސަވާފައިވާ ކަމަށެވެ.
އިބްރާހީމް ރަޝީދަކީ ހުރަވީދަރިކޮޅުގެ ޝާހީ ރަސްކަމުގެ އާއިލާއާއި ވެރިކަމުގެ އާއިލާއިން ވަޑައިގެންނެވި ބޭފުޅެކެވެ. އިބްރާހީމް ރަޝީދު ސަރުކާރުގެ ހިދުމަތް ފަށްޓަވާފައިވަނީ ނޮވެމްބަރު 24 1942 ގައެވެ. 65 އަހަރަށްވުރެ ދިގު މުއްދަތެއްގައި ސަރުކާރަށް ހިދުމަތް ކުރައްވާފައި ވާއިރު، ފުރަތަމަ އަދާކުރެއްވީ ރައްޔިތުންގެ ބޮޑު އިސްޓޯރުގެ ކާތިބު ކަމެވެ.
ފުރަތަމަ ޖުމްހޫރިއްޔާގެ ރައީސް ސުމުއްވުލް އަމީރު މުހައްމަދު އަމީން ދޮށިމޭނާ ކިލެގެފާނުގެ ކާތިބެއްގެ ގޮތުން ހިދުމަތް ކުރައްވައި، ގައުމީ ހިދުމަތުގައި އެކި މަރުހަލާތައް ވަނީ ކަޑައްތު ކުރައްވާފައެވެ. އިބްރާހީމް ރަޝީދު ވަނީ ސަރުކާރުގެ ވަރަށް އިސް މަގާމުތައް ފުރުއްވާފައެވެ.
އޭގެތެރޭގައި މާބަނޑޭރި އޮފީހުގެ ރަދުންގެ ކާތިބުއްސިއްރު ކަމާއި، ވުޒާރަތުއް ދާހިލިއްޔާގެ ވަޒީރުގެ ނައިބު ކަމުގެ މަގާމާއި، ވުޒާރަތުލް މަޢާރިފުގެ ނައިބު ކަމުގެ މަގާމާއި، ވަޒީރުލް އައުޡަމްގެ ހާއްސަ ސެކްރެޓަރީ ކަމާއި، ވަޒީރުލް އައުޡަމްގެ ނައިބު ކަމުގެ މަގުމު ހިމެނެއެވެ. އަދި މިނސްޓާ އޮފް ހެލްތު ކަމުގެ މަގާމާއި، މިނިސްޓާ އޮފް ހޯމްއެފެއާޒް ކަމުގެ މަގާމާއި، ދައުލަތަށް ގިނަދުވަހު ހިދުމަތް ކުރެއްވި އިއްޒަތްތެރިއެއްގެ މަގާމުގެ އިތުރުން އޭނާ ވަނީ ރައްޔިތުންގެ މަޖިލީހުގެ ޒައީމްކަމާއި، ރައީސުލްޖުމްހޫރިއްޔާގެ މަޝްވަރާ މަޖިލީހުގެ މެންބަރުކަން ވެސް ކުރައްވާފައެވެ.
މީގެ އިތުރުން ދިވެހި ސިވިލް ސާވިސްގެ ގާނޫނުގެ ދަށުން ސަރުކާރުގެ ވަޒީފާއިން ވަކިވެ ވަޑައިގެންނެވި ބޭފުޅުންގެ ތެރެއިން 50 އަހަރަށްވުރެ ދިގު މުއްދަތެއްގައި ސަރުކާރަށް ހިދުމަތް ކުރައްވާފައިވާ ބޭފުޅުންނަށް ދެއްވި ޝަރަފުގެ ހަނދާނީ ފިލާވެސް އިބްރާހީމް ރަޝީދަށް ވަނީ ލިބިވަޑައިގެންފައެވެ.
