މަޝްހޫރު ސޯޝަލް މީޑިއާ ކުންފުނި، ފޭސްބުކް އިންކޯޕަރޭޝަންގެ ބެލެނިވެރިކަމުގެ ދަށުގައި އޮންނަ މެސެޖިންގް އެޕްލިކޭޝަން – ވަޓްސްއެޕް މެދުވެރިކޮށް ފޮނުވާ މެސެޖުތައް، 7 ދުވަހުގެ ތެރޭގައި "ގެއްލޭ" ފީޗާއެއް ތައާރަފު ކުރަން ނިންމައިފިއެވެ.
"ޑިސަޕިއަރިންގް މެސެޖާޒް" ފީޗާއަކީ، މެސެޖު ފޮނުވާ ފަރާއި، މެސެޖު ލިބޭ ފަރާތުގެ ޑިވައިސް ލޮގްއިން އެ މެސެޖެއް ފޮހޮލަދޭނެ ފީޗާއެކެވެ.
ދުނިޔޭގެ އެކި ކަންކޮޅުތަކުން 2 ބިލިއަނެއްހާ ޔޫޒާ އެކައުންޓުން ވަޓްސްއެޕް ބޭނުން ކުރަމުން އަންނައިރު، މި ފީޗާއަކީ ޗެޓްލޮގްތަކުގެ ޒާތީ ސިއްރު ހިފެހެއްޓުމުގެ ބާރު ގަދަ ކުރުމަށް ހިތްވަރު ދެނިވި ފީޗާއެއް ކަމަށް ބުނެވެއެވެ.
މި ފީޗާ ތައާރަފު ކުރި ކަމުގައި ވީ ނަމަވެސް، އެކައުންޓް ބޭނުން ކުރާ ފަރާތުން ރައްކާ ކުރަން ބޭނުންވާ މެސެޖު، ފޮޓޯ ނުވަތަ ވީޑިއޯ ފޯވަޑް ކުރުމާއި، ސްކްރީންޝޮޓް ނެގުމުގެ ފުރުސަތު އޮންނާނެ ކަމަށް މައުލޫމާތު ލިބެއެވެ.
"ޑިސަޕިއަރިންގް މެސެޖާޒް" ފީޗާ ހިޔާރު ކުރުމުގެ ފުރުސަތު، މި ހިނގާ ނޮވެމްބަރު މަހުގެ ފަހުކޮޅު ލޯންޗު ކުރުމަށް ވަނީ ހަމަޖެހިފައެވެ.
ފޭސްބުކް ކުންފުނިން މިހާރު މަސައްކަތް ކުރަމުންދަނީ ވަޓްސްއެޕް، ފޭސްބުކް އަދި އިންސްޓަގްރާމް މެސެންޖާއަކީ އެއް ޕްލެޓްފޯމަކަށް ހެދުމަށެވެ. އެގޮތުން، މިހާރުވެސް ފޭސްބުކް މެސެންޖާއާއި އިންސްޓަގްރާމް މެސެންޖާ ވަނީ އެކުގައި ބޭނުން ކުރެވޭ ފީޗާއަކަށް ބަދަލު ކޮށްފައެވެ.
