މާތް ވެގެން ވާ މަސްޖިދުލް ހަރަމްގެ ބޭރު ހަރިއްމަ ތެރެއަށް، ކާރެއްގައި ދުއްވާފައި ވަތް މީހާ ހައްޔަރު ކޮށްފިއެވެ.
ސައުދީ ގަޑިން ރޭ 10:00 ގެ ފަހުން ހިނގި މި މިހާދިސާގައި އެއްވެސް މީހަކަށް އަނިޔާއެއް ލިބިފައި ނުވާ ކަމަށް މައުލޫމާތު ލިބެއެވެ.
ސޯޝަލް މީޑިއާގައި ދައުރުވާ މަންޒަރުތަކުން ފެންނަ ގޮތުގައި، ބޭރު ހަރިއްމައިގެ ސަރަހައްދުގައި ހުރި ޕްލާސްޓިކް ބެރިކޭޑްތަކުގެ ތެރެއިން ކާރު ދުއްވަމުން ގޮސް، އެ މީހާ މިސްރާބު ޖެހީ މަސްޖިދުލް ޙަރަމްގެ 89 ނަމްބަރު ދޮރޯއްޓަށެވެ.
މަސްޖިދުލް ޙަރަމްގެ ހަރިއްމަ ތެރެއަށް، ކާރުގައި ދުއްވާފައި މީހަކު ވަނުމުން، އެކަމަށް ހުރަސް އަޅާ، މަސްރަހު ކޮންޓްރޯލް ކުރުމުގައި ސަލާމަތީ އޮފިޝަލުން ވަނީ އިސް ދައުރެއް އަދާ ކޮށްފައެވެ. އެ ސަރަހައްދުގައި އަޅުކަން ކުރަމުން ދިޔަ މީހުންގެ ރައްކަލަކަށްޓައި، ކާރު ކޮއްޕަމުން ދިޔައީވެސް ސަލާމަތީ އޮފިޝަލުން ކަމަށް މައުލޫމާތު ލިބެއެވެ.
ކާރު ދުއްވަން އިނީ ސައުދީ ރައްޔިތެއް ކަމަށާ، އިތުރަށް ސުވާލު ކުރުމަށް ޕްރޮސެކިއުޓަރާ އޭނާ ހަވާލު ކޮށްފައި ވާ ކަމަށް ޚަބަރު ލިބެއެވެ. މިކަމާ ބެހޭ އިތުރު ތަފްސީލުތަކެއް އަދި ނުލިބެއެވެ.
މާދަމާއަކީ ބިދޭސީ ޢުމްރާ ވެރިންނަށް މަރުހަބާ ކިއުމަށް ސައުދީ އިން ކަނޑައަޅާފައިވާ ދުވަހެވެ.
