މުޅި ދުނިޔެ އިނދަޖައްސާލި ކޮރޯނާވައިރަސް ޑިޒީޒް (ކޮވިޑް-19) ގެ ކޭސްތައް އެންމެ ފުރަތަމަ ރިޕޯޓް ކުރަން ފެށި ޗައިނާގައި އަނެއްކާވެސް ކޭސްތައް ފެންނަން ފެށުމާއެކު، ބޮޑު ސިޓީއެއްގެ މުޅި އާބާދީ މި ބައްޔަށް ސްކްރީން ކުރުމަށް ކަމާ ބެހޭ ފަރާތްތަކުން ނިންމައިފިއެވެ.
9 މިލިއަނަށް ވުރެ ގިނަ މީހުން ދިރިއުޅެމުންދާ ޗިންގްދާއޯ ސިޓީގެ މުޅި އާބާދީ، ކޮވިޑް-19އަށް ސްކްރީން ކުރުމަށް ނިންމާފައި ވާ ކަމަށާ ކުރިއަށް އޮތް 5 ވަރަކަށް ދުވަހުގެ ތެރޭގައި މި މަސައްކަތް ނިންމާނެ ކަމަށް ޚަބަރު ލިބެއެވެ.
ޗިންގްދާއޯގެ މުޅި އާބާދީ ކޮވިޑް-19އަށް ސްކްރީން ކުރަން ނިންމާފައި ވަނީ، މި ފަހަކަށް އައިސް ފެންނަން ފެށި ބައެއް ކޭސްތަކަކީ ޗިންގްދާއޯގެ ހޮސްޕިޓަލަކާ ގުޅުންހުރި ކޭސްތަކެއް ކަމަށް ބެލެވެން ފެށި ހިސާބުން ކަމަށް މައުލޫމާތު ލިބެއެވެ. މި ހޮސްޕިޓަލަކީ ގައުމުން ބޭރުން އަންނަ މީހުންގެ ތެރެއިން ކޮވިޑް-19އަށް ޕޮޒިޓިވްވެފައި ވާ މީހުންނަށް ފަރުވާ ދިނުމަށް ހާއްސަ ހޮސްޕިޓަލެކެވެ.
ޗައިނާއަކީ ކޮވިޑް-19އަށް ޓެސްޓު ކުރުމުގައި އެހެން ގައުމުތަކުގެ މައްޗަށް ކުރި ހޯދާފައިވާ ގައުމެކެވެ. ޗައިނާގެ ޓެސްޓިންގް ކެޕޭސިޓީ އިންތިހާއަށް ފުޅާ ކޮށްފައިވާއިރު، ނަތީޖާ ނެރޭލެއްވެސް އެހާ އަވަހެވެ.
ޗައިނާގެ އަދުގެ ހާލަތަށް ބަލާއިރު އެގައުމުން ކޮވިޑް-19އަށް ޕޮޒިޓިވްވި މީހުންގެ ޖުމުލަ އަދަދަކީ 85578 އެވެ. ދުނިޔޭގެ ނިސްބަތުން ބަލާއިރު ޗައިނާ އޮތީ ކޭސް ނަމްބަރުގެ ގޮތުން 49 ވަނާގައެވެ. ކޮވިޑް-19 ޖެހިގެން ޗައިނާގައި މިވަގުތު އެކްޓިވް ކޭހުގެ ގޮތުގައި 230 ކޭސް ފާހަގަކޮށްފައިވެއެވެ. އަދި މި ބަލީގައި 4634 މީހެއްގެ ފުރާނަ ގެއްލިފައި ވާ ކަމަށް ރެކޯޑް ކޮށްފައި ވެއެވެ.
