އެމެރިކާގެ ހުޅަނގު އައްސޭރިފަށުގެ ސަރަހައްދުގައި ރޯވެ، އަނދަމުންދާ ވަރުގަދަ އަލިފާންގަނޑުތަކުގައި މަރުވި މީހުންގެ އަދަދު 30 އަށް އަރާ، ގިނަ އަދަދެއްގެ ބަޔަކަށް ވީ ނުވީއެއް ނޭނގި ގެއްލިފައި ވާ ކަމަށް އޮފިޝަލުން ވިދާޅުވެއްޖެއެވެ.
އޮރެގަން، ކެލިފޯނިއާ އަދި ވޮޝިންގްޓަންގައި އަލިފާންގަނޑުތައް ރޯވެ، އަނދަމުންދާތާ 3 ހަފުތާއެއްހާ ދުވަސް ވެފައި ވާއިރު، އެތައް މިލިއަން އޭކަރެއްގެ ބިން ވަނީ އަނދާފައެވެ. އެތައް ހާސް ގެއެއް ވަނީ ހަލާކުވެފައެވެ. މިއާއެކު އެތައް ހާސް ބަޔަށް ވަނީ އަމިއްލަ ގެދޮރު ދޫކޮށް، އެހެން ސަރަހައްދުތަކަށް ބަދަލުވާން މަޖުބޫރުވެފައެވެ.
އެމެރިކާގައި ރިޔާސީ ރޭހުގެ ފޯރިގަދަވަމުންދާ މިދަނޑިވަޅުގައި، އިދިކޮޅު ޑިމޮކްރަޓިކް ކެންޑިޑޭޓް ޖޯ ބައިޑަން ވިދާޅުވަނީ، މޫސުމީ ނޭދެވޭ ބަދަލުތަކުގެ ސަބަބުން އިންސާނީ ހަލޯރާތުގެ ދެމި އޮތުމަށް ނުރައްކާ ކުރިމަތިވާ ކަމަށެވެ. ނަމަވެސް ދެވަނަ ދައުރަކަށް ވާދަ ކުރައްވާ ޓްރަމްޕް ގެންދަވަނީ މި ހަގީގަތަކަށް އިންކާރު ކުރައްވަމުންނެވެ. މިކަމުގެ އިލްޒާމް ޓްރަމްޕް އަމާޒު ކުރައްވަނީ ޖަންގަލިތައް ބެލެހެއްޓުމުގައި ފަރުވާ ކުޑަކުރުމުގެ މައްޗަށެވެ.
ކަން މިހެން އޮތްއިރު، ވައިގެ ކޮލިޓީ ބަޔާންކުރާ ތަފާސް ހިސާބުތައް ދައްކާ ގޮތުން މިވަގުތު ދުނިޔޭގައި އެންމެ ބޮޑަށް ވައި ތަޣައްޔަރުވެފައިވަނީ އޮރެގަންގެ އެންމެ ބޮޑު ސިޓީ ކަމަށްވާ ޕޯޓްލަންޑްގައެވެ. އޭގެ ފަހަތުން ލިސްޓުގައި ދެން އޮތީ ސަން ފްރާންސިސްކޯއާއި ސެއޭޓަލްއެވެ.
އޮރެގަންއާއި ވޮޝިންގްޓަންގެ އާންމު ހާލަތަށް ބަލާއިރު، ފަޔާފައިޓަރުން ދަނީ ވަރުގަދައަށް ރޯވެ، އަނދަމުންދާ 16 އަލިފާންގަނޑެއް ކޮންޓްރޯލް ކުރުމަށް ހަނގުރާމަ ކުރަމުންނެވެ. މިހާރުން މިހާރަށް، ރައްކާތެރި ހިސާބުތަކަށް ބަދަލު ކުރާ މީހުންގެ އަދަދު 40000 އަށް އަރައެވެ. ވޮޝިންގްޓަންގައި ވަރުގަދަ 15 އަލިފާންގަނޑަކާ ދެކޮޅަށް ފަޔާފައިޓަރުން ދަނީ ހަނގުރާމަ ކުރަމުންނެވެ. ވޮޝިންގްޓަންއިން މަރުވި މީހުންގެ ތެރޭގައި 1 އަހަރުގެ ތުއްތު ކުއްޖެއް ހިމެނޭއިރު، އެކުއްޖާގެ މައިންބަފައިންގެ ހާލު ސީރިއަސް ކަމަށް ޚަބަރު ލިބެއެވެ.
22 މީހުންގެ ފުރާނަ ގެއްލިދިޔަ ކަމަށް ރެކޯޑް ކޮށްފައިވާ ކެލޮފޯނިއާގެ ހާލަތަށް ބަލާއިރު ވަރުގަދަ 28 އަލިފާންގަނޑެއް ރޯވެ، އަނދަމުންދާކަމަށް މައުލޫމާތު ލިބެއެވެ. އޯގަސްޓް 15 ވަނަ ދުވަހުން ފަށައިގެން ކެލިފޯނިއާގައި އަލިފާންގަނޑުތައް ރޯވަމުންދާއިރު، އެތައް ހާސް ބަޔަކަށް ވަނީ އެހެން ސަރަހައްދުތަކަށް ބަދަލުވާން މަޖުބޫރުވެފައެވެ.
