މިދިޔަ އަހަރުގެ ފަހުކޮޅު ޗައިނާއިން ފުރަތަމަ ފަހަރަށް ރިޕޯޓްކުރަން ފެށި ކޮރޯނާވައިރަސް ޑިޒީޒް (ކޮވިޑް-19) އިން ދިފާއުވުމަށް ވެކްސިނެއް ތަރައްގީ ކުރުމަށް ކުރަމުންދާ މަސައްކަތުގެ ތެރެއިން، ޗައިނާގެ އަސްކަރިއްޔާގެ މެމްބަރުންނަށް ވަކި ބާވަތެއްގެ ވެކްސިނެއް ދީގެން ތަޖުރިބާ ކުރުމަށް ޗައިނާގެ ސަރުކާރުން ހުއްދަ ދީފިއެވެ.
ޗައިނާގެ އަސްކަރިއްޔާގެ މެމްބަރުންނަށް ދޭ ވެކްސިން (އޭޑީ5-އެންކޯވް) ތަރައްގީ ކޮށްފައި ވަނީ ވެކްސިން ކުންފުނި ކެންސީނޯ ބައޮލޮޖިކްސްއާއި ޗައިނާ ސަރުކާރުގެ އެކަޑަމީ އޮފް މިލިޓަރީ މެޑިކަލް ސައެންސަސް ގެ ބައެއް ކަމަށްވާ، ބެއިޖީންގް އިންސްޓިޓިއުޓް އޮފް ބައޮޓެކްނޮލޮޖީ ގުޅިގެންނެވެ.
އަސްކަރިއްޔާއަށް ހާއްސަކޮށްގެން މި ވެކްސިން ތަޖުރިބާ ކުރުމުގެ ހުއްދަ، ޗައިނާގެ ސެންޓަރަލް މިލިޓަރީ ކޮމިޝަނުން ދީފައިވަނީ ހުސްވި ޖޫން މަހުގެ 25 ދުވަހު ކަމަށް ކޭންސީނޯއާ ހަވާލާދީ ބައިނަލްއަގުވާމީ މީޑިއާއިން ވަނީ ރިޕޯޓްކޮށްފައެވެ. މި ހުއްދައަކީ 1 އަހަރު ދުވަހުގެ މުއްދަތަށް ދޫކޮށްފައިވާ ހުއްދައެކެވެ. މި ހުއްދައިގެ ދަށުން، މި ވެކްސިން ދެވޭނީވެސް ހަމައެކަނި އަސްކަރިއްޔާގެ މެމްބަރުންނަށެވެ.
ޗައިނާއިން ދަނީ އެ ގައުމުގެ އަސްކަރިއްޔާ އޮތީ ކޮވިޑް-19ގެ ބަލިމަޑުކަމުން ސަލާމަތްވެފައި ކަމަށާ، ޕީޕަލްސް ލިބަރޭޝަން އާމީ (ޕީއެލްއޭ)ގެ އެންމެ މެމްބަރަކުވެސް ކޮވިޑް-19އަށް ޕޮޒިޓިވް ވެފައި ނުވާނެ ކަމަށް ވަކާލާތު ކުރަމުންނެވެ. ނަމަވެސް އެމެރިކާގެ އޮފިޝަލުން ދަނީ މި ދައުވާއަށް އިންކާރު ކުރަމުންނެވެ. އެހެނީ ޕީއެލްއަކީ މުޅި ދުނިޔޭގެ ނިސްބަތުން ބަލާއިރުވެސް އެންމެ ބިޔަ ފައުޖަށް ވެފައި، މި ފައުޖުގައި އެންމެ މީހަކުވެސް ކޮވިޑް-19އަށް ޕޮޒިޓިވް ނުވުމަކީ ނާދިރު ކަމަކަށް ވުމުންނެވެ.
