އައިޖީއެމްއެޗުގައި ވިހަން އެޑްމިޓް ކޮށްފައި އޮތް މާބަނޑު މީހަކު ކޮވިޑަށް ޕޮޒިޓިވް ވުމާ ގުޅިގެން އެމީހާއާ ބައްދަލުވި އެ ހޮސްޕިޓަލުގެ 14 މުވައްޒަފަކު ކަރަންޓީނަށް ގެންދާކަން އެނގިއްޖެއެވެ.

"ދަ ޕްރެސް" އަށް އެނގިފައިވާ ގޮތުގައި އައިޖީއެމްއެޗުގެ 14 މުވައްޒަފަކު، އެ މާބަނޑު މީހާއާ ކޮންޓެކްޓު ވެގެން ކަރަންޓީނަށް ގެންދިއުމުގެ މަސައްކަތް އެޗްޕީއޭއިން ވަނީ ފަށާފައެވެ. ނަން ހާމަކުރަން ބޭނުން ނުވާ ފަރާތަކުން ބުނީ މިވަގުތު އެ މީހުން ތިބީ ގޭގައި ކަމަށާއި ގޭގައި މަޑުކޮށްގެން ތިބީ ހެލްތު ޕްރޮޓެކްޝަން އެޖެންސީން އެމީހުން ބަލާ އަންނަންދެން ކަމަށެވެ.

އެނގިފައިވާ ގޮތުގައި މި މީހުންގެ އެއް ސާމްޕަލްވެސް ވަނީ ނަގާފައެވެ. އަދި 2 ވަނަ ސާމްޕަލެއް ނަގާނެ ކަމަށާ ނަމަވެސް މިވަގުތަށް 14 ދުވަހުގެ ކަރަންޓީނަށް ގެންދާކަން އެ މީހުންނަށް އަންގާފައިވާ ކަމަށްވެސް މައުލޫމާތު ދިން ފަރާތުން ވަނީ ބުނެފައެވެ.

މާބަނޑު މީހާ ޕޮޒިޓިވް ވީ މިދިޔަ ބުދަ ދުވަހުއެވެ. މިއީ ދުވަސް ފުރާ ވިހަން ކައިރިވެފައި ހުރި މީހަކު ޕޮަޒިޓިވްކަން އެނގުނު ފުރަތަމަ ފަހަރެވެ.

އެދުވަހުގެ ރޭ ދަރުބާރުގޭގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ކޮވިޑް-19ގެ ތަރުޖަމާނު މުހައްމަދު މަބްރޫކް އަޒީޒް ވިދާޅުވީ އެމީހާގެ ހާލަތު ރަނގަޅު ކަމަށެވެ. އެމީހާގެ ސާމްޕަލް ނެގިފައި ވަނީ ރެންޑަމް ސާމްޕްލިންގެ ތެރެއިންނެވެ. އަދި ކުރިން ބުނެފައިވަނީ އެޑްމިތް ކުރަންނާ އެމީހަކު ފުރަތަމަވެސް ކޮވިޑަށް ޓެސްޓް ކުރާނެ ކަމަށެވެ. ނަމަވެސް އިތުބާރު ހުރި މަސްދަރުތަކުން އެނގިފައިވާ ގޮތުގައި އެ އަންހެން މީހާގެ ސާމްޕަލް ނެގީ އެޑްމިތް ކުރިތާ ދެ ދުވަސް ފަހުންނެވެ.

މި މީހާ ޕޮޒިޓިވްކަން އެނގުމުން ވަނީ ޓްރީ ޓޮޕް ހޮސްޕިޓަލަށް ބަދަލުކޮށްފައެވެ.

ހަބަރު ކޮވިޑް-19 އެޗްޕީއޭ