ގައުމީ ރޫހުގައި މަސައްކަތް ކުރުމަށް ޖާގަ ދިނުމުގެ ގޮތުން ކުރީގެ ރައީސް އަދި އިދިކޮޅު ލީޑަރު އަބްދުﷲ ޔާމީން ދޫކޮށްލުމަށް ސަރުކާރަށް ކުރީގެ އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ގޮވާލައްވައިފިއެވެ.
ޑރ. ޝަހީމް މިއަދު ކުރައްވާފައިވާ ޓްވީޓެއްގައި ވިދާޅުވީ ދުނިޔޭގައި މިހާރު ހަލުވިކަމާއި އެކުގައި ފެތުރެމުން އަންނަ ނުރައްކާތެރި ވައިރަހެއް ކަމަށްވާ ކޮވިޑް19 ފަދަ އިންސާނީ ކާރިސާއިން ދިވެހި ގައުމު ސަލާމަތް ކުރުމަށް އެންމެން އެކަތިގަނޑަކަށްވެ، ގައުމީ ރޫހުގައި މަސައްކަތް ކުރުމަށް ޖާގަ ދިނުމުގެ ގޮތުން ރައީސް ޔާމީން ދޫކޮށްލުމަށް ގޮވާލައްވާ ކަމަށެވެ. އަދި މިފަދަ ދަނޑިވަޅެއްގައި އެންމެ މުހިއްމު އެއްކަމަކީ ގައުމުގެ އެއްބައިވަންތަ ވުން ކަމަށްވެސް ޝަހީމް ވިދާޅުވިއެވެ.
ޑރ. ޝަހީމް މިގޮތަށް ގޮވާލެއްވިއިރު ރައީސް ޔާމީން ހުންނެވީ މަނީ ލޯންޑަރިންގެ ކުށް ސާބިތުވެ ފަސް އަހަރު ދުވަހަށް ޖަލަށްލުމަށް ހުކުމްކޮށްފައެވެ. އެމަނިކުފާނަށް ކްރިމިނަލް ކޯޓުން އިއްވި ހުކުމްގެ އިސްތިއުނާފު އަޑުއެހުންތައް ހައިކޯޓުގައި މިހާރު ދަނީ ކުރިއަށެވެ. އެގޮތުން މިއަދުވެސް ވަނީ އިސްތިއުނާފުގެ އަޑުއެހުމެއް ބާއްވާފައެވެ. އަދި އެ އަޑުއެހުމަށްފަހު ރައީސް ޔާމީން ވަނީ އެމަނިކުފާނުގެ ގެކޮޅު ހ. ދޫވެއްސަަށް ގެންދަވާފައެވެ.
ރައީސް ޔާމީން އެމަނިކުފާނުގެ ގެކޮޅަށް ގެންގޮސްފައިވަނީ އެއް ގަޑިއިރަށެވެ. މަނިކުފާނާއެކު، ކަރެކްޝަންސްގެ މުވައްޒަފުންނާއި ފުލުހުންވެސް އެގޭތެރޭގައި ތިއްބެވިއެވެ. އެނގިފައިވާގޮތުގައި ރައީސް ޔާމީން ގެކޮޅަށް ގެންދިޔައީ އެމަނިކުފާނު އެދިވަޑައިގަތުމުން ކަމަށެވެ. ނަމަވެސް ރައީސް ޔާމީން އެމަނިކުފާނުގެ ގެކޮޅަށް ގެންދިޔައީ ކޮން ސަބަބަކާ ހުރެ ކަމެއް އެނގިފައެއް ނުވެއެވެ.
ފަހުން ރައީސް ޔާމީން ވަނީ އަނބުރާ މާފުށި ޖަލަށް ގެންގޮސްފައެވެ. މިއަދު ބޭއްވި އިސްތިއުނާފުގެ އަޑުއެހުމުގައި ދައުލަތުގެ ފަރާތުން ވަނީ ރައީސް ޔާމީނަށް ވަރުގަދަ ރައްދެއް ދެއްވާފައެވެ. އެގޮތުން ދައުލަތުގެ ވަކީލުން ވިދާޅުވީ މަނީ ލޯންޑަރިންގެ ކުށް ރައީސް ޔާމީންގެ މައްޗަށް އިއްވާފައި ވަނީ ކުށުގެ އުންސުރުތައް ފުރިހަމަކޮށްފައި ކަމަށެވެ. ރައީސް ޔާމީންގެ މައްޗަށް ހުކުމް ކޮށްފައިވަނީ 2014 ވަނަ އަހަރު ތަންފީޒު ކުރި މަނީ ލޯންޑަރިން އަދި ޓެރަރިޒަމަށް ފައިނޭންސް ކުރުން ހުއްޓުވުމުގެ ގާނޫނުގެ ދަށުން، އެ ގަނޫނުގެ ދަށުން ކަމަށާއި އެ ގާނޫނަކީ ރައީސް ޔާމީންގެ ވެރިކަމުގައި އެމަނިކުފާނުގެ ސަރުކާރުން އެކުލަވާލި ގާނެއް ކަމަށްވެސް ދައުލަތުގެ ވަކީލުން ވިދާޅުވިއެވެ. އަދި އެ ގާނޫނުގައިވާ އެއްޗެއް ހުދު ރައީސް ޔާމީނަށް އޮޅި ވަޑައިގަންނަވާނެ ކަމަށް ގަބޫލު ނުކުރެވޭ ކަމަށްވެސް ދައުލަތުގެ ވަކީލުން ވިދާޅުވެއެވެ.
އެ ގާނޫނުގަ ބުނާ އެއްޗެއް އޮޅިގެން އުޅެނީ ކަލޭމުނަށް ޔާމީނަކަށް ނޫން. ދިން ރައްދު އަނބުރާ ތިމާމީހާ ފޫކޮޅަކަށްނު ރައްދުވީ.