ތިލަފުށި ކައިރީގައި އެއް ނަގިލީގައި އަޅާފައި އޮތް ދެ ބޯޓެއްގެ ނަގިލި ކަނޑައިގެން ދިއުމުން އެމްއެންޑީއެފް ކޯސްޓުގާޑުން އެހީތެރިކަން ފޯރުކޮށްދީފިއެވެ.
އެމްއެންޑީއެފްއިން މިއަދު ބުނީ އޮއިވާލި 101 އަދި އޮއިވާލި 108 ނަގިލި ކަނޑައިގެން ގޮސް އެ ދެ ބޯޓު އޮޔާދާތީ ކޯސްޓްގާޑުން އެހީތެރިކަން ފޯރުކޮށްދެން ފަށާފައިވާ ކަމަށެވެ، އެ ކަމުގެ މައުލޫމާތު އެމްއެންޑީއެފްއަށް ލިބުނީ މިއަދު މެންދުރު 12:00ގައި ކަމަށްވެސް އެމްއެންޑީއެފްއިން ބުންޏެވެ. އެމްއެންޑީއެފްއިން ބުނީ އެ ދެ ބޯޓުގައި އެއްވެސް މީހަކު ނެތް ކަމަށެވެ.
ކަނޑުމަތީގައި ހިނގާ މިފަދަ ހާދިސާތަކަށް އެމްއެންޑީއެފް ކޯސްޓުގާޑުން އަބަދުވެސް އަންނަނީ އެހީތެރިކަން ފޯރުކޮށްދެމުންނެވެ. އެގޮތުން މިއަދު 28 މީހުންނާއި މާފުށި ރިސޯޓުން ފުރައިގެން ހުޅުލެއަށް ދިޔަ ލޯންޗެއް މާފުށި ނެރުމައްޗަށް އަރައިގެން ވެސް ކޯސްޓުގާޑުން ވަނީ އެހީތެރިކަން ފޯރުކޮށްދީފައެވެ.
