ސުޕްރީމް ކޯޓުގެ ފަނޑިޔާރު އަބްދުލްޣަނީ މުހައްމަދު މަގާމުން ވަކިކުރަން ޖުޑިޝަލް ސާވިސް ކޮމިޝަން (ޖޭއެސްސީ) އިން ނިންމާފައިވާ ނިންމުމަށް، ރައްޔިތުންގެ މަޖިލީހުގެ ޖުޑީޝަރީ ކޮމިޓީން ތާއީދުކޮށްފިއެވެ.
ފަނޑިޔާރު ޣަނީ މަގާމުން ވަކި ކުރަން ފޮނުވާފައިވާ މައްސަލަ ދިރާސާކުރުމަށްފަހު މިއަދު އޮތް ކޮމިޓީގެ ބައްދަލުވުމުގައި ހުރިހާ މެމްބަރުންގެ އިއްތިފާގުން ނިންމީ، ޖޭއެސްސީން އެ މައްސަލަ ބަލައި ނިންމާފައި ވަނީ އިޖުރާއަތުތަކާ އެއްގޮތަކަށް ކަމަށެވެ. އެހެންކަމުން އެ ރިޕޯޓު ރައްޔިތުންގެ މަޖިލީހުގެ ތަޅުމަށް ފޮނުވަން ވަނީ ނިންމާފަ އެވެ.
ފަނޑިޔާރު މަގާމުން ވަކިވާނީ ޖުޑިޝަރީ ކޮމިޓީގެ ރިޕޯޓް ތަޅުމަށް ގޮސް، މެންބަރުން އެއަށް ބަހުސް ކުރެއްވުމަށްފަހު، އެ ކަމަށް ނަގާ ވޯޓުގައި ބައިވެރިވާ މެންބަރުންގެ އަޣުލަބިއްޔަތުން ފާސްކުރުމުންނެވެ. ފަނޑިޔާރު ކަމުން ޣަނީ ވަކި ކުރުމާއެކު ސުޕްރީމް ކޯޓުގެ ބެންޗުގައި ތިބި ކުރީގެ ހުރިހާ ފަނޑިޔާރުން ބަދަލުކޮށް ނިމުނީއެވެ.
ފަނޑިޔާރު ޣަނީގެ ސުލޫކީ މައްސަލަތަކެއް ބެލުމަށްފަހު އޭނާ މަގާމުން ވަކި ކުރުން ރައްޔިތުންގެ މަޖިލީހަށް ޖޭއެސްސީން ފޮނުވީ މިދިޔަ ބުދަ ދުވަހުގަ އެވެ. ޣަނީ ވަކި ކުރަން ހުށަހަޅަން ނިންމީ އޭނާ 60 ދުވަހަށް ސަސްޕެންޑް ވެސް ކުރުމަށްފަހު އެވެ.
ޖޭއެސްސީއިން ފަނޑިޔާރު ޣަނީއާ ގުޅޭ ގޮތުން ބަލަމުން ދިޔައީ ސުޕްރީމް ކޯޓުން ގާނޫނު އަސާސީއާ ހިލާފަށް ނިންމާފައިވާ ނިންމުންތަކަށް ބަޔާންކޮށް އެ ކޮމިޝަނުން އެކުލަވާލި ރިޕޯޓްގައި ހިމެނޭ ކަންކަމުގެ ތެރެއިން ފަނޑިޔާރު ޣަނީ ބައިވެރިވެވަޑައިގަންނަވާ މައްސަލަތަކެވެ. ފަނޑިޔާރު ޣަނީގެ މައްސަލައެއް އެންޓި ކޮރަޕްޝަން ކޮމިޝަން (އޭސީސީން)ވެސް އަންނަނީ ބަލަމުންނެވެ.
