މަރަދޫ ސްކޫލް ޕްރީ ސްކޫލަކަށް ހެދުމަށް އެޑިއުކޭޝަނުން ނިންމުމުން ރައްޔިތުން އިހުތިޖާޖުކޮށްފި

އައްޑޫސިޓީ މަރަދޫ ސްކޫލް ޕްރީ ސްކޫލަކަށް ހެދުމަށް އެޑިއުކޭޝަނުން ނިންމުމުން އެރަށު ރައްޔިތުން އެކަމާ ނުރުހުން ފާޅުކޮށް އިހުތިޖާޖު ކޮށްފި އެވެ.

މަރަދޫ ސްކޫލް މި އަންނަ އަހަރު ގްރޭޑް 9 އަދި 2021 ވަނަ އަހަރު ގްރޭޑް 10 އަކަށް ކިޔަވަދޭ ސުކޫލަކަށް ބަދަލު ކުރަން ނިންމުމަށްފަހު، އެ ނިންމުން ބަދަލުކޮށް، އެ ސްކޫލަކީ ޕްރީ ސްކޫލެއްގެ ގޮތައް ކަނޑައަޅަން އެޑިއުކޭޝަން މިނިސްޓްރީން ނިންމުމުން އެ މައްސަލަ ފެންމަތިވެ އާންމުން ވަނީ ނުރުހުން ފާޅުކޮށްފަ އެވެ. މިކަމާ ގުޅިގެން މަރަދޫގެ ރައްޔިތުން މިރޭ ވަނީ ނުރުހުން ފާޅުކޮށް، އިހުތިޖާޖުކޮށްފަ އެވެ. މަރަދޫގެ ރައްޔިތުންނާއި އެޑިއުކޭޝަން މިނިސްޓްރީގެ އޮފިޝަލުން ބައްދަލުކުރަން އައުމުން މުޅި ހޯލު އޮތީ ހިމޭން އިހުތިޖާޖެއްގަ އެވެ.

މިކަމާއި ގުޅިގެން މިނިސްޓްރީ އޮފް އެޑިއުކޭޝަނުން މަރަދޫ ސްކޫލުގެ ޕްރިންސިޕަލް އަބްދުލް ލަތީފަށް ފޮނުވި ސިޓީގައި ބުނެފައިވަނީ، އައްޑޫ ސިޓީގެ ބައެއް ސްކޫލުތަކުގެ ކިޔަވައިދޭ ގްރޭޑްތަކަށް މިނިސްޓްރީގެ ފަރާތުން ބަދަލުތަކެއް ގެނެވިފައި ވާތީ، އިތުރު ފަރާތްތަކުގެ ލަފަޔާ މަޝްވަރާއަށް ރިއާޔަތްކޮށް މަރަދޫ ސްކޫލު ފައުންޑޭޝަން ސްޓޭޖްގެ ދަރިވަރުންނަށް ކިޔަވައިދޭ ސްކޫލަކަށް ބަދަލު ކުރުމަށް ނިންމާފައިވާ ކަމަށެވެ. އަދި އެބަދަލު ގެނައުމަށް ރޭވިފައިވަނީ ކުރިޔަށް އޮތް 3 އަހަރަށް ބަހާލެވިގެން ކަމަށް މިނިސްޓްރީން ފޮނުވި ސިޓީގައި ބުނެފައި ވެއެވެ. އެގޮތުން، 2020 ވަނަ އަހަރާއި 2021 ވަނަ އަހަރު މަރަދޫ ސުކޫލުގައި ކިޔަވައިދޭނީ ފައުންޑޭޝަން ސްޓޭޖުން ފެށިގެން ގްރޭޑް 8 އާ ހަމައަށް ކަމަށް މިނިސްޓްރީން ބުނެއެވެ. އަދި 2022 ވަނައަހަރުން ފެށިގެން މަރަދޫ ސްކޫލް ފައުންޑޭޝަން ސްޓޭޖްގެ ދަރިވަރުންނަށް ކިޔަވައިދޭ ސުކޫލަކަށް ބަދަލު ކުރެވޭން ވާހަކަ އެ ސިޓީގައި ބުނެފައި ވެއެވެ.

މީގެ ކުރިން މަރަދޫ ސްކޫލުގައި 2020 ވަނަ އަހަރު ގްރޭޑް 9 އުފެދި އަދި 2021 ވަނަ އަހަރު ގްރޭޑު 10 އުފައްދައި އެ ސާކްލް 10 އަށް ކިޔަވައިދޭ ސްކޫލަކަށް ބަދަލުކުރަން މިނިސްޓްރީން ވަނީ ނިންމާފަ އެވެ.

މަރަދޫ ރައްޔިތުންގެ އެދުމަކީ މި ސަރުކާރުން ވައުދުވިގޮތައް މަރަދޫ ސްކޫލް ގްރޭޑް 1 ކުން ފެށިގެން ގްރޭޑް 10 އަށް ކިޔަވައިދޭ ސްކޫލެއްގެ ގޮތުގައި ކަނޑައަޅައި ދިނުމެވެ.