ރާއްޖެއަށް 15 އެމްބިއުލާންސް ގެންނަން ހުޅުވާލި ބީލަަން އަލުން އިވެލުއޭޓް ކުރުމަށް އެންޓި ކޮރަޕްޝަން ކޮމިޝަން (އޭސީސީ) އިން ފިނޭންސް މިނިސްޓްރީއަށް އަންގައިފިއެވެ.
އެ މިނިސްޓްރީއަށް އޭސީސީން މިގޮތަށް އެންގީ އެމްބިއުލާންސް ގެންނަން ހުޅުވާލި ބީލަމުގައި ހެޔޮ އަގު ހުށަހަޅާފައިވާ ކުންފުނިތަކުގެ ބަދަލުގައި އަގު ބޮޑުކޮށް ހުށަހެޅި އިންޑިއާގެ ކުންފުންޏަކަށް އެ މަސައްކަތް ދިނުމާ ގުޅޭ ގޮތުން އޭސީސީއަށް ހުށަހެޅިފައިވާ މައްސަލަ ތަހުގީގު ކުރަމުންދާތީއެވެ. އެ މައްސަލަ އޭސީސީއަށް ހުށަހެޅީ އެ ބީލަމުގައި ބައިވެރިވެ އަދި އެމްބިއުލާން ގަތުމަށް ފިނޭންސުން ހަވާލުކުރި އިންޑިއާ ކުންފުންޏަށްވުރެ އަގު ހެޔޮކޮށް ބީލަށް ހުށަހެޅި އޭޑީކޭ ޓްރޭޑް އެންޑް ޝިޕިން އިންނެވެ.
އެމްބިއުލާންސް ގެނައުމަށް ފިނޭންސް މިނިސްޓްރީން ހަވާލުކުރި އިންޑިއާގެ ކުންފުންޏަކީ މޯހަން މުތާ އެކްސްޕޯޓްސް (އެމްއެމް އެކްސްޕޯޓްސް) ނަމަކަށް ކިޔާ ކުންފުންޏެކެވެ. އެ ކުންފުންޏަށް އެ މަސައްކަތް ހަވާލުކުރީ 8.7 މިލިއަން ރުފިޔާއަށެވެ. އެ ކުންފުންޏަށް އެ މަސައްކަތް ހަވާލު ކޮށްފައިވަނީ އެ ބީލަމުގައި ބައިވެރިވި އޭޑީކޭ ޓްރޭޑް އެންޑް ޝިޕިން އިން ހުށަހެޅި އަގަށްވުރެ 780،180ރ. ބޮޑުކޮށެވެ.
އެމްބިއުލާންސް ގެނައުމުގެ ބީލަށް އަލުން އިވެލުއޭޓު ކުރުމަށް ފިނޭންސަށް އޭސީސީން އަންގާފައިވަނީ މިދިޔަ ހޯމަ ދުވަހުއެވެ. އެގޮތަށް އެކަން ކުރުމަށް އެންގީ ބީލަންތައް އިވެލުއޭޓް ކުރުމުގައި ހަމަހަމަ ކަމެއް ގެންގުޅެފައި ނުވާތީ އެވެ. އެގޮތުން އޭސީސީން ވަނީ ހުށަހެޅި ހުރިހާ ބީލަމެއް އިވެލުއޭޓް ކުރުމަށް ފިނޭންސަށް އަންގާފައެވެ.
ނަމަވެސް މިދިޔަ މަހުގެ 26ވަނަ ދުވަހު ނޫސްވެރިންނާއި ވާހަކަދައްކަވަމުން ފިނޭންސް މިނިސްޓަރު އަމީރު ވިދާޅުވީ އެއްވެސް މަޝްރޫއެއް ވަކި ބަޔަކަށް ދޭން ނިންމައި އެގޮތަށް ފިނޭންސް މިނިސްޓްރީން އަމަލުކޮށްފައި ނޯންނާނެ ކަމަށެވެ. ބީލަމަށް ހުޅުވާލުމުން ކުރިމަތިލާ ކުންފުނިތަކުގެ ތެރެއިން އެ މަޝްރޫއު ކަށަވަރުވަނީ އެންމެ ކުރު މުއްދަތަކާއި އެންމެ ހެޔޮއަގު ހުށަހަޅާ ބަޔަކަށް ނޫން ކަމަށާއި ޓެކްނިކަލް އިވެލުއޭޝަންގައި ވެސް ގިނަ ކަންކަމަށް ބަލާ ކަން ފާހަގަކުރެއްވި އެވެ.
އެމްބިއުލާންސް ގެނައުމަށް ފިނޭންސް މިނިސްޓްރީން ހަވާލުކޮށްފައިވާ މޯހަން މުތާ އެކްސްޕޯޓް ކުންފުންޏަކީ ސަރުކާރުގެ އެކި ޕްރޮޖެކްޓްތައް ނަގައިގެން ރާއްޖޭގައި ވިޔަފާރި ކުރާތާ އެތައް އަހަރެއް ވެފައިވާ އިންޑިއާ ކުންފުންޏެކެވެ
