ނަވާރަވަނަ ރައްޔިތުން މަޖިލީހުގެ ފުރަތަމަ ދައުރުގެ ޖަލްސާތަކަށް އެންމެ މަދުން ހާޒިރުވި މެންބަރުންގެ ލިސްޓުގެ އެންމެ ކުރީގައި ރައްޔިތުން މަޖިލީހުގެ މީދޫ ދާއިރާގެ މެންބަރު އަދި މަޝްހޫރު ވިޔަފާރި ވެރިޔާ އަހުމަދު ސިޔާމް (ސަންޓްރެވަލް ސިޔާމް) ހިމެނިއްޖެއެވެ.
މަޖިލީހުގެ ހާޒިރީ ދައްކާ ގޮތުން މި ލިސްޓުގައި ސިޔާމާއި އެކުގައި ދެންވެސް ހިމެނެނީ ދެ ވިޔަފާރި ވެރިއެކެވެ. އެއީ އޭދަފުށީ ދާއިރާގެ މެންބަރު އަހުމަދު ސަލީމް (ރެޑްވޭވް ސަލީމް) އަދި މާމިގިލި ދާއިރާގެ މެންބަރު އަދި ވިލާ ކުންފުނީގެ ބާނީ ގާސިމް އިބްރާހީމެވެ.
މަޖިލީހުގެ ހާޒިރީ ދައްކާ ގޮތުގައި މަޖިލީހުގެ 47 ޖަލްސާއެއް މި ދައުރުގައި ބޭއްވިއިރު ސިޔާމް ހާޒިރުވެވަޑައިގެންނެވީ 16 ޖަލްސާއަކަށެވެ. ސަލީމް ވަޑައިގެންނެވީ 38 ޖަލްސާއަށެވެ. އަދި ގާސިމް އިބްރާހީމް ވަޑައިގެންނެވީ 38 ޖަލްސާއަށެވެ. ގާސިމް އިބްރާހީމް ފަސް ޖަލްސާއަށް ވަޑައިނުގަންނަވާއިރު ހަތަރު ދުވަހުގައި ހުންނެވީ ސަލާމުގައެވެ. ސަލީމް ވަޑައިނުގަންނަވާ ހުންނެވީ 9 ޖަލްސާއަކަށެވެ.
މަޖިލީހުގެ މިދައުރުގެ ޖަލްސާތަކަށް އެންމެ ގިނައިން ސަލާމް ބުނެފައިވަނީ ވިލިގިލި ދާއިރާގެ މެންބަރު ސައުދު ހުސައިންނެވެ. މެންބަރު ސައުދު 12 ޖަލްސާއަކަށް ސަލާމް ބުނެފައިވެއެވެ. ފަރެސް މާތޮޑާ ދާއިރާގެ މެންބަރު ހުސައިން މުހައްމަދު ލަތީފު ހަތް ޖަލްސާއަކަށް ސަލާމް ބުނެފައިވާއިރު މާފަންނު ހުޅަނގު ދާއިރާގެ މެންބަރު މުހައްމަދު ފަލާހުވެސް ވަނީ ހަތް ދުވަހު މަޖިލީހަށް ސަލާމް ބުނެފައެވެ. އަދި އިނގުރައިދޫ ދާއިރާގެ މެންބަރު ހަސަން އަހުމަދުވެސް ވަނީ ހަތް ދުވަހު ސަލާމް ބުނެފައެވެ. މި ދައުރުގެ 47 ޖަލްސާއަށް ބަރާބަރަށް ހާޒިރުވެވަޑައިގެންފައި ވަނީ އެންމެ 24 މެންބަރުންނެވެ.
މަޖިލީހުގެ ފުރަތަމަ ދައުރުގެ ޖަލްސާތައް މިދިޔަ ބުރާސްފަތި ދުވަހު ވަނީ ނިންމާލާފައެވެ.
