މާދަމާގެ މަޖިލީހަށް ޔޫރަޕިއަން ޔޫނިންގެ އިސް ބޭފުޅަކު ވަޑައިގެން ތަގުރީރު ކުރެއްވުމަށް ހަމަޖެހިފައިވާ ކަމަށް ރައްޔިތުންގެ މަޖިލީހުގެ ރައީސް، ރައީސް ނަޝީދު ވިދާޅުވެއްޖެ އެވެ.
މިއަދު ރައްޔިތުންގެ މަޖިލީހުގައި ވާހަކަ ދައްކަވަމުން ރައީސް ނަޝީދު ވިދާޅުވީ ޔޫރަފިއަން ޔޫނިއަންގެ ފަރާތުން ޔޫރަޕްގެ އިތްތިހާދުގެ ހައި ރިޕްރެޒެންޓޭޓިވް އޮފް ދަ ޔޫނިއަން ފޯ ފޮރިން އެފެއާޒް އެންޑް ސެކިއުރިޓީ ޕޮލިސީ އަދި ވައިސް ޕްރެޒިޑެންޓް އޮފް ދަ ކޮމިޝަން، ފެރެދިކާ މޮގަރިނީ މާދަމާ މަޖިލީހަށް ވަޑައިގެން ތަގުރީރު ކުރެއްވުމަށް އެދިވަޑައިގެންފައި ވާނެ ކަމަށެވެ.
ފެރެދިކާ މޮގަރިނީއަކީ އިޓަލީގެ ފޮރިން މިނިސްޓަރުކަން ކުރައްވާފައިވާ ބޭފުޅެކެވެ. އަދި ނޭޓޯގެ އިޓާލީގެ ލީޑަރުކަމާއި، އިޓަލީގެ ރައްޔިތުންގެ މަޖިލީހުގެ މެންބަރުކަމާއި، އީޔޫގެ ކައުންސިލްގެ މެންބަރުކަން އަދި އިޓަލީގެ ފޮރިން އެފެއާޒްގެ އެތައް މަގާމެއް ފުރުއްވާފައިވާ ބޭފުޅެކެވެ. އަދި މިހާރުވެސް ޔޫރަޕްގެ އިގްތިހާދުގެ ހާރިޖީ ގުޅުންތައް އަދި ސަލާމަތީ ކަންކަން ބަލަހައްޓަވާ އެންމެ އިސް ފަރާތަކީވެސް ފްރެޑްރިކާ އެވެ.
ފެރެދިކާ މޮގަރިނީ ރާއްޖެއަށް ފުރަތަމަ ފަހަރަށް ޒިޔާރަތް ކުރައްވާއިރު، އެ ދަތުރުފުޅުގައި މަޖީލީހަށް ވަޑައިގެން ތަގުރީރު ކުރައްވުމަށް ވަނީ ހަމަޖެހިފަ އެވެ. އަދި އޭނާ ތަގްރީރު ކުރައްވާނީ މަޖިލީހުގެ ޖަލްސާއެއްގަ ނޫންކަމަށްވެސް ރައްޔިތުންގެ މަޖިލީހުގެ ރައީސް، ރައީސް ނަޝީދު ވިދާޅުވި އެވެ. ފެރެދިކާ މޮގަރިނީ މާދަމާގެ މަޖިލީހުގައި ތަގުރީރު ކުރައްވާ އިރު ރާއްޖޭގައި މަސައްކަތްކުރައްވާ ޑިޕްލޮމެޓުންނާއި، އަދި ޔޫރަޕްގެ އިއްތިހާދުގެ އެކިއެކި ވިޔަފާރި ކުންފުނިތަކުގައި އިސްކޮށް ރާއްޖޭގައި މަސައްކަތް ކުރައްވާ ބޭފުޅުންނަށާއި، ރިސޯޓު ވިޔަފާރީގައި މަސައްކަތް ކުރައްވާ ބޭފުޅުންނަށާއި، އަދި އެހެނިހެން ބޭފުޅުންނަށް މާދާމާގެ މަޖިލީހުށް ދައުވަތު އަރުވާނޭކަމަށް ރައީސް ނަޝީދު ވިދާޅުވި އެވެ.
ރައީސް ނަޝީދު ވިދާޅުވީ، މިދިޔަ ރިޔާސީ އިންތިހާބު އިންސާފުވެރިކޮށް ކުރިއަށް ގެންދިއުމުގައި އެންމެ ބޮޑު ދައުރެއް އަދާކޮށްދެއްބި އެއް ބޭފުޅަކީ ފެރެދިކާ މޮގަރިނީ ކަމަށެވެ.
