ޓްރާންސްޕޯޓް މިނިސްޓަރު އައިޝަތު ނަހުލާ މަޖިލީހަށް ހާޒިރުކޮށް ސުވާލުކުރުން ބުދަ ދުވަހު އަދި ހެލްތް މިނިސްޓަރު އަބްދުﷲ އަމީން މަޖިލީހަށް ހާޒިރުކޮށް ސުވާލުކުރުން މާދަމާގެ ޖަލްސާއަށް ތާވަލް ކޮށްފައިވާކަމަށް މަޖިލީހުގެ އިދާރާއިން ބުނެފި އެވެ.
ޓްރާންސްޕޯޓް މިނިސްޓަރު އައިޝަތު ނަހުލާއާއި ސުވާލު ކުރެއްވުމަށް ހުށަހެޅީ ކާށިދޫ ދާއިރާގެ މެންބަރު އަބްދުﷲ ޖާބިރެވެ. މިނިސްޓަރު މަޖިލީހަށް ހާޒިރުވުމަށް ހުށަހެޅީ މިދިޔަ މަހުގެ ދެވަނަ ދުވަހު ނަމަވެސް، މަޖިލީހަށް ހާޒިރުނުވުމުން އެ ނޯޓިހުގެ މުއްދަތު ވަނީ ހަމަވެފަ އެވެ. މަޖިލީހުގެ ގަވާއިދުގައިވާ ގޮތުން މިނިސްޓަރަކާ ސުވާލުކުރުމަށް މެމްބަރަކު ހުށަހެޅުމުން އެ މިނިސްޓަރަކަށް 14 ދުވަހުގެ ނޯޓިސް ދޭން ޖެހޭނެއެވެ. ނަމަވެސް މަޖިލީހަށް ހާޒިރުވުމަށް 14 ދުވަސް ހަމަވުމުން އެ ނޯޓިހުގެ މުއްދަތުވެސް ހަމަވީއެވެ. އެހެންކަމުން މިނިސްޓަރާ ސުވާލު ކުރެއްވުމަށް އަލުން ފުރުސަތު ވަނީ ދީފައެވެ.
މިނިސްޓަރު ނަހުލާއާ ސުވާލުކުރުމަށް ހަމަޖެހިފައިވަނީ، މާލޭގައި ޕާކު ކުރާނެ ތަންތަން އެކަށީގެންވާ މިންވަރަށް ނުހަދައި، ގަވައިދާ ހިލާފަށް ޕާކު ކުރާ އުޅަނދުފަހަރުގައި ޕާކިންގް ސްޓިކާ ޖަހާ މައްސަލައިގައެވެ.
މާދާމާ ހެލްތް މިނިސްޓަރު އަމީން މަޖިލީހަށް ހާޒިރުކޮށް ސުވާލުކުރެއްވުމަށް ތާވަލް'ު ކޮށްފައި ވާއިރު، މިނިސްޓަރާ ސުވާލުކުރުމަށް މަޖިލީހަށް ހުށަހެޅީ މަޑުއްވަރީ ދާއިރާ މެމްބަރު، އާދަމް ޝަރީފު އުމަރެވެ. އާދަމް ޝަރީފު ސުވާލު ކުރައްވަނީ އޭނާ ނިސްބަތްވާ ދާއިރާގެ ރ. މަޑުއްވަރީ ސިއްހީ މަރުކަޒާއި ރ. މީދޫ ސިއްހީ މަރުކަޒާ ބެހޭ ގޮތުންނެވެ.
މިފަހްތާ ތެރޭގައި ދެ ގަރާރަކާއި ތިން ބިލެއްގެ އިބްތިދާއީ ބަހުސް ފެށުމަށް ހަމަޖެހިފައިވެއެވެ. އިބްތިދާއީ ބަހުސް ފެށުމަށް ހަމަޖެހިފައިވަނީ ކާށިދޫ ދާއިރާގެ މެންބަރު އަބްދުﷲ ޖާބިރު ހުށަހެޅުއްވި ދެ ގާރާރެކެވެ. އެއީ ރާއްޖެ އެތެރެ ކުރެވީ ހަކަތައިގެ ބާވަތުގެ ގަރާރަކާއި ސަރުކާރު ހިއްސާވާ ކުންފުނިތަކާ ގުޅޭ ގަރާރެކެވެ. އިބްތިދާއީ ބަހުސް ފެށުމަށް ހަމަޖެހިފައިވާ ތިން ބިލަކީ، ސަރުކާރުގެ ފަރާތުން ހުށަހެޅުއްވި ތިން ބިލެެވެ. އެއީ މަނަދޫ ދާއިރާ މެމްބަރު އަހްމަދު ހާރޫން ހުށަހެޅުއްވި އިޖްތިމާއީ ސިއްހީ ގައުމީ އިންސުއަރެންސްގެ ގާނޫނަށް އިސްލާހު ގެނައުމުގެ ބިލް، މާފަންނު މެދު ދާއިރާ މެމްބަރު ހުށަހެޅުއްވި ވިޔަފާރި ރަޖިސްޓްރީ ކުރުމުގެ ގާނޫނަށް އިސްލާހު ހުށަހެޅުމުގެ ބިލް އަދި އިހަވަންދޫ ދާއިރާ މެމްބަރު މުހައްމަދު ޝިފާއު ހުށަހެޅުއްވި މަސްވެރިކަމާ ބެހޭ ބިލެވެ.
