ރައްޔިތުން މަޖިލީހުގެ ދަނގެތީ ދާއިރާގެ ކުރީގެ މެންބަރު އިލްހާމް އަހްމަދުގެ އަނބިކަނބަލުން އާމިނަތު މާޝާ ފުލުހުންގެ އިދާރާއަށް ހާޒިރުކޮށް "ރަހީނުކުރި" މައްސަލަ ބައްލަވާނެ ކަމަށް ޕްރޮސިކިއުޓާ ޖެނެރަލް (ޕީޖީ) އައިޝަތު ބިޝާމް ވިދާޅުވެއްޖެއެވެ.
އިއްޔެ ބޭއްވި ޖުޑީޝަރީ ކޮމެޓީގެ ބައްދަލުވުމުގައި މެންބަރުން ވަނީ މާޝާ ރަހީނުކުރި މައްސަލާގައި ޕީޖީ އަމަލު ކުރެއްވި ގޮތް ސާފު ކުރުމަށް ޕީޖީއަށް ތަފާތު އެކި ގޮތްގޮތަށް ސުވާލު ކުރައްވާފައެވެ. އަދި އެކަމުގައި މެންބަރުން ވަނީ ކަންބޮޑުވުން ފާޅުކުރައްވާފައެވެ. މި ސުވާލު އެންމެ ފުރަތަމަ ކޮމެޓީގައި ކުރެއްވީ ހެންވޭރު ހުޅަނގު ދާއިރާގެ މެންބަރު ހަސަން ލަތީފެވެ. ހަސަން ލަތީފުގެ ސުވާލަށް ޕީޖީ ޖަވާބު ދެއްވި ނަމަވެސް އެ މައްސަލައިގެ ސީރިއަސް ކަމުން ތުޅާދޫ ދާއިރާގެ މެންބަރު ހިސާން ހުސައިން ވަނީ ދެވަނަ ފަރަހަށް އެ ސުވާލު ތަކުރާރުކޮށް ކުރައްވާ އެކަމުގެ ކަންބޮޑުވުން ފާޅު ކުރައްވާފައެވެ.
މާޝާ ފުލުހުންގެ އިދާރާއަށް ހާޒިރުކުރީ މިދިޔަ އަހަރުގެ ފެބްރުއަރީ މަހުގެ 11ވަނަ ދުވަހުއެވެ. އޭނާ ފުލުހުންގެ އިދާރާއަށް ހާޒިރުކުރީ ސުވާލު ކުރުމަށް ކަމަށް ބުނެއެވެ. ނަމަވެސް އެދުވަހުގެ މެންދުރެއް ހާއިރު މާޝާ ފުލުސް އޮފީހަށް ހާޒިރު ކުރުމަށް ފަހު، ހައްޔަރުކުރި ކަމަށް ގިނަ ބަޔަކު އޭރު ދިޔައީ ބުނަމުންނެވެ. އަދި މާޝާ ދޫކޮށްލީ އެރޭގެ ވަގުތެއްގައެވެ. ތުހުމަތަކާ ނުލައި ފުލުހުންގެ އިދާރާގައި އެހާ ގިނައިރު ބޭންދުމަކީ "ރަހީނު ކުރުން" ކަމުގައި އިއްޔެގެ ކޮމެޓީގައި މެންބަރު ހިސާން ސިފަކުރެއްވި އެވެ.
އެ ކަމާ ގުޅިގެން ބިޝާމް ވިދާޅުވީ މާޝާ ރަހީނު ކުރި މައްސަލަ އެއްވެސް އިރެއްގައި ޕީޖީ އޮފީހަށް ހުށަހަޅާފައި ނުވާ ކަމަށާއި އެ ކަމުގެ މައުލޫމާތު އޭނާއަށް އެނގިވަޑައިގަތީ މައްސަލަ ހިނގިތާ ވެސް ދުވަސްތަކެއް ފަހުން ކަމަށެވެ. ނަމަވެސް ބިޝާމް ވިދާޅުވީ އޭރުގެ ދަނގެތި ދާއިރާގެ މެންބަރު އިލްހާމްގެ މައްސަލައިގެ ޕްރޮސެކިއުޝަން މަރުހަލާގައި އިލްހާމްގެ އަނބިކަނބަލުންގެ މައްސަލާގައި ޕީޖީގެ ވަކީލުން ފުލުހުންނާއި ސުވާލު ކުރެއްވި ކަމަށް ޕީޖީ ވިދާޅުވިއެވެ.
"މި ދެންނެވި މައްސަލައިގެ ޕްރޮސެކިއުޝަން މަރުހަލާގައި އަޅުގަނޑުމެން ފުލުހުންނާއި ސުވާލުކުރިން. އެކަމަކު އެމައްސަލައަކަށް ފުލުހުން ޖަވާބެއް ނުދެއްވި،" ބިޝާމް ވިދާޅުވިއެވެ.
ބިޝާމް އެފަދައިން ވިދާޅުވުމުން ހިސާން ވަނީ ޕީޖީން ޒިންމާ އަދާނުކުރައްވާ ކަމުގެ ކަންބޮޑުވުން ފާޅުކުރައްވައި ޕީޖީގެ ގާނޫނުން ޕީޖީއަށް ލިބިދޭ ބައެއް ބާރުތައް ފާހަގަ ކުރައްވާފައެވެ. ހިސާންގެ އެ ވާހަކަތަކަށް ރައްދު ދެއްވަމުން ބިޝާމް ވަނީ މާޝާގެ މައްސަލަ ބަލައި އަޅުއްވަން ޖެހިވަޑައިގަންނަވާ ފިޔަވަޅުތައް އަޅުއްވާނެ ކަމަށް ވިދާޅުވެފައެވެ.
އިއްޔެގެ ކޮމެޓީގައި މެންބަރުން ވަނީ ސިޔާސީ ފަރާތްތަކަށް މިދިޔަ ސަރުކާރުގައި ދައުވާ ކުރުމަށް ކުރީގެ ރައީސް އަބްދުﷲ ޔާމީނު ނުވަތަ އެނޫން އެހެން އެއްވެސް ފަރާތެއްގެ ނުފޫޒު ފޯރުވިތޯ ސުވާލު ކުރައްވާފައެވެ. ޕީޖީ ބިޝާން ވިދާޅުވީ އެއްވެސް ފަރާތަކަށް ވަކި ގޮތަކަށް ދައުވާ ކުރުމަށް ރައީސް ޔާމީންގެ ފަރާތްޕުޅުންވެސް އަދި އެހެން އެއްވެސް ބޭފުޅެއްގެ ފަރާތްޕުޅުން ނުފޫޒެއް ފޯރާފައިވާ ނުވާ ކަމަށެވެ.
