އިލެކްޝަންސް ކޮމިޝަނަށް މެންބަރަކު އައްޔަންކުރަން، ނަންތައް ދިރާސީ ކުރި މިނިވަން މުއައްސަސާތަކުގެ ކޮމިޓީގެ ރިޕޯޓް މަޖިލީހުގެ ތަޅުމަށް ހުށަހެޅީ ފާސް ނުކޮށް ކަމަށް ބުނެ އީސީއަށް މެންބަރަކު އައްޔަންކުރުން ފަސްކޮށްފިއެވެ.
އީސިއަށް މެންބަރަކު އައްޔަން ކުރަނީ މި މަހުގެ 13 ވަނަ ދުވަހު އިލެކްޝްންސް ކޮމިޝަންގެ މެންބަރު އިސްމާއިލް ހަބީބުގެ މެންބަރު ކަމުގެ މުއްދަތު ހަމަވާތީއެވެ. މިއަދު ޖަލްސާގައި ރައީސް އިބްރާހީމް މުހައްމަދު ސޯލިހު މަޖިލީހަށް ފޮނުއްވި ނަންތަކުގެ ތެރެއިން ނަމެއް ފާސްކޮށް އީސީއަށް މެންބަރަކު އައްޔަންކުރުމަށް މިނިވަން މުއައްސަސާތަކުގެ ކޮމިޓީން ފާސްކުރި ރިޕޯޓު ހުށަހެޅުމަށް އެޖެންޑާ ކުރެވުނެވެ.
ނަމަވެސް، އެމްޑީޕީ ޕާލިމެންޓަރީ ގްރޫޕުގެ ލީޑަރު އަދި މިނިވަން މުއައްސަސާތަކާ ބެހޭ ކޮމިޓީގެ މެންބަރު މުހައްމަދު އަސްލަމް މަޖިލީހުގެ ރައީސް ގާސިމް އިބްރާހީމަށް ފޮނުއްވި ސިޓީއެއްގައި ވިދާޅުވެފައިވަނީ މަޖިލީހަށް ފޮނުވާފައިވަނީ ކޮމިޓީން ފާސްނުކުރާ ރިޕޯޓެއް ކަމަށެވެ.
"އިލެކްޝަންސް ކޮމިޝަންގެ މެންބަރެއްގެ މަގާމް 13 މާޗް 2019 ގައި ހަމަވާތީ، އެ މަގާމަށް ކުރިމަތިލެއްވި ބޭފުޅުންގެ ނަންތައް މިނިވަން މުއައްސަސާތަކާ ބެހޭ ކޮމިޓީއަށް ފޮނުވި އެ ކޮމިޓީގެ ތިން ބައްދަލުވުމެއް ބޭއްވި ވަނީ ދިރާސާ ކުރެވިފައެވެ. 4 މާޗްގައި މި މައްސަލައާއި ގުޅޭގޮތުން މިނިވަން މުއައްސަސާތަކާއި ބެހޭ ކޮމިޓީން ނެރުނު ރިޕޯޓަކީ، ކޮމިޓީން ފާސްކޮށްފައިވާ ރިޕޯޓެއް ނޫނެވެ" އަސްލަމްގެ ސިޓީގައި ވިދާޅުވެފައިވެއެވެ.
އެހެންކަމުން މިއަދުގެ ޖަލްސާގައި ދެން އިތުރުކަމެއް އެޖެންޑާ ކުރެވިފައި ނެތުމުން، ރިޔާސަތުން ވަނީ އަސްލަމަކީ މިނިވަން މުއައްސަސާތަކުގެ ކޮމިޓީގެ މެންބަރަކަށް ވުމުން، އެ މައްސަލަ ކޮމިޓީން ބަލައި އޭގެ ހަގީގަތް ބައްލަވާ ވޯޓަށް އަހާނެކަމަށް ދަންނަވަމުން މިއަދުގެ ޖަލްސާ ނިންމަވާލައްވާފައެވެ.
މިނިވަން މުއައްސަސާތަކާ ބެހޭ ކޮމިޓީން އާންމުކުރި ރިޕޯޓުގައި ވާގޮތުން އިލެކްޝަންސް ކޮމިޝަން (އީސީ) ގެ މެމްބަރުކަމަށް ކުރިމަތިލެއްވި 16 ބޭފުޅުންގެ ތެރެއިން ރައްޔިތުންގެ މަޖިލިހުގެ މިނިވަން މުއައްސަސާތަކުގެ ކޮމިޓީން ދިރާސާކޮށް، ކޮމިޝަންގެ މިހާރުގެ މެމްބަރު އިސްމާއިލް ހަބީބަށް އެންމެ މަތިން ވަނީ މާކްސް ދެއްވާފައެވެ. ހަބީބަށް 90 ޕަސެންޓު ދީފައިވާއިރު، ކޮމިޝަންގެ މެމްބަރަކަށް އޭނާ އައްޔަން ކުރަން އެ ކޮމިޓީން ވަނީ ފާސްކޮށްފައެވެ.
ރިޕޯޓްގައިވާ ގޮތުން، ކޮމިޝަނަށް އައްޔަން ކުރުމަށް ގާބިލް ފަރާތެއް ކަމަށް ކަނޑައަޅަނީ ކޮމިޓީން ކަނޑައަޅާފައިވާ މިންގަނޑުން މާކްސް ދިނުމުން އެވްރެޖް 75 ޕަސެންޓް އަށް ވުރެ މަތިން މާކްސް ލިބޭ މީހުންނެވެ. ހަބީބްގެ އިތުރުން، އަހުމަދު މޫސާ އަށްވެސް 75 ޕަސަންޓަށް ވުރެ މަތިން މާކްސް ލިބިފެއެވެ.
މަޖިލީހަށް މި ރިޕޯޓް ހުށަހަޅައި މަޖިލީހުން ޖެހޭނީ ދެ ބޭފުޅުންގެ ތެރެއިން އެކަކުގެ ނަން ފާސް ކުރާށެވެ.
