ކުރީގެ ރައީސް އަބްދުﷲ ޔާމީންގެ ސަރުކާރުން އަސްކަރިއްޔާ ބޭނުންކޮށްފައި ވަނީ ސިޔާސީ ކަންކަމުގައާއި ޕްރޮޖެކްޓްތައް ހިންގުމަށް ކަމަށާއި، އަސްކަރިއްޔާގެ ވަސީލަތްތަކުގެ ބޮޑުބައެއް ހުރީ ހަލާކުވެފައި ކަމަށް ޑިފެންސް މިނިސްޓަރު މާރިޔާ އަހުމަދު ދީދީ ވިދާޅުވެެއްޖެއެވެ.
އިންޑިއާގެ ނޫހަކަށް ދެއްވި އިންޓަވިއުއަކާ ގުޅިގެން، މިއަދުގެ މަޖިލީހުގެ ޖަލްސާއަށް މާރިޔާ ހާޒިރުކުރައްވާ ހިތަދޫ އުތުރު ދާއިރާގެ މެންބަރު މުހައްމަދު އަސްލަމް ކުރެއްވި ސުވާލަކަށް ޖަވާބު ދެއްވަމުން މިނިސްޓަރު ވިދާޅުވީ އޭނާ މަގާމާ ހަވާލުވެވަޑައިގަތުމަށްފަހު އެންމެ ފުރަތަމަ މަސައްކަތަކަށްވީ ދިވެހި އަސްކަރިއްޔާގެ ހާލަތު ދެނެގަތުން ކަމަށެވެ. އެގޮތުން ކުރި ދިރާސާތަކުން އަސްކަރިއްޔާ އޮތް ހާލަތު ފެނި ހައިރާންވެވަޑައިގެންނެވި ކަމަށް ވިދާޅުވިއެވެ.
"ކުރީގެ ސަރުކާރުން އަސްކަރިއްޔާ ބޭނުންކޮށްފައިވަނީ ނާޖާއިޒު ގޮތުގައި އެކިއެކި ޕްރޮޖެކްޓްތައް ހިންގުމަށް. އަސްކަރިއްޔާގެ އޮޕްރޭޝަނަލް ގާބިލްކަން ހަރުދަނާކޮށް ކުރިއަރުވާ ގައުމަށް ދިމާވެދާނެ ހަމަލާއަކުން ދިފާއުވާނެ ގާބިލްކަން އިތުުރުކުރުމަށް މަސައްކަތް ކޮށްފައި ނުވޭ. ސިފައިންގެ ބޭފުޅުން ބޭނުންކުރީ ރަސްރަނި ފަދަ ޕާކްތައް ހެދުމަށާއި، އެކިއެކި އިމާާރާތްކުރުމުގެ މަސައްކަތަށް. މި ހުރިހާ ކަމެއްވީ ވެސް ސިޔާސީ މަސްލަހަތާއި ގުޅިފައި ހުރި ކަންތައްތަކަށް، ގައުމީ ސަލާމަތާއި ގުޅުންހުރި ކަމަކަށް ނޫން" މާރިޔާ ވިދާޅުވިއެވެ.
އޭނާ ވިދާޅުވީ އަސްކަރިއްޔާގެ ބޭނުންކުރަން ހުރި އާލާތްތަކުގެ ތެރެއިން ގިނަ އާލާތްތަކެއް ވަނީ ބޭނުން ނުކުރެވޭ ވަރަށް ހަލާކުވެފައި ކަމަށެވެ. އަދި ކޯސްޓްގާޑުގެ އުޅަނދުފަހަރު އެލޯންގްސައިޑް ކުރާނެ ޕިއާއެއް ނެތިގެން އުޅަނދުތަކުގެ އިންޖީނު ހިންގާފައި ބަހައްޓަން ޖެހޭތީ، ހަރަދު ބޮޑުވާ ކަމަށާއި، އުޅަނދުތައް ރަނގަޅަށް ބެލެހެއްޓިފައިވާތީ އުޅަނދުތަކުގެ އުމުރު ކުރުވެފައިވާ ކަމަށެވެ.
"ހުރި މަދު އުޅަނދުފަހަރުގެ ތެރެއިން ގިނަ އުޅަނދުފަހަރު ވަނީ ހަލާކުވެ މަރާމާތު ކުރަން ޖެހިފައި. ޑިފެންސް މިނިސްޓަރުގެ ހައިސިއްޔަތުން އަޅުގަނޑު މަސައްކަތް ކުރަމުން މިދަނީ ކަންކަން ރަނގަޅު ކުރެވޭތޯ. ރަނގަޅު އުސޫލެއް ކަނޑައަޅާ ކަންކަން ތަރުތީބު ކުރަމުން. ޝަކުވާ ބެލޭނެ ނިޒާމެއް، ގްރީވެންސް މެކޭނިޒަމެއް އުފެއްދުން" މާރިޔާ ވިދާޅުވިއެވެ.
މީދޫ ދާއިރާގެ މެންބަރު ރޮޒައިނާ އާދަމް ކުރެއްވި ސުވާލަށް ޖަވާބު ދެއްވަމުން މާރިޔާ ވިދާޅުވީ މިހާތަނަށް އޭނާ ކުރެއްވި އެއްވެސް ކަމަކާއި އަދި ވާހަކައަކާއި ގުޅިގެން ސިފައިންގެ ސެކިއުރިޓީ ކައުންސިލުން އޭނާއާއި ސުވާލު ކުރައްވާފައި ނުވާ ކަމަށެވެ.
"އެބޭފުޅުންނަށް އިނގޭ ސްޓްރެޓެޖިކަލީ ކަންކަން ކުރައްވާނެ ގޮތް. އެމީހުންނަށް އިނގޭ މިދެންނެވިހެން ސަންޒޯ ބުންޏަސް ބާރުގަދަ ގައުމުތަކާއި ގުޅިގެން އެމީހުންގެ ކިބައިން ވެސް ބާރު ހޯދައިގެން އެ ބާރުގައި މީހުން ތިބެން. އެމީހުންނަށް އިނގޭ އެމީހުންގެ އަމިއްލަ ވިސްނުން. ކިޔަވައިގެން ތިބި ހޭލުންތެރި ހިތްވަރުގަދަ ސިފައިންތަކެއް އަޅުގަނޑުމެންގެ ތެރޭގައި ތިބީ. ބަޔަކު އެހެން ދައްކާ ވާހަކައަކަށް އެމީހުން ގުޑުގުޑެއް ނާޅާ" މާރިޔާ ވިދާޅުވިއެވެ.
އޭނާ ވިދާޅުވީ ގައުމުގެ ހަމަޖެހުން ނަގާލާ މިނިވަންކަމަށް ބުރޫއރާފަދަ ވާހަކަތައް ދަރުބާރުގޭގައި ބާއްވާ ޖަލްސާތަކުގައާއި ސޯޝަލް މީޑިއާގައި ދައްކަމުން ދާތީ އެކަމުގެ ކަންބޮޑުވުން ފާޅުކުރަމުންދާ ކަމަށެވެ. އަދި މިއީ ދިވެހިންގެ ތެރޭގައި އޮތް އެކުވެރިކަމާއި މިނިވަންކަން ނަގާލުމަށް ބަޔަކު ކުރާ މަސައްކަތެއް ކަމަށް މާރިޔާ ވިދާޅުވިއެވެ.
"އެގޮތުން ވިދާޅުވި ވޭތުވެދިޔަ ހަފްތާތެރޭގައި ދަރުބާރުގޭގައި ޖަލްސާކުރާ މާލަމުންނާއި، ސޯޝަލް މީޑިއާއިން ބޭކާރު ވާހަކަތަކެއް އަޑުއިވިގެން ހިނގައްޖެ ކަމަށް. އެބޭފުޅުން ކަންބޮޑުވުން ފާޅުކުރޭ އެބޭފުޅުން އެ ދައްކާ ވާހަކައިން. ދުނިޔެއަށް މިކަަލަ ބަދަލުތަކެއް އަންނަ ދުވަސް ވަރެއްގައި، ބައެއް ގައުމުތަކުގައި ހަނގުރާމަ ކުރަމުންދާ ދުވަސް ވަރެއްގައި މިކަހަލަ ވާހަކަތައް ދެއްކޭތީ" މާރިޔާ ވިދާޅުވިއެވެ.
މީގެ އިތުރުން "މިގައުމުން ބޭރުގެ އުދުވާނީ ފަރާތްތަކެއް ފައްސާލާވާހަކަ ވެސް އެބަ ދައްކާ، އެހެން ބުނީމަ ހީވަނީ އަޅުގަނޑުމެންގެ ގައުމު ހިފައިގެން ބޭރުގެ ބަޔަކު ތިބިހެން. މިތާކު ނުޖެހޭ ބަޔަކު ފައްސާލަން. މި ސުލްހަ ނަގާލާ ހަމަޖެހުން ނަގާލާ ރައްޔިތުންގެ ހިތްތަކުގައި ނަފްރަތާއި ބިރުވެރިކަން ވައްދާ، ރައްޔިތުންގެ މެދުގައި އޮންނަ އުހުވަންތަކަމާއި އަހުވަންތަކަން ނަގާލާ ބައިބައި ކުރުމުގެ ވިސްނުމުގައި ދައްކާ ހޮޅި ވާހަކަތަކެއް" މާރިޔާ ވިދާޅުވިއެެވެ.
އޭނާ ވިދާޅުވީ މިފަދަ ވާހަކަ ތައް ދައްކަނީ ކުރު މުއްދަތެއްގައި ސިޔާސީ މަންފާއެއް ހޯދުމަށްޓަކައި ކަމަށެވެ. އަދި މިއީ ވިސްނުންތެރިކަމެއް ނެތި ސިޔާސީ ފަރާތްތަކެއް ދައްކާ ބޭކާރު ވާހަކަތަކެއް ކަމަށާއި، ގައުމީވަންތަކަމާއި ގުޅުވައިގެންޖަހާ ސަކަރާތެއް ކަމަށެވެ.
