މީހަކަށް ޖިންސީ ފުރައްސާރަ ކުރި މައްސަލައެއްގައި ފިރިހެނަކު ހޯދަން ފުލުހުން އާންމުންގެ އެހީތެރިކަމަށް އެދެފިއެވެ.
އެ މީހާ މަގުމަތީގައި އުޅޭ މަންޒަރު ދައްކުވާދޭ ވީޑިއޯ އާންމުކޮށް ފުލުހުން ބުނީ، ވީޑިއޯ އިން ފެންނަ މީހާއަކީ ފެމިލީ އެންޑް ޗައިލް ޕްރޮޓެކްޝަންގެ ފެމިލީ އެންޑް ޖެންޑާ އެފެއަރޒްއިން ތަހުގީގު ކުރަމުންދާ ޖިންސީ ފުރައްސާރަކޮށްފައިވާކަމަށް ތުހުމަތުކުރެވޭ މައްސަލައަކާ ގުޅިގެން ހޯދަންބޭނުންވެ ކާކުކަން ދެނެގަނެވިފައިނުވާތީ ހޯދިފައިނުވާ މީހެއް ކަމަށެވެ.
އެހެންކަމުން ވީޑިއޯއިން ފެންނަ މީހާއާ ބެހޭ އެއްވެސް މަޢުލޫމާތެއް ލިބިފައިވާނަމަ ފެމިލީ އެންޑް ޖެންޑާ އެފެއާޒް ގެ ނަންބަރު 9790163 އަށް ގުޅާ ހިއްސާ ކުރުމަށް ވެސް އެދިފައި ވެއެވެ.
މީގެ ކުރިން ވެސް މިފަދަ އެކި މައްސަލަތަކުގެ ބޭނުމަށް މީހުން ހޯދުމަށް ފުލުހުން އާންމުންގެ ކިބައިން އެހީތެރި ކަމަށް އެދިފައި ވެއެވެ. އަދި އެފަދަ މައްސަލަތަކާ ގުޅޭ ސީސީޓީވީ ފޫޓޭޖްތައް ވެސް އާންމު ކުރަމުން ދެއެވެ.
ފަހަކަށް އައިސް ޖިންސީ ފުރައްސާރައިގެ މައްސަލަތައް މި މުޖްތަމައުގައި ދަނީ އާންމުވަމުންނެވެ. އަދި މިފަދަ މައްސަލަތަކުގައި އެކި މީހުން ހައްޔަރުކޮށް ކޯޓު މަރުހަލާވެސް ކުރިއަށް ދެއެވެ.
