ރާއްޖޭގެ މެޖިސްޓްރޭޓް ކޯޓުތަކަށް ކައިވެނިކޮށްދިނުމަށް އެދި ހުށަހަޅާ ފޯމާއެކު ދެ މީހުންގެ ތެލެސީމިއާ ކާޑު ނުވަތަ ޓެސްޓުގެ ނަތީޖާ ހުށަހެޅުން މާދަމާއިން ފެށިގެން އަމަލުކުރަން ފަށާ އާ ގަވާއިދުގެ ދަށުން މަޖުބޫރުކޮށްފިއެވެ.
މެޖިސްޓްރޭޓް ކޯޓުތަކުގެ އާ ގަވާއިދުގެ 83 ވަނަ މާއްދާއާ ހަވާލާދީ ކޯޓުތަކުން ނެރުނު އިއުލާންތަކުގައިވާ ގޮތުން، ކައިވެނިކުރަން އެދޭ ދެ މީހުން ތެލެސީމިއާއަށް ޓެސްޓުކޮށް އޭގެ ނަތީޖާ ހުށަހަޅަންޖެހޭނެއެވެ. ނަމަވެސް، ދެ މީހުންގެ ތެރެއިން އެކަކީ ތެލެސީމިއާ ވާރުތަކުރާ ގޮތް ނެތް (ނެގަޓިވް) މީހެއްކަން ކަށަވަރުވާނަމަ، ދެވަނަ މީހާގެ ޓެސްޓު ނަތީޖާ ހުށަހެޅުން ލާޒިމެއް ނުވާނެއެވެ.
މި ބަދަލަށް އަމަލުކުރަން ފެށުމާއެކު، މާދަމާއިން ފެށިގެން މެޖިސްޓްރޭޓް ކޯޓުތަކުން ކައިވެނިކޮށްދޭނީ މި ޝަރުތު ފުރިހަމަވާ ފޯމުތަކަށް އެކަންޏެވެ. މި ގަވާއިދުގެ މައިގަނޑު ބޭނުމަކީ ކައިވެނީގެ ކުރިން ތެލެސީމިއާ ކެރިއަރުން ދެނެގަނެ، ތެލެސީމިއާ މޭޖާ ކުދިން އުފަންވާ މިންވަރު މަދުކުރުން ކަމުގައިވާއިރު މީގެ ކުރިން ބައެއް ރަށްރަށުގައި މިކަމަށް އެކަށީގެންވާ ސަމާލުކަމެއް ނުދީ ފޯމު ހުށަހަޅަމުންދާކަން ކޯޓުތަކުން ވަނީ ފާހަގަކޮށްފައެވެ.
18 އަހަރުވީ ގާނޫނީ ހުސްކަމަކަށްފަހު އެކުލަވާލި މެޖިސްޓްރޭޓް ކޯޓުތަކުގެ އާ ގަވާއިދާއެކު، ކައިވެނިކޮށްދިނުމަށް އެދޭ ފޯމު ފުރިހަމަކުރުމުގައި ހަގީގަތާ ހިލާފު މައުލޫމާތު ނުވަތަ ދޮގު މައުލޫމާތު ދީފައިވާ ނަމަ، އެ ކައިވެނީގެ ފޯމު ބާތިލުކުރުމަށްފަހު، އެ މައްސަލަ ތަހުގީގުކުރުމަށް ކަމާބެހޭ ފަރާތަށް ކޯޓުން ފޮނުވަންވާނެކަމަށް ބަޔާންކޮށްފައިވެއެވެ.
