ރާއްޖެއަށް އިސްކަންދޭ ކަންކަން އީޖާދީ އަދި ދެމެހެއްޓެނިވި އުމްރާނީ ތަރައްގީއަށް ބަދަލުކުރުމުގައި ފައިނޭންސިން އާއި ފަންނީ ތަޖުރިބާ އަދި ބައިވެރިވުން މުހިއްމުކަމުގައި މިނިސްޓަރ އޮފް ފައިނޭންސް އެންޑް ޕަބްލިކް އެންޓަޕްރައިޒަސް ހަސަން ޒަރީރު ވިދާޅުވެއްޖެއވެެ،
މިނިސްޓަރު މިހެން ވިދާޅުވީ ދޯހާގައި ބޭއްވުނު އޭއައިއައިބީގެ 11 ވަނަ އަހަރީ ބައްދަލުވުމުގެ ތެރެއިން “އެނޭބްލިން އިންނޮވޭޝަން: އެޑިން ވެލިއު އަލޮންގް ދަ ޕްރޮޖެކްޓް ސައިކަލް” ނަމުގައި ބޭއްވި ގަވަނަރުންގެ ބިޒްނަސް ރައުންޑްޓޭބަލްގައި ވާހަކަފުޅު ދައްކަވަމުންނެވެ.
މިނިސްޓަރުގެ ވާހަކަފުޅުގައި، ދިވެހިރާއްޖޭގައި ތަރައްގީގެ މަޝްރޫއުތައް ހިންގުމުގައި މިހާރަށްވުރެ، ހަރުދަނާ އަދި ދެމެހެއްޓެނިވި ގޮތްތަކެއް އިހްތިޔާރުކުރުމުގެ މުހިންމުކަން ފާހަގަކުރެއްވިއެވެ. މީގެ އިތުރުން އީޖާދީ ގޮތްތައް ބޭނުންކުރުން އެކަނި މަޝްރޫއުތަކުގެ ޑިޒައިން ފޭސްއަށް ބަލައިގެން ނުނިމޭނެކަމަށާއި އޭގެ ބަދަލުގައި، ޕްލޭންކުރުމާއި، ޕްރޮކިއުމަންޓް، އަދި ދިގު މުއްދަތަކަށް އެ ތަންތަން ބެލެހެއްޓުމާއި އޮޕަރޭޓްކުރުމާ ހަމައަށް މުޅި މަޝްރޫއުގެ ތެރޭގައިވެސް އިނޮވޭޝަން ބޭނުންކުރަންޖެހޭކަން ފާހަގަކުރެއްވިއެވެ.
ކުދި ޖަޒީރާ ގައުމުތަކަށް ދިމާވާ ޖޯގްރަފީގެ ދަތިތަކުން އަރައިގަތުމަށްޓަކައި އޭއައިއައިބީ ފަދަ ބައިނަލްއަގްވާމީ މާލީ އިދާރާތަކުން ހާއްސަ މާލީ ވަސީލަތްތަކާއި ފަންނީ އެހީތެރިކަން ފޯރުކޮށްދިނުމަށް މިނިސްޓަރު އެދިވަޑައިގެންނެވިއެވެ.
އޭޝިއަން އިންފްރާސްޓްރަކްޗާ އިންވެސްޓްމަންޓް ބޭންކު (އޭއައިއައިބީ)ގެ ބޯޑް އޮފް ގަވަނަރުންގެ 11 ވަނަ އަހަރީ ބައްދަލުވުމުގައި ތަރައްގީވަމުން އަންނަ ގައުމުތަކުގެ ފައިނޭންސިން ފަރަގު ކުޑަކުރުމަށާ، އިއާދަކުރަނިވި ހަކަތައަށް ބަދަލުވުމަށާ، އުމްރާނީ ތަރައްގީގައި ޑިޖިޓަލް ވަސީލަތްތައް ބޭނުންކުރުމާ ބެހޭގޮތުން ފައިނޭންސް މިނިސްޓަރުންނާ، ބައިނަލްއަގްވާމީ ވިޔަފާރިވެރިން މަޝްވަރާކުރެއްވިއެވެ.
