މާލޭގެ އަމީނީމަގު މަރާމާތުކުރުމަށް ކުރިއަށްގެންދާ މަޝްރޫއުގެ ދަށުން، އެ މަގުގެ ދެވަނަ ސެގްމަންޓުގައި ތާރުއެޅުމުގެ މަސައްކަތް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ނިންމާލައިފިއެވެ.
މިކަމުގެ އެންމެ ފަހުގެ މައުލޫމާތު ހިއްސާކުރަމުން އެ ކުންފުނިން ބުނީ މި މަސައްކަތް ނިމުމާއެކު މާލޭގެ ރައްޔިތުންނަށް ދަތުރުފަތުރުކުރުމުގައި އިތުރު ލުއިފަސޭހަތަކެއް ލިބި، ގުޅިފައިވާ ފުރިހަމަ މަގުތަކެއްގެ ފައިދާ ކުރާނެކަމަށެވެ.
އަމީނީމަގުގެ ދެވަނަ ސެގްމަންޓް ހިމެނެނީ އިއްޒުއްދީން މަގުން ފެށިގެން ގިޔާސުއްދީން އިންޓަނޭޝަނަލް ސްކޫލާ ހަމައަށެވެ. މި ސަރަހައްދުގައި ކުރިން އަޅާފައިވާ ތާރުގަނޑު ނެގުމަށްފަހު، ސަބްގްރޭޑް އަދި އޭބީސީ ފަށަލައިގެ މަސައްކަތް ނިންމައި، އަލުން ދެ ފަށަލައަކަށް ތާރުއެޅުމުގެ މަސައްކަތް އެމްޓީސީސީން ވަނީ ކޮށްފައެވެ.
ތާރުއެޅުމުގެ މަސައްކަތް ނިމުނު ނަމަވެސް މަގުގައި ކުރަހަންޖެހޭ ނިޝާންތައް ކުރެހުމާއި ޔޫޓިލިޓީ ޖަންކްޝަންތައް މައްޗަށް ޖެއްސުން ފަދަ އެންމެ ފަހުގެ މަސައްކަތްތައް ކުރިއަށްދާނެ ކަމަށް އެމްޓީސީސީން ވަނީ ބުނެފައެވެ.
ޖުމްލަ 13 ސެގްމަންޓުގެ މައްޗަށް އެކުލެވޭ 1.79 ކިލޯމީޓަރުގެ އަމީނީމަގު އެންމެ ފުރަތަމަ ތަރައްގީކޮށް ނިންމީ 2024 ވަނަ އަހަރުގެ ޖެނުއަރީ މަހުގައެވެ. އެއީ 84.4 މިލިއަން ރުފިޔާ ހަރަދުކޮށްގެން ހިންގި މަޝްރޫއެކެވެ.
ނަމަވެސް ތާރުގަނޑު އެއްކޮށް ހިކުމުގެ ކުރިން ބަރު އުޅަނދުފަހަރު ދުއްވުމުގެ ސަބަބުން މަގުގެ ބޮޑު ބައެއް ހަލާކުވެ އަލުން މަރާމާތުކުރުމަށް އެމްޓީސީސީއާ ހަވާލުކުރީ މިއަހަރުގެ ޖޫން މަހުގެ 15 ގައެވެ.
ކޮންސްޓްރަކްޝަން މިނިސްޓްރީން ބުނި ގޮތުގައި މަގުގެ ހުޅަނގު ކޮޅު ވަރަށް ބޮޑަށް ހަލާކުވެފައިވަނީ އިންޖިނިއަރިން މައްސަލަތަކަކާއި، ތާރުގަނޑު އެއްކޮށް ހަރުނުވަނީސް ބަސް ފަދަ ބަރު އުޅަނދުތައް ދުއްވުމުގެ ސަބަބުންނެވެ. މިހާރު ކުރިއަށްދާ މަރާމާތުގެ މަސައްކަތްތައް ނިމުމުން، މަގުގެ ފެންވަރު ރަނގަޅުވެ، ދިގު މުއްދަތަކަށް ބޭނުންކުރެވޭނެ ކަމަށް އެ މިނިސްޓްރީން ބުނެފައިވެއެވެ.
