އޮގަސްޓު މަހުގެ ފުރަތަމަ ހަފުތާގައި ޔޫކްރެއިންގެ ވެރިރަށް ކީވްގެ އުޑުމަތިން ފެނުނީ ބިރުވެރި މަންޒަރެކެވެ. އަލްޖަޒީރާއިން ރިޕޯޓުކޮށްފައިވާ ގޮތުގައި، އޮގަސްޓު 1 ވަނަ ދުވަހު ކީވްއަށް ދިން ހަމަލާތަކުގައި ނުވަ މީހުން މަރުވިއިރު، އޮގަސްޓު 5 ވަނަ ދުވަހު 17 މީހުން ވަނީ މަރުވެފައެވެ. މިއީ ރަޝިޔާއިން ޔޫކްރެއިންގެ ސިޓީތަކަށް އަމާޒުކޮށް ފޮނުވާލި ބެލިސްޓިކް މިސައިލްތަކުގެ ސަބަބުން ލިބުނު ގެއްލުންތަކެވެ. ފާއިތުވި ހަފުތާގައި ރަޝިޔާއިން ފޮނުވާލި 51 'އިސްކަންދަރު-އެމް' ބެލިސްޓިކް މިސައިލްގެ ތެރެއިން ޔޫކްރެއިނަށް ވައްޓާލެވުނީ އެންމެ މިސައިލެކެވެ.
އަލްޖަޒީރާއިން ރިޕޯޓުކޮށްފައިވާ ގޮތުގައި، މިއީ ހަނގުރާމައިގެ މައިދާނުގައި ރަޝިޔާއަށް ކުރިމަތިވަމުންދާ ގޮންޖެހުންތަކާއި އެތެރޭގެ ހަކަތައިގެ މައްސަލަތަކަށް ދިން ރައްދެކެވެ. ޔޫކްރެއިންގެ އަސްކަރިއްޔާއާ ހަވާލާދީ އެ ނޫހުން ބުނެފައިވާ ގޮތުގައި، ޖުލައި މަހު އެކަނިވެސް ރަޝިޔާގެ 42،800 ސިފައިންނަށް ވަނީ ގެއްލުން ލިބިފައެވެ. މިއީ މިއަހަރުގެ ތެރޭގައި އެއް މަހެއްގައި ރަޝިޔާއަށް އެންމެ ބޮޑު ގެއްލުމެއް ލިބުނު ކަމަށް ކީވްއިން އަންދާޒާކުރި މަހެވެ.
ރަޝިޔާއިން މިހާރު ބޮޑަށް ބަރޯސާވަނީ ގްލައިޑް ބޮމާއި ބެލިސްޓިކް މިސައިލަށެވެ. ޔޫކްރެއިންގެ ޑިފެންސް މިނިސްޓްރީން ބުނި ގޮތުގައި، ޖުލައި މަހު ރަޝިޔާއިން ވަނީ 8،300 ގްލައިޑް ބޮން އަޅާފައެވެ. މިއީ ހަނގުރާމަ ފެށުނު ފަހުން އެއް މަހެއްގެ ތެރޭގައި އެންމެ ގިނައިން ބޮން އެޅި މަހެވެ. ބައެއް ބޮންތަކުގައި ތިން ޓަނުގެ ގޮވާތަކެތި ހުންނައިރު، މިއީ ޑްރޯން ބޭނުންކޮށްގެން ވައްޓާލަން އުނދަގޫ ބާވަތެއްގެ ބޮންތަކެކެވެ.
އަނެއްކޮޅުން، ޔޫކްރެއިނުން ދަނީ ޑްރޯން ބޭނުންކޮށްގެން ރަޝިޔާއަށް ބޮޑެތި ގެއްލުންތަކެއް ދެމުންނެވެ. ޔޫކްރެއިންގެ ރައީސް ވޮލޮޑިމިއަރ ޒެލެންސްކީ ވިދާޅުވި ގޮތުގައި، ޖުލައި މަހު ރަޝިޔާގެ ސިފައިންނަށް ލިބުނު ގެއްލުންތަކުގެ ތެރެއިން 30،272 ހާދިސާ ހިނގާފައިވަނީ ޑްރޯން ހަމަލާތަކުގެ ސަބަބުންނެވެ. ސެންޓަރ ފޯ ސްޓްރެޓީޖިކް އެންޑް އިންޓަނޭޝަނަލް ސްޓަޑީޒް (ސީއެސްއައިއެސް) އިން އަންދާޒާކުރާ ގޮތުގައި، 2026 ވަނަ އަހަރުގެ ފުރަތަމަ ހަފުތާގައި ރަޝިޔާއާއި ޔޫކްރެއިންގެ ގެއްލުމުގެ ނިސްބަތް ވަނީ 8:1 އަށް އުފުލިފައެވެ. މީގެ މައިގަނޑު ސަބަބަކީ ޔޫކްރެއިނުން ޑްރޯން ބޭނުންކުރާ މިންވަރު އިތުރުވުމެވެ.
ޔޫކްރެއިންގެ ގެއްލުންތަކާ ގުޅޭގޮތުން ޒެލެންސްކީ ފޮކްސް ނިއުސްއަށް ދެއްވި އިންޓަވިއުއެއްގައި ވިދާޅުވީ، ޔޫކްރެއިންގެ 450،000 މީހުންނަށް ގެއްލުންވެފައިވާއިރު، އޭގެ ތެރެއިން 50،000 މީހުންނަކީ މަރުވި މީހުން ކަމަށެވެ.
ޔޫކްރެއިނުން ވަނީ ރަޝިޔާގެ އެތެރެއަށް އަމާޒުކޮށް 40 ދުވަހުގެ ވައިގެ ހަމަލާތަކެއް ދީފައެވެ. މި ހަމަލާތަކުގައި ރަޝިޔާގެ 14 ތެޔޮ ސާފުކުރާ ކާރުހާނާއަކާއި، ގިނަ އަދަދެއްގެ ތެޔޮ ރައްކާކުރާ ތަންތަނަށް ވަނީ ގެއްލުންދީފައެވެ. ފައިނޭންޝަލް ޓައިމްސްގެ ދިރާސާއަކާ ހަވާލާދީ އަލްޖަޒީރާއިން ރިޕޯޓުކޮށްފައިވާ ގޮތުގައި، ޔޫކްރެއިނުން ވަނީ ރަޝިޔާގެ ތެޔޮ ސާފުކުރާ ގާބިލުކަމުގެ ތިންބައިކުޅަ އެއްބައި ހަލާކުކޮށްލާފައެވެ.
މި ހަމަލާތަކުގެ އަސަރު އެންމެ ބޮޑަށް ކޮށްފައިވަނީ ރަޝިޔާއިން ހިފާފައިވާ ކްރައިމިއާއަށެވެ. ޔޫކްރެއިނުން ކްރައިމިއާގެ 201 ކަރަންޓު ސަބްސްޓޭޝަނަކަށް ހަމަލާދީފައިވާއިރު، ކްރެމްލިންގެ އޮފިޝަލް ރޮޑިއޮން މިރޯޝްނިކް ވިދާޅުވި ގޮތުގައި ކްރައިމިއާގެ ކަރަންޓު ވިއުގަ އޮތީ ވަރަށް ނާޒުކު ފައްތަރެއްގައެވެ. އަދި ހުރިހާ ސަރަހައްދަކުން ކަރަންޓު ކެނޑުމުގެ މައްސަލަތައް ދިމާވެފައިވާ ކަމަށް އޭނާ ފާހަގަކުރެއްވިއެވެ.
ޔޫކްރެއިނުން މަހެއްގެ މައްޗަށް 10،000 ދުރު ރާސްތާ ޑްރޯން ފޮނުވާލައެވެ. މޮސްކޯގެ މޭޔަރު ސަރްގޭ ސޮބްޔާނިން ވިދާޅުވި ގޮތުގައި، ޖުލައި މަހު އެކަނިވެސް 6،225 ޑްރޯން މޮސްކޯއާ ދިމާއަށް އުދުހިފައިވެއެވެ.
މި ގެއްލުންތަކާއެކު، ރަޝިޔާއިން ހިފާފައިވާ ސަރަހައްދުތަކުގެ މިންވަރު ވަނީ ދަށަށް ގޮސްފައެވެ. ވޮޝިންޓަންގައި ހުންނަ އިންސްޓިޓިއުޓް ފޯ ދަ ސްޓަޑީ އޮފް ވޯ (އައިއެސްޑަބްލިއު) އިން އަންދާޒާކުރާ ގޮތުގައި، ޖުލައި މަހު ރަޝިޔާއަށް ހިފިފައިވަނީ ޔޫކްރެއިންގެ 37.85 އަކަކިލޯމީޓަރުގެ ސަރަހައްދެކެވެ. މިއީ 2025 ވަނަ އަހަރުގެ ޖުލައި މަހު ހިފި 455،000 އަކަކިލޯމީޓަރާ އަޅައިބަލާއިރު ކުޑަ މިންވަރެކެވެ.
މި ހަނގުރާމައިގައި ދެ ފަރާތަށްވެސް ބޮޑެތި ގެއްލުންތަކެއް ލިބެމުންދާއިރު، ޔޫކްރެއިންގެ ރައީސް ޒެލެންސްކީ ދަނީ އެމެރިކާއާއި ޔޫރަޕުގެ ގައުމުތަކުގެ ކިބައިން 'ޕޭޓްރިއަޓް' މިސައިލް ދިފާއީ ނިޒާމުތައް ފޯރުކޮށްދިނުމަށް އެދިވަޑައިގަންނަވަމުންނެވެ. ޒެލެންސްކީ ފާހަގަކުރެއްވި ގޮތުގައި، ގުދަންތަކުގައި ބަހައްޓާފައިވާ މިސައިލްތައް ބޭނުންކުރަންވީ މީހުންގެ ފުރާނަ ސަލާމަތްކުރުމަށެވެ.
