ބޮލުން ހަން ފޮޅުމަކީ ނުވަތަ "ޑެންޑްރަފް" އަކީ ވަރަށް ގިނަ ބަޔަކަށް ދިމާވާ، އުނދަގޫ ބޮޑު މައްސަލައެކެވެ. މިއީ ހަމައެކަނި ބޮލުގެ ހަންގަނޑަށް ދިމާވާ ކަމެއް ނޫނެވެ. މީގެ ސަބަބުން މީހާގެ އަމިއްލަ ނަފްސަށް އޮންނަ އިތުބާރު ކުޑަވެ އިޖުތިމާއީ ގުޅުންތަކަށް ވެސް ބައެއް ފަހަރު ބުރޫއަރައެވެ. ބޮލުން ހަން ފޮޅުމަކީ އެކި ސަބަބުތަކާ ހުރެ ދިމާވާ ކަމަކަށް ވާއިރު މިކަމުން ސަލާމަތްވުމަށްޓަކައި ސަމާލުވާންޖެހޭ މުހިންމު ކަންތައްތަކެއް ހުރެއެވެ.
ބޮލުން ހަން ފޮޅުމަށް ދިމާވާ ސަބަބުތަކަކީ ކޮބައިކަން ދެނެގަތުމަކީ މި މައްސަލައަށް ދާއިމީ ހައްލެއް ހޯދުމަށްޓަކައި އެންމެ މުހިންމު ފިޔަވަޅެވެ. ސިއްހީ މާހިރުން ފާހަގަކުރައްވާ ގޮތުގައި ބޮލުން ހަން ފޮޅުމަށް ދިމާވާ އެންމެ އާންމު އެއް ސަބަބަކީ ބޮލުގެ ހަންގަނޑުގައި އުފެދޭ 'މަލަސޭޒިއާ' ކިޔާ ފަންގަސްއެކެވެ.
މި ފަންގަސްއަކީ އާންމުކޮށް ހުރިހާ ބޮޑެތި މީހުންގެ ބޮލުގައި ވެސް ހުންނަ އެއްޗެކެވެ. ނަމަވެސް ބައެއް މީހުންގެ ބޮލުގައި މި ފަންގަސް މާ ބޮޑަށް އިތުރުވެ ހަންގަނޑު ހިރުވާ އާދަޔާ ހިލާފަށް ހަން ފޮޅެން މެދުވެރިވަނީއެވެ.
ދެވަނަ ސަބަބަކީ 'ސެބޮރިކް ޑާމަޓައިޓިސް' އެވެ. މިއީ ބޮލުގެ ހަންގަނޑު މާ ބޮޑަށް ތެޔޮވެ، ރަތްވެ، ތެޔޮ ހުދު ނުވަތަ ރީނދޫ ކުލައިގެ ހަންތަކެއް ފޮޅޭ ހާލަތެކެވެ. މި މައްސަލަ ހަމައެކަނި ބޮލަކަށް ނޫނެވެ. ބައެއް ފަހަރު ކަންފަތް ކައިރިއާއި، ބުމައާއި، ނޭފަތުގެ ދެފަރާތަށް ވެސް މީގެ އަސަރު ކުރެއެވެ. މީގެ އިތުރުން ބޮލުގެ ހަންގަނޑު އިންތިހާއަށް ހިކުމަކީ ވެސް ހަން ފޮޅުމަށް ދިމާވާ ސަބަބެކެވެ. ހާއްސަކޮށް ފިނި މޫސުމުގައި ނުވަތަ މާ ބޮޑަށް އޭސީ ކޮށްފައި ހުންނަ ތަންތަނުގައި ގިނައިރު އުޅުމުން ހަންގަނޑު ހިކި ކުދިކުދި ހުދު ކުލައިގެ ހަންތައް ފޮޅެން ފަށައެވެ.
ބޮލުން ހަންފޮޅޭނަމަ މާ ގިނައިން ބޯ ދޮއުމަކީ ގޯހެއް
އެންމެ ފުރަތަމަ ކަމަކަށް ބޮލުގެ ހަންގަނޑުގެ ސާފުތާހިރުކަމަށް އިންތިހާއަށް ސަމާލުކަން ދޭންޖެހެއެވެ. ބޮލުން ހަން ފޮޅޭނަމަ މާ ގިނައިން ބޯ ދޮވުމަކީ ވެސް މައްސަލައެކެވެ. ހަންގަނޑު މާ ބޮޑަށް ތެޔޮވުމަކީ ހަން ފޮޅުމަށް މަގުފަހިވާ ކަމަކަށް ވުމުން ހަފްތާއަކު މަދުވެގެން ދެތިން ފަހަރު އެކަށީގެންވާ ޝޭމްޕޫއެއް ބޭނުންކޮށްގެން ބޯ ދޮންނަންވާނެއެވެ. ނަމަވެސް މާ ގިނައިން ބޯ ދޮވުމުން ހަންގަނޑު ހިކި މައްސަލަ އިތުރަށް ގޯސްވެދާނެކަން ހަނދާނުގައި ބަހައްޓަންޖެހެއެވެ.
ދެން ހަން ފޮޅުމާ ދެކޮޅަށް ތައްޔާރުކޮށްފައިވާ 'އެންޓި-ޑެންޑްރަފް' ޝޭމްޕޫއެއް ބޭނުންކުރުން މުހިންމެވެ. މިފަދަ ޝޭމްޕޫތަކުގައި ހިމެނޭ 'ޒިންކް ޕައިރިތިއޯން'، 'ސެލީނިއަމް ސަލްފައިޑް' ނުވަތަ 'ކީޓޯކޮނަޒޯލް' ފަދަ މާއްދާތަކަކީ ބޮލުގައި އުފެދޭ ފަންގަސްއާ ދެކޮޅަށް މަސައްކަތްކޮށް ހަން ފޮޅުން ކުޑަކޮށްދޭ މާއްދާތަކެކެވެ.
މީގެ އިތުރުން ބޮލުގައި ލާ ޖެލް، ސްޕްރޭ ނުވަތަ ތެޔޮ ފަދަ ތަކެތި ބޭނުންކުރުން މަދުކުރަންޖެހެއެވެ. ސަބަބަކީ މިފަދަ ތަކެތި ބޮލުގެ ހަންގަނޑުގައި ހަރުލާފައި ހުރުމުން ހަންގަނޑުގެ ބޯޅަވަޅުތައް ބެދި އިތުރަށް ހަން ފޮޅުމަށް މެދުވެރިވާތީއެވެ.
ހަންފޮޅުން ކުޑަކުރުމަށް ކެއުމުގެ އާދަތަކަށްވެސް ބަދަލު ގެންނަން ޖެހޭ
ކެއިންބުއިމުގެ އާދަތަކަށް ބަދަލު ގެނައުމަކީ ވެސް މި މައްސަލައަށް އޮތް ހައްލެކެވެ. ހަކުރު ގިނަ ކާނާއާއި ކިރުގެ ބާވަތްތައް މާ ގިނައިން ބޭނުންކުރުމަކީ ބައެއް މީހުންގެ ބޮލުން ހަން ފޮޅުން އިތުރުވާ ކަމެކެވެ. މީގެ ބަދަލުގައި ޒިންކް، ބީ ވިޓަމިންސް އަދި ބައެއް ފައިދާހުރި ފެޓްސް ހިމެނޭ ކާނާ ބޭނުންކުރުމުން ހަންގަނޑުގެ ދިރުން ދަމަހައްޓައިދެއެވެ. އަދި ގިނައިން ފެން ބުއިމަކީ ހަންގަނޑު ހިކުނަނުދީ ތާޒާކަންމަތީ ބެހެއްޓުމަށް އެހީތެރިވެދޭނެ ކަމެކެވެ.
މީގެއިތުރުން ނަފްސާނީ ދުޅަހެޔޮކަމަކީ ވެސް މިކަމާ ގުޅިފައިވާ ކަމެކެވެ. ދިރާސާތަކުން ދައްކާ ގޮތުގައި މާ ބޮޑަށް ފިކުރުބޮޑުވެ ސްޓްރެސްވުމަކީ ހަށިގަނޑުގެ ދިފާއީ ނިޒާމަށް ބާރުބޮޑުވެ ހަންގަނޑުގެ މައްސަލަތައް އިތުރުވާ ކަމެކެވެ. އެހެންކަމުން ހަމަ ނިދި ހޯދުމާއި ހާސްކަން ކުޑަކުރުމަށް މަސައްކަތް ކުރުމަކީ ބޮލުން ހަން ފޮޅުމުގެ މައްސަލައަށް ލިބޭނެ ލުޔެކެވެ.
މިކަމަށް އޮތް ގުދުރަތީ ފަރުވާތަކަށް ބަލާއިރު، ކޮކޮނަޓް އޮއިލް ނުވަތަ ޓީ-ޓްރީ އޮއިލް ބޭނުންކުރުމަކީ ބައެއް މީހުންނަށް ވަރަށް ބޮޑު ކުރިއެރުމެއް ލިބޭ ކަމެކެވެ. މި ތެޔޮތަކުގައި ހިމެނޭ އެންޓި-ބެކްޓީރިއަލް ސިފަތަކުގެ ސަބަބުން ހަންގަނޑު ހިރުވުމާއި ދުޅަވުން ކުޑަކޮށްދެއެވެ. ނަމަވެސް މިފަދަ އެއްޗެއް ބޭނުންކުރުމުގެ ކުރިން އަމިއްލަ ހަންގަނޑާ ގުޅޭތޯ ބެލުމަކީ ބުއްދިވެރި ކަމެކެވެ.
ބޮލުން ހަން ފޮޅުމަކީ އެކަށީގެންވާ ފަރުވާއާއި ސަމާލުކަން ދީފިނަމަ ކޮންޓްރޯލް ކުރެވިދާނެ ކަމެކެވެ. މަތީގައި ބަޔާންކުރެވުނު ކަންތައްތަކަށް އަމަލުކުރުމުން ވެސް އެދެވޭ ބަދަލެއް ނާންނަނަމަ ނުވަތަ ބޮލުގެ ހަންގަނޑު ރަތްވެ ފާރުވާނަމަ ލަސްނުކޮށް ހަމުގެ ބަލިތަކަށް ހާއްސަ ޑޮކްޓަރެއްގެ ލަފާ ހޯދަންވާނެއެވެ. ސާފުތާހިރުކަމާއި ރަނގަޅު އާދަތަކަކީ މި މައްސަލައިން މިންޖުވުމަށް އޮތް އެންމެ ކުރު މަގެވެ.
