އެޗްޑީސީ އަދި އެފްޑީސީ ގުޅިގެން ހުޅުމާލޭ ފޭސް 2 ގައި ގާއިމްކޮށްފައިވާ "އަމާން" އުދަރެސް ފްލެޓުތަކުގައި ދިރިއުޅޭ ފަރާތްތަކަށް ހާއްސަކޮށްގެން މިއަދު ހަވީރު ކޮމިއުނިޓީ ރޯދަ ވީއްލުމެއް ބޭއްވައިފިއެވެ.
ކުޑަކުދިންނަށް ހާއްސަ ކުޅިވަރުތައް ވެސް ހިމެނޭ ގޮތަށް ކުރިއަށްގެންދިޔަ މި ރޯދަ ވީއްލުން މިއަދި ބާއްވާފައިވަނީ ހަވީރު 05:00 އިން ފެށިގެން 06:45 އަށް، ހުޅުމާލޭ ފޭސް 2 ގެ ދުނބުރިގަސް މަގު (އުދަރެސް ޓަވަރު 11 އަދި 13 ކުރިމަތީ) ގައެވެ.
އެޗްޑީސީއާއި ހުޅުމާލޭގައި ދިރިއުޅޭ ރައްޔިތުން ގުޅިގެން "އަވައްޓެރި ރޯދަ ވީއްލުން" ނަމުގައި، ހުޅުމާލޭގެ އެކި ސަރަހައްދުތަކުގައި މިދިޔަ އަހަރުވެސް ވަނީ ރޯދަ ވީއްލުންތަކެއް ބާއްވާފައި ވެއެވެ.
އެގޮތުން މި އަހަރުވެސް މި ހަރަކާތް ކުރިއަށް ގެންދަން އެޗްޑީސީން ނިންމާފައިވާ އިރު، މިއަދު ކުރިއަށް ގެންދިޔަ ރޯދަ ވީއްލުމަކީ މިފަދަ ފުރަތަމަ ރޯދަ ވީއްލުމެވެ. އަދި ރޯދަ މަހުގެ ބާކީ އޮތް ދުވަސްތަކުގައި ހުޅުމާލޭގެ އެހެން ސަރަހައްދުތަކުގައި ރޯދަ ވީއްލުން ބޭއްވުމަށް ވަނީ ނިންމާފައެވެ.
ހުޅުމާލޭގެ އެކި ސަރަހައްދުތަކަށް ބަހާލައިގެން ހުޅުމާލޭގެ ރައްޔިތުންނާއި އެޗްޑީސީ އަދި ނެއިބަހުޑް ޕޮލިސް ގުޅިގެން ކުރިއަށްގެންދާ "އަވައްޓެރި ރޯދަ ވީއްލުން" ހަރަކާތުގެ މަގްސަދަކީ ދިވެހިންގެ މެދުގައި ޒަމާނުއްސުރެ އޮންނަ އެކުވެރިކަމާއި އެއްބައިވަންތަކަން އާލާކޮށް ދިރުވުމެވެ.
އެޗްޑީސީގެ އަމާޒަކީ ކުރިއަށް އޮތްތަނުގައި ވެސް ހުޅުމާލޭގެ ރައްޔިތުންނާ ގުޅިގެން މިފަދަ ގިނަ ހަރަކާތްތަކެއް ކުރިއަށް ގެންދިއުން ކަމަށް ބުނެއެވެ. އަދި ހުޅުމާލެއަކީ ގުޅުން ބަދަހި ރައްޔިތުން ދިރިއުޅޭ ހިތްފަސޭހަ ތަނަކަށް ހެދުމަށް މަސައްކަތް ކުރާ ކަމަށް އެ ކުންފުނިން ބުނެއެވެ.
