ޕާން ބޯކިބާއަކީ ދިވެހި އާއިލާތަކުގެ މެދުގައި ވަރަށް މަގުބޫލު، ފަސޭހައިން ތައްޔާރުކޮށްލެވޭ ފޮނި ކާއެއްޗެކެވެ. މިއީ ހަވީރު ސަޔަށާއި، ހާއްސަކޮށް ރޯދަމަހުގެ ސުފުރާމަތިން އާންމުކޮށް ފެންނަ ކުދިބޮޑު އެންމެންނަށްވެސް މީރު ބޯކިބާއެކެވެ. ގޭގައި ހުންނަ އާދައިގެ ސާމާނު ބޭނުންކޮށްގެން ވަރަށް އަވަހަށް މިއީ ތައްޔާރުކޮށްލެވޭނެ އެއްޗެކެވެ.
ބޭނުންވާ ތަކެތި:
- ޕާން
- 1 ދަޅު ގެރިކިރު
- 4 ބިސް
- 1 ސައިސަމުސާ ވެނީލާ އެސެންސް
- 2 ސައިސަމުސާ ފިނިފެން
- 2 ސަމުސާ ކާނާ ތެޔޮ ނުވަތަ ގީ
- ކުޑަ ހަކުރުކޮޅެއް (ފޮނިމިން އިތުރުކުރަން ބޭނުންނަމަ)
ތައްޔާރުކުރާނެ ގޮތް:
ފުރަތަމަ ޕާންތަކުގެ އަރިމަތީގައި ހުންނަ މުށިކުލައިގެ ހަރު ބައިތައް ނައްޓާލުމަށްފަހު، ޕާންތައް ކުދިކޮށް ކޮށާލާށެވެ. އެއަށްފަހު، ކޮށާފައި ހުރި ޕާންކޮޅު ފެނަށް އަޅައި މަޑުވުމުން، އޭގެ ތެރޭގައި ހުރި ފެންފޮދު އަތުން ރަނގަޅަށް ފިއްތާލާށެވެ.
ދެން ވަކި ތައްޓެއްގައި ބިހާއި ގެރިކިރު ރަނގަޅަށް މިކްސް ކޮށްލާށެވެ. މި މިކްސްޗަރުގެ ތެރެއަށް ވެނީލާ އެސެންސް އަދި ފިނިފެން އެއްކޮށްލާށެވެ. އިތުރަށް ފޮނިކުރަން ބޭނުންނަމަ ކުޑަ ހަކުރުކޮޅެއްވެސް މިވަގުތު އެއްކުރެވިދާނެއެވެ. އެއަށްފަހު ފެން ފިއްތާފައި ހުރި ޕާންކޮޅާއި ބިސް މިކްސްޗަރު އެއްކޮށްލާށެވެ. މިކްސްޗަރު މާ ބޯ ނަމަ ކުޑަ ކިރުފޮދެއް ނުވަތަ ފެންފޮދެއް އެއްކޮށްލައިގެން އޮމާންކޮށްލާށެވެ.
ބޯކިބާ ފިހަން ބޭނުންކުރާ ތަށީގައި ކުޑަ ތެޔޮކޮޅެއް ނުވަތަ ގީ އުނގުޅާލުމަށްފަހު، ތައްޔާރުކުރި މިކްސްޗަރު އޭގެ ތެރެއަށް އޮއްސާލާށެވެ. އަވަން 180 ޑިގްރީ ސެލްސިއަސްއަށް ހޫނުކުރުމަށްފަހު، ބޯކިބާގެ މަތީބައި ރަން މުށިކުލަ އަރަންދެން ފިހެލާށެވެ. އާންމުކޮށް މިކަމަށް 30 އާއި 40 މިނެޓާ ދެމެދުގެ ވަގުތެއް ނަގާނެއެވެ.
ބޯކިބާ ފިހެވުމުން އަވަނުން ނަގަގާ ހިހޫވުމުން ބޭނުންވާ ސައިޒަކަށް ބުރިކޮށްލާށެވެ. މިހާރު މިވަނީ މީރު ޕާން ބޯކިބާ ތައްޔާރުވެފައެވެ.
