ބޭހުގެ ފެންވަރު ރަނގަޅު ވަނީ ވަކި ގައުމަކުން ނުވަތަ ބައްރަކުން ގެނައުމުން ނޫން ކަމަށް ހެލްތު މިނިސްޓަރު އަބްދުﷲ ނާޒިމް ވިދާޅުވެއްޖެ އެވެ.
ވަކި ގައުމަކަށް ބަރޯސާ ނުވެ ޔޫރަޕުން ބޭސް އެތެރެކުރުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވައުދުފުޅެކެވެ.
އާދައިގެ ބޭސް ރާއްޖެ ގެނައުން ނިމުމަކަށް ގެނެސް ސީދާ އުފައްދާ ތަނުން ރާއްޖެ އަށް ބޭސް އެތެރެކުރާ ގޮތަށް ބަދަލުކުރާނެކަން ރައީސް އިއުލާން ކުރެއްވީ 2024 ވަނަ އަހަރު ޗައިނާ އަށް ކުރެއްވި ދަތުރުފުޅަށްފަހު ރާއްޖެ ވަޑައިގެން ނޫސްވެރިންނާ ވާހަކަދައްކަވަމުންނެވެ.
އަދި އެ ގައުމުތަކުން އާސަންދައިގެ ދަށުން ބޭސްފަރުވާކުރެވޭނެ އިންތިޒާމު ހަމަޖައްސާނެ ކަމަށް ވެސް އެމަނިކުފާނު ވިދާޅުވިއެވެ. އަދި ހަމަ އެ އަހަރު ޔޫރަޕު ކޮލިޓީގެ 7 ބޭހެއް ގެނެސް، އެސްޓީއޯއިން ވިއްކަން ވެސް ފަށާފައި ވެއެވެ.
މިއަދު ހެލްތު މިނިސްޓްރީން ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ނޫސްވެރިއަކު ކުރެއްވި ސުވާލަށް ޖަވާބު ދެއްވަމުން ނާޒިމް ވިދާޅުވީ، ބޭހުގެ ފެންވަރު ރަނގަޅުވަނީ ޔޫރަޕުގައި އުފައްދައިގެން ނޫން ކަމަށާއި ބޭސް އުފައްދާ ގައުމު ނުވަތަ ބައްރަކަށް ބެލުމަށް ވުރެ މުހިންމީ ބޭހުގެ ކޮލިޓީ ކަށަވަރުކުރުން ކަމަށެވެ.
އަދި ކޮލިޓީ ރަނގަޅު ބޭސް އިންޑިއާއި ބަންގްލަދޭޝްގައި ވެސް އުފައްދާކަން ފާހަގަ ކުރައްވާ މިނިސްޓަރު ވިދާޅުވީ، ކޮލިޓީ ބަލާ މިންގަނޑުތަކާއި އުސޫލުތަކެއް ހުންނަ ކަމަށެވެ. "މީގައި މުހިންމީ އުފައްދާ ތަނެއް، އުފައްދާ ގައުމެއް ނޫން ކަންނޭނގެ، އޭގެ ކޮލިޓީ ކަށަވަރު ކުރެވޭ، ރަނގަޅު ބޭސް އަޅުގަނޑުމެންނަށް ލިބޭނެކަން ކަށަވަރުކުރުން." ނާޒިމް ވިދާޅުވިއެވެ.
ފަހަކަށް އައިސް ރާއްޖޭގައި ލިބެން ހުންނަ ބައެއް ބޭސްތަކުގެ ފެންވަރު ދަށްވެ، ގެއްލުން ހުރި މާއްދާތައް އެކުލެވޭ ބައެއް ބޭސްތައް ވެސް ކަމާބެހޭ ފަރާތްތަކުގެ ސަމާލުކަމަށް އައިސްފައިވެ އެވެ. ކުޑަކުދިންނަށް ދިނުމަށް ބޭނުންކުރާ ކެއްސާތީ ބޯ ބޭސްތަކަކުން ވެސް ވިހަ މާއްދާތަކެއް އަޅާފައިވާ ބޭސްތަކެއް ފެނި އެ ބޭސްތައް ވިއްކުން ރާއްޖޭގައި މަނާކޮށްފައި ވެއެވެ.
އާންމުކޮށް ބޭނުންކުރަމުންދާ ބޭހެއްކަމަށްވާ ޕެނަޑޯލްގެ ރައްކާތެރިކަމާ މެދު ޝައްކުކުރެވޭ ފަދަ ކަންތައްތަކެއް ފެނުމާ ގުޅިގެން ރާއްޖެއަށް އެ ބޭސް އެތެރެކުރުމާއި ވިއްކުމާއި ބޭނުންކުރުން ވެސް އެއްދުވަސްވަރެއްގައި މަނާކޮށްފައި ވެއެވެ. ރާއްޖެއަށް ބޭސް އެތެރެކުރަނީ އެމްއެފްޑީއޭ އިން ނެރެފައިވާ، އެޕްރޫވްޑް ޑްރަގް ލިސްޓުގައިވާ ބޭސްތައް، ހަމަ އެ ޕެކިންގަ އެވެ. އެ ލިސްޓުގައިވާ ގޮތުން ރާއްޖެއަށް 1،600 އަށް ވުރެ ގިނަ ބޭސް އެތެރެކުރުމަށް ހުއްދަދީފައި ވެ އެވެ.
