ސްރީލަންކާގެ ކަނޑުގެ ސަރަހައްދުން ބޭރުން އީރާނުގެ އަސްކަރީ މަނަވަރަކަށް ހަމަލާދީ އެމެރިކާއިން އެ މަނަވަރު ފައްތާލައިފިއެވެ.
ލަންކާ ސަރުކާރާ ހަވާލާދީ ބޭރުގެ ނޫސްތަކުގައި ރިޕޯޓުކޮށްފައިވާ ގޮތުން މި ހާދިސާގައި 32 ފަޅުވެރިއަކަށް އަނިޔާވެފައިވާއިރު އެ ފަރާތްތައް ވަނީ ސަލާމަތްކޮށްފައެވެ. އަދި މަރުވެފައިވާ ބައެއް މީހުންގެ ހަށިތައްވެސް ފެނިފައިވާކަމަށް ވަނީ ރިޕޯޓުކޮށްފައެވެ.
އެމެރިކާގެ ޑިފެންސް ސެކްރެޓަރީ ޕީޓް ހެގްސެތު ވިދާޅުވި ގޮތުގައި، ބައިނަލްއަގުވާމީ ކަނޑުގެ ސަރަހައްދުން ސްރީލަންކާއާ ދުރުން ދަތުރުކުރަމުންދިޔަ އީރާނުގެ މި މަނަވަރު ފައްތާލާފައިވަނީ އެމެރިކާގެ ސަބްމެރީނަކުން ދިން ޓޯޕިޑޯ ހަމަލާއެއްގައެވެ.
ބުދަ ދުވަހު ޕެންޓަގަންގައި ބޭއްވި ނޫސްވެރިންގެ ބައްދަލުވުމެއްގައި ހެގްސެތު ވިދާޅުވީ، މިއީ ދެވަނަ ބޮޑު ހަނގުރާމައަށްފަހު ދުޝްމަނުންގެ އުޅަނދަކަށް މިފަދަ ހަމަލާއެއް ދިން ފުރަތަމަ ފަހަރު ކަމަށެވެ. ލަންކާ ސަރުކާރުން ބުނި ގޮތުގައި މި ހާދިސާ ހިނގާފައިވަނީ އެ ގައުމުގެ ކަނޑުގެ ސަރަހައްދީ ރޮނގުން ބޭރުގައެވެ.
މި ހާދިސާއާއި ގުޅިގެން ސްރީލަންކާގެ ޑެޕިއުޓީ ފޮރިން މިނިސްޓަރު އެ ގައުމުގެ މީޑިއާތަކަށް މައުލޫމާތު ދެއްވަމުން ވިދާޅުވީ، މި ހަމަލާގައި މަދުވެގެން 80 މީހުން މަރުވެފައިވާ ކަމަށް ބެލެވޭ ކަމަށެވެ.
ލަންކާގެ ދެކުނުގެ ރަށެއް ކަމަށްވާ ގާލީއާ ގާތްގަނޑަކަށް 40 ނޯޓިކަލް މޭލު (75 ކިލޯމީޓަރު) ބޭރުން ދަތުރުކުރަމުންދިޔަ އީރާނުގެ "IRIS Dena" މަނަވަރުން އެހީއަށް އެދި ގޮވާފައިވަނީ ބުދަ ދުވަހުގެ ހެނދުނު 6:00 އާއި 7:00 އާ ދެމެދުގައި ކަމަށާއި، މި މަނަވަރުގައި ގާތްގަނޑަކަށް 180 ފަޅުވެރިން ތިބިއިރު، އެ މީހުން ހޯދުމުގެ މަސައްކަތް ލަންކާގެ ކަމާބެހޭ ފަރާތްތަކުން ކުރަމުންދާކަމަށް ބޭރުގެ ނޫސްތަކުގައި ރިޕޯޓުކޮށްފައިވެއެވެ.
މި މަނަވަރަކީ މިދިޔަ މަހު އިންޑިއާގެ ވިޝާކަޕަޓްނަމްގައި ބޭއްވި "އިންޓަނޭޝަނަލް ފްލީޓް ރިވިއު 2026" ގައި ބައިވެރިވުމަށްފަހު އެނބުރި އީރާނަށް ދަތުރުކުރަމުންދިޔަ އުޅަނދެއްކަމަށާއި، މަނަވަރަށް ދިމާވި ހާދިސާގެ މައުލޫމާތު ލިބުމާއެކު، ސަރުކާރުން ވަނީ އެހީތެރިކަން ފޯރުކޮށްދިނުމަށް ކަނޑުގެ ސިފައިންގެ އުޅަނދުތަކާއި ވައިގެ ސިފައިންގެ ބޯޓުތައް އެ ސަރަހައްދަށް ފޮނުވާފައިކަމަށް ސްރީލަންކާގެ ފޮރިން މިނިސްޓަރު ވިޖިތަ ހެރާޕަތު ވަނީ ވިދާޅުވެފައެވެ.
