މެދުއިރުމަތީގެ ހަނގުރާމައިގެ ސަބަބުން މިއަދު ރާއްޖެއަށް އަންނަން ޝެޑިއުލްކޮށްފަ އޮތް 53 ފްލައިޓުން 18 ފްލައިޓް ކެންސަލްކޮށްފައިވާކަމަށް މިނިސްޓާ އޮފް ޓްރާންސްޕޯޓް އެންޑް ސިވިލް އޭވިއޭޝަން މުހައްމަދު އަމީން ވިދާޅުވެއްޖެއެވެ.
މިނިސްޓާ މިހެން ވިދާޅުވެފައިވަނީ މިއަދު މެންދުރުފަހު ކުރިއަށް ދިޔަ ނޫސްވެރިންގެ ބައްދަލުވުމުގައި މެދުއިރުމަތީގެ ހަނގުރާމައިގެ ސަބަބުން ދިވެހިރާއްޖޭގެ ޓްރާންސްޕޯޓް އެންޑް ސިވިލް އޭވިއޭޝަންއަށް ކުރިމަތިވަމުންދާ ގޮންޖެހުންތަކާ ބެހޭގޮތުން ވާހަކަ ދައްކަމުންނެވެ.
މިނިސްޓާ ވިދާޅުވީ މެދުއިރުމައްޗަކީ ދިވެހިރާއްޖެއަށް އެންމެ ގިނަ އެއާ ކަނެކްޓިވިޓީ އޮތް، އަދި އެންމެ ގިނަ ޓުއަރިސްޓުން މެދުއިރުމަތީ މަގުން ރާއްޖެ އަންނަ ހަބެއްގެ ގޮތުގައި އޮތުމުން، މެދުއިރުމަތީގެ ހަނގުރާމައިގެ އިމްޕެކްޓް ރާއްޖެއަށް ކުރަމުންދާ ކަމަށެވެ. އެގޮތުން ޑުބާއީ، އަބޫދާބީ، ދޯހާ، ޝާރްޖާ، އަދި ބަހްރައިން ހިމެނޭހެން ރާއްޖެ އަންނަން މިއަދު އޮތް 18 ފްލައިޓް ކެންސަލްވެފައިވާކަމަށް މިނިސްޓަރު ވިދާޅުވިއެވެ. މެދުއިރުމަތީގެ ހަމަނުޖެހުންތަކާއެކު މިދިޔަ މަހުގެ 28 ވަނަ ދުވަހުން ފެށިގެން ކޮންމެ ދުވަހަކުވެސް ޝެޑިއުލްކޮށްފަ ހުރި އެތަކެއް ފްލައިޓްތަކެއް ކެންސަލް ވަމުން ދިއުމަކީ މިދާއިރާއަށް ހުރި ވަރަށް ބޮޑު ގޮންޖެހުމެއް ކަމަށް މިނިސްޓަރު ފާހަގަ ކުރެއްވިއެވެ.
މެދުއިރުމަތީގެ ހާލަތް ގޯސްވުމުގެ ކުރިން ރާއްޖެ އައިސް ތިބި ދަތުރުވެރިންގެ ތެރެއިން ނުފުރި ތިބި މީހުންގެ ވާހަކައަށް އަލިއަޅުވާލައި މިނިސްޓަރު ވިދާޅުވީ ނުފުރި 300 އަށް ވުރެއް ގިނަ ފަތުރުވެރިން މިހާރުވެސް ރާއްޖެގައި ތިބިކަމަށެވެ. މީގެތެރެއިން ސަރުކާރުން ހަމަޖައްސައިގެން އެއާޕޯޓުގައި ގާއިމުކޮށްފައިވާ ފެސިލިޓީޒް ތަކުގައި 100 އަށްވުރެއް ގިނަ ފަތުރުވެރިން ތިބިކަމަށްވެސް މިނިސްޓަރު ފާހަގަ ކުރެއްވިއެވެ.
މިނިސްޓަރު ވިދާޅުވީ މިއަދުގެ ހާލަތައް ބަލާއިރު، މެދުއިރުމަތީގެ އެއާސްޕޭސްގައި ލިމިޓެޑް ކޮމާޝަލް ފްލައިޓްގެ އޮޕަރޭޝަންތައް ފަށަމުންދާވަރަކަށް މަޑު މަޑުން ޕޮޒިޓިވްކޮށް މަންޒަރުތައް ފެންނަމުންދާކަމަށެވެ. އެގޮތުން މިހާރުވެސް ކުޑަ ކޮރިޑޯއެއްގެ ތެރެއިން ޑުބާއީ އިންޓަނޭޝަނަލް އެއާޕޯޓާއި ޝާރްޖާގެ އެއާޕޯޓުން ބައެއް އޮޕަރޭޝަންތައް ފަށާފައިވާއިރު، ޖާގަ އޮތް ވަރުން ރާއްޖެއަށް ވެސް ފްލައިޓް ޖައްސަމުންދާ ކަމަށް މިނިސްޓާ ވިދާޅުވިއެވެ. އަދި ދޯހާ އާއި ބަހްރައިންގެ އެއާޕޯޓުތައް ބަންދުކޮށްފައިވާނަަމަވެސް، މަސްކަޓްގެ އެއާޕޯޓުން ރާއްޖެއަށް ފްލައިޓް އޮޕަރޭޓް ކުރަމުންދާކަމަށް މިނިސްޓަރު ވިދާޅުވިއެވެ.
މިނިސްޓާ ވިދާޅުވީ މެދުއިރުމަތީގެ ހަމަނުޖެހުމުގެ ގޮންޖެހުންތައް މިޓިގޭޓްކޮށް ގެއްލުން ކުޑަކުރުމަށް މިހާރު މަސައްކަތް ފަށާފައިވާކަމަށެވެ. އެގޮތުން ކުރިން ދަތުރުނުކުރާ 5 ޑެސްޓިނޭޝަނަކަށް ދަތުރުތައް ފަށާފައިވާކަމަށެވެ. އަދި ޔޫރަޕާއި އޭޝިއާ ބައްރުގެ ފްލައިޓްތައް އިތުރުކުރަން މަސައްކަތް ކުރަމުންދާކަމަށް މިނިސްޓާ ވިދާޅުވިއެވެ.
