މިސަރުކާރުގެ ބޯހިޔާވަހިކަން އެންމެނަށް ސިޔާސަތުގެ ދަށުން، އާއިލީ ބޯހިޔާވަހިކަމުގެ ޕްރޮގްރާމްގެ ރެންޓު އޯން ސްކީމްގެ ތެރެއިން ފްލެޓާއި ގޯއްޗަށް އެދި 18000 އަށްވުރެއް ގިނަ އެޕްލިކޭޝަންތައް އެކި މަރުހަލާގައި އޮތްކަމަށް މިނިސްޓާ އޮފް ކޮންސްޓްރަކްޝަން، ހައުސިންގް އެންޑް އިންފްރާސްޓްރަކްޗާ، ޑރ. އަބްދުﷲ މުއްތަލިބް ވިދާޅުވެއްޖެއެވެ.
މިނިސްޓަރު މިހެން ވިދާޅުވީ މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުންނެވެ.
މިނިސްޓަރު ވިދާޅުވީ އާއިލީ ބޯހިޔާވަހިކަމުގެ ތަފާސް ހިސާބަށް ބަލާއިރު، މިހާތަނަށް 18399 އެޕްލިކޭޝަނެއް ޑްރާފްޓިކޮށް، އަދި ސަބްމިޓް ކޮށްފަ ހުރި އެޕްލިކޭޝަން ތެރޭ ހިމެނޭ ކަމަށެވެ. އެގޮތުން 2513 އެޕްލިކޭޝަން ބިމަށް ކުރިމަތިލާ ފަރާތްތަކުން ސަބްމިޓްކޮށްފައިވާއިރު، 2851 އެޕްލިކޭޝަން ޑްރާފްޓް ސްޓޭޖްގަ ހިމެނެއެވެ. އަދި ފްލެޓަށް ކުރިމަތިލާ ފަރާތްތަކުން 3396 އެޕްލިކޭޝަން ސަބްމިޓްކޮށްފައިވާއިރު، 8466 އެޕްލިކޭޝަން ޑްރާފްޓް ސްޓޭޖްގަ ހިމެނެއެވެ. މީގެއިތުރުން ހިޔާއަށް ހާއްސަ ކެޓަގަރީގެ ޑްރާފްޓްގައި 220 އަދި ސަބްމިޓްކޮށްފަ 953 އެޕްލިކޭޝަން ހިމެނެއެވެ.
މިނިސްޓަރު ވަނީ އާއިލީ ބޯހިޔާވަހިކަމުގެ ޕްރޮގްރާމަށް 20000 އަށްވުރެއް ގިނަ އެޕްލިކޭޝަން ލިބޭނެކަަމަށް ލަފާކުރައްވާފައެވެ. އަދި ތަފާސް ހިސާބަށް ބަލައި ފްލެޓަށް އޮތް ޑިމާންޑް ބޮޑުކަމަށް މިނިސްޓަރު ފާހަގަ ކުރެއްވިއެވެ.
އާއިލީ ބޯހިޔާވަހިކަމުގެ ޕްރޮގްރާމްގެ ތެރެއިން ރެންޓު އޯން ސްކީމްގެ ދަށުން 7900 ފްލެޓްގެ އިތުރު ތަފްސީލަ އަލިއަޅުވާލައި މިނިސްޓަރު ވިދާޅުވީ ބޭންކް އޮފް މޯލްޑިވްސް އިން އިމާރާތްކުރާ އެފޯޑަބަލް ހޯމްސްގެ 3260 ފްލެޓް ވެސް މި ޕްރޮގްރާމްގެދަށުގަ ހިމެނޭކަމަށެވެ. އަދި މި ފްލެޓްތައްވެސް ދޫކުރާނީ ސޯޝަލް ހައުސިންގް ކެޓެގަރީގެ ރެންޓު އޯން ސްކީމްގެ ދަށުންކަމަށް މިނިސްޓަރު ވިދާޅުވިއެވެ. މީގެއިތުރުން އިންޑިއާގެ އެލްއޯސީގެ ދަށުން ސަރުކާރުން އިމާރާތް ކުރާ 4000 ފްލެޓާއި އެހެން ބައިލެޓަރަލް އެހީގެ ދަށުން އިމާރާތް ކުރަން ކަނޑައަޅާފައިވާ ފްލެޓް ތަކާއެކު 7900 ފްލެޓް ޖުމްލަކޮށް ގާއިމުކުރުމަށް ނިންމާފައިވާކަމަށް މިނިސްޓަރު ވިދާޅުވިއެވެ.
ބޯހިޔާވަހިކަން އެންމެންނަށް ސިޔާސަތުގެ ދަށުން މާލެ ސަރަހައްދުން ގޯއްޗާއި ފްލެޓަށް އެދި ހުށަހެޅުމަށް ހުޅުވާލާފައިވާ ފުރުސަތުގެ ފޯމް ލާ މުއްދަތު ހަމަވާނީ އަންނަ އޭޕްރީލް މަހުގެ 30 ވަނަ ދުވަހުއެވެ.
