ލަޒާނިޔާ އަކީ އިޓަލީގެ މަޝްހޫރު ޕާސްތާގެ ވައްތަރަކަށްވާއިރު އޭގެން ތަފާތު ކާނާގެ ބާވަތްތައް ތައްޔާރުކުރެއެވެ. ދިވެހީންގެ ތެރޭގައި ވެސް ލަޒާނިޔާއަކީ މަގުބޫލު ކާނާގެ ބާވަތަކަށްވާއިރު މިއަދު "ދަ ޕްރެސް" ބަދިގެ ސެގްމެންޓުގައި ވެސް ގެނެސްދޭން މިއުޅެނީ ލަޒާނިޔާއިން ތައްޔާރުކުރާ ތަފާތު ޑިޝްއެކެވެ.
އެއީ ދާދިފަހުން ސޯޝަލް މީޑިއާގައި ވެސް ވައިގަ ހިފާލި ޑިޝްއެއް ކަމަށްވާ 'ލަޒާނިޔާ ސޫޕް'އެވެ. މިއީ ލަޒާނިޔާ ކަމުދާ ފަރާތްތަކަށް މީރުވާނެ ޑިޝްއަކާ މެދު ޝައްކެއް ނުކުރަމެވެ.
ބޭނުންވާ ތަކެތި:
- ފިޔާ
- ލޮނުމެދު
- ކެރެޓު (ގާނާފައި)
- މިންސްޑް ބީފް
- ލޮނު
- އަސޭމިރުސް
- ޕިއްޒާ ސޯސް
- ލަޒާނިޔާ ޝީޓްސް
- ޗީޒް
ތައްޔާރު ކުރާނެ ގޮތް:
ތަވަޔަކަށް ތެޔޮ، ފިޔާ އަދި ލޮނުމެދު އެޅުމަށްފަހު ވަޅޯ ވަންދެން ކައްކާލާށެވެ. އެއަށްފަހު އޭގެ ތެރެއަށް ކެރެޓު އަޅާ ކައްކާލުމަށްފަހު މިންސްޑް ބީފް އަޅާ ރޯފިލަންދެން ކައްކާލާނީއެވެ. ދެން ޕިއްޒާ ސޯސް އެޅުމަށްފަހު ލޮނު އަދި އަސޭމިރުން އަޅާ ބޮކި ޖަހަންދެން ކައްކާލާނީއެވެ.
އޭގެ މައްޗަށް ލަޒާނިޔާ ޝީޓުތައް ފަތުރާލުމަށްފަހު ޝީޓުތައް މަޑުވަންދެން މަތިޖެހުމަށްފަހު ކައްކާލާށެވެ. އަދި އެންމެ ފަހު ކަމަކަށް ޝީޓުތައް މަޑުވުމުން މައްޗަށް ޗީޒް ފަތުރާލުމަށްފަހު މަތިޖަހާ ޗީޒްތައް މެލްޓުވަންދެން ކައްކާލުމުން ލަޒާނިޔާ ސޫޕް ތައްޔާރުވީއެވެ.
