މ. އަތަމާޕްލާޒާގެ މިލްކުވެރި ފަރާތަކީ ރައްޔިތުންގެ މަޖިލީހުގެ ކާށިދޫ ދާއިރާގެ ކުރީގެ މެންބަރު އަބްދުﷲ ޖާބިރު ކަމަށް ސިވިލް ކޯޓުން ކަނޑައަޅައިފިއެވެ.
އަތަމާ ޕްލާޒާގެ ރަޖިސްޓްރީ އޮންނަނީ ހައްޖަށް ގެންދަން އެތައް ބައެއްގެ އަތުން ފައިސާ ނެގުމަށް ފަހު ހައްޖަށް ގެންގޮސްނުދިން މައްސަލާގައި މަކަރާއި ހީލަތުގެ ކުށުގައި 2019 ވަނަ އަހަރު 8 އަހަރުގެ ޖަލު ހުކުމެއް އިއްވާފައިވާ މަލީޝާ ހައްޖު ގްރޫޕުގެ ވެރިޔާ އިސްމާއީލް އަބްދުއްލަތީފްގެ ނަމުގައެވެ. ނަމަވެސް އިސްމާއިލްގެ މައްޗަށް ސާބިތުވި ދަރަނީގެ އެހެން މައްސަލައެއްގައި އެ ގެ ވިއްކާލުމަށް ކޯޓުން ވަނީ އަންގާފައެވެ. އަދި ދިހަ ބުރިއަށް އިމާރާތްކޮށްފައިވާ 770 އަކަފޫޓުގެ އެ އިމާރާތް ނީލަން ކިޔަން ވެސް ސިވިލް ކޯޓުން ކުރިން ހުޅުވާލިއެވެ.
މީގެކުރިން ޖާބިރުގެ ދާއިމީ އެޑްރެހެއްގެ ގޮތުގައި ޖަހަަމުން އައި އަތަމާޕްލާޒާގެ ހަތަރު ވަނަ ފްލޯ އަކީ މީގެ 16 އަހަރު ކުރިން 2010 ވަނަ އަހަރު 14 މިލިއަން ރުފިޔާ ދައްކަވަައިގެން ޖާބިރު ބައްލަވަިއގެންފައިވާ ތަނެއް ކަމަށް އޭނާ ވިދާޅުވެއެވެ. ނަމަވެސް އެ ގޭގެ ރަޖިސްޓްރީ ޖާބިރުގެ ނަމަށް ބަދަލުކޮށްފައެއް ނުވެއެވެ.
އެގެ ވިއްކާލި މުއާމަލާތުގެ އިޖުރާއަތް ފުރިހަމަކުރަން އިސްމާއިލްގެ ފަރާތުން ސިވިލް ކޯޓަށް 2017 ވަނަ އަހަރު މައްސަލަ ހުށަހެޅި ނަމަވެސް، މައްސަލަ ކުރިއަށް ދަނިކޮށް އޭނާ ވަނީ އަމިއްލައަށް އެ މައްސަލައިގެ ދައުވާ ފޯމް އަނބުރާ ގެންގޮސްފައެވެ. އެހެންކަމުން ޖާބިރު ވަނީ 2021 ވަނަ އަހަރު ސިވިލް ކޯޓަށް މައްސަލައެއް ހުށަހަޅާފައެވެ. އެ މައްސަލައިގައި ބުނެފައި ވަނީ ޖާބިރުގެ ނަމަށް އިމާރާތް ބަދަލުކުރަން ހުރަސްތަކެއް ހުރި ކަމަށާއި އިސްމާއިލްގެ ފަރާތުން އެއްބަސްވުމާ ހިލާފަށް އަމަލުކޮށްފައި ވާތީ އެ މައްސަލަ ބަލައިދިނުމަށް އެދޭ ކަމަށެވެ.
ޖާބިރު މި މައްސަލަ ހުށަހެޅިތާ 5 އަހަރު ފަހުން އިއްޔެ ސިވިލް ކޯޓުން ކުރި ހުކުމުގައި ބުނެފައި ވަނީ ޖާބިރާއި އިސްމާއިލްއާ ދެމެދު އޮތް ގަނެވިއްކުމުގެ އެއްބަސްވުމުގެ ދަށުން އަތަމާޕްލާޒާއަކީ އެތަނުގެ މިލްކުވެރިކަން ޖާބިރަށް ނަގުލު ކުރުމުގެ ހައްގު ލިބިގެންވާ ތަނެއް ކަމަށެވެ. އަދި އެ ހައްގުގެ މައްޗަށް އިސް ކުރެވޭނެ އެހެން އެއްވެސް ހައްގެއް ނެތް ކަމަށެވެ.
އެގޮތުން އެ އިމާރާތާއި އެ އިމާރާތުގައި ހަރުކޮށްފައިވާ ތަކެތީގެ މިލްމުވެރިކަން ޖާބިރަށް ބަދަލުކުރުމުގެ ޝަރުއީ އިޖުރާއަތް ދެ މަސް ދުވަހުގެ ތެރޭގައި ނިންމުމަށް އިސްމާއިލްގެ މައްޗަށް އަންގާފައި ވެއެވެ. އަދި ގެއްލުމުގެ ބަދަލުގެ ގޮތުގައި 16 މިލިއަން ރުފިޔާ ހޯދަން ޖާބިރުގެ ފަރާތުން އެދުނު ނަމަވެސް، އެ ފައިސާ ނަގައިނުދެވޭނެ ކަމަށް އެ ހުކުމުގައި ވެއެވެ.
