ބިންވެރިޔާ ސްކީމްގެ ދަށުން ގިރާވަރުފަޅުން ގޯތި ލިބިފައިވާ ފަރާތްތަކުގެ ގުރުއަތުލުން މިއަދު ފަށައިފިއެވެ.
މިދިޔަ ސަރުކާރުން ފެށި ބިންވެރިޔާ ސްކީމްގެ ދަށުން ޖުމްލަ 9001 ގޯތި ދޭން ނިންމާފައިވާ އިރު، އޭރު ނިންމީ ހުޅުމާލެއިން 1351 ގޯތި، ގުޅިފަޅުން 2218 އަދި ގިރާވަރުފަޅުން 5432 ގޯތި ދޭށެވެ. ނަމަވެސް މި ސަރުކާރު ވެރިކަމަށް އައި ފަހުން ގުޅިފަޅުގައި ގާއިމްކުރަން ނިންމި ޕޯޓް ތިލަފުއްޓަށް ބަދަލުކޮށް ގުޅިފަޅާއި ގިރާވަރުފަޅުގެ އިތުރުން ހުޅުމާލެ ތިންވަނަ ފިޔަވަހީގެ ލޭންޑް ޔޫސް ޕްލޭނަށް ވަނީ ބަދަލުތަކެއް ގެނެސްފައެވެ.
ލޭންޑް ޔޫސް ޕްލޭނަށް ގެނައި ބަދަލުތަކާ އެކު މިހާރު ހުޅުމާލެއިން 1370 ގޯތި، ގުޅިފަޅުން 3559 ގޯތި އަދި ގިރާވަރުފަޅުން 4072 ގޯތި ދޭން މި ވަނީ ނިންމާފައެވެ.
ގިރާވަރުފަޅުން ދޫކުރާ 4072 ގޯތީގެ ގުރުއަތުލުން މިހާރު ސޯޗާލް ސެންޓަރުގައި ކުރިއަށް ދާ އިރު، އެތަނަށް ގިރާވަރުފަޅުން ގޯތި ލިބޭ ބައެއް ފާރަތްތަކުން ވެސް ވަނީ ގޮސްފައެވެ. މި ގުރުއަތުލުން ނަގާނީ ހައުސިން މިނިސްޓްރީގެ މުވައްޒަފެއް ކަމުގައި ވާ އިރު، ގުރުއަތުލުމުގެ ކަންކަން ކުރިއަށް ދާ ގޮތް ލައިވް ކޮށް ޕީއެސްއެމް އިން އަންނަނީ ދައްކަމުންނެވެ.
ގިރާވަރުފަޅުން ދޫކުރާ ގޯތީގެ އަދަދާއި ބޮޑުމިން
- 1250 އަކަފޫޓުގެ 2603 ގޯތި
- 1650 އަކަފޫޓުގެ 1214 ގޯތި
- 2050 އަކަފޫޓުގެ 254 ގޯތި
- 2450 އަކަފޫޓުގެ 1 ގޯތި
ގުރުއަތުނެގުމަށް ހަމަޖެހިފައިވާ ސަރަހައްދަށް ގޯތި ލިބިފައިވާ ފަރާތްތަކުގެ ތެރެއިން ކޮންމެ ޕްލޮޓަކަށް އެއް ފަރާތަކަށް ވަދެވޭނެ ކަމަށާއި ގޯތި ލިބޭ ފަރާތުގެ ބަދަލުގައި އެހެން ފަރާތަކުން ހާޒިރުވާން ބޭނުންވާ ނަމަ، އެކަން އަންގައިދޭ ލިޔުމާއި އަދި ގޯތީގެ ވެރިފަރާތުގެ އައިޑީ ކާޑުގެ ކޮޕީގެ އިތުރުން ބަދަލުގައި ހާޒިރުވާ ފަރާތުގެ އައިޑީ ކާޑުގެ ކޮޕީއާއެކު ހާޒިރުވުމުން އެ ސަރަހއްދަށް އެ ފަރާތަކަށް ވަދެވޭނެ ކަމަށް ހައުސިން މިނިސްޓްރީން ބުނެއެވެ. ގޯތިލިބޭ ފަރާތްތަކަށް ލިބިގެންދާ ޕްލޮޓްގެ ގުރުއަތުނެގުމުގެ ކަންކަން ކުރިއަށް ގެންދާނީ އެކަމަށް ކަނޑައަޅާފައިވާ އެ މިނިސްޓްރީގެ މުވައްޒަފުންނެވެ.
ގުރުއަތުނެގުން ކުރިއަށްދާއިރު ގޯތި ލިބިފައިވާ ފަރާތަށް ހަމަޖެހިގެންދާ ޕްލޮޓް ހިޔާވެހި ޕޯޓަލްއިން ވަގުތުން ފެންނާނެ ކަމަށް ވެސް ހައުސިން މިނިސްޓްރީން ބުނެއެވެ. އަދި އެފަރާތަކަށް ލިބޭ ފްލޮޓް ނަންބަރު އެސްއެމްއެސްގެ ޒަރިއްޔާއިން އެނގޭނެ ކަމަށް ވެސް ހައުސިން މިނިސްޓްރީން ބުނެއެވެ.
ގޯތި ލިބޭ ފަރާތްތަކުގެ ގުރުނަގާ ނިމުމުން، ގޯތި ހަވާލުކުރުމުގެ އެއްބަސްވުމުގެ ސޮއިކުރުމާއި ގޯތީގެ ރަޖިސްޓަރީ ހަވާލުކުރުމުގެ މަސައްކަތް ކުރިއަށް ގެންދާނެ ގޮތުގެ މައުލޫމާތު ފަހުގެ ތާރީހެއްގައި ހިއްސާކުރާނެ ކަމަށް ހައުސިން މިނިސްޓްރީން ބުނެއެވެ.
