އުރީދޫ އިން ކަނޑުއަޑީގެ ހާއްސަ ޑައިވިން އިކުއިޕްމަންޓުތަކެއް މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އަށް ހަދިޔާކޮށްފިއެވެ.
މިކަމާ ގުޅިގެން އުރީދޫ އިން ބުނީ މި އާލާތްތަކަކީ ކަނޑުއަޑީގެ މުވާސަލާތީ ގުޅުމުގުގައި އެހީތެރިވެ ކަނޑުއަޑީގެ ސަލާމަތާއި ރައްކާތެރިކަން ކަށަވަރުކުރުމަށް އެމްއެންޑީއެފް އިން ކުރާ މަސައްކަތައް އިތުރު އެހީއަކަށް ވެގެންދާނެކަމަށާއި، ރާއްޖޭގެ ބޮޑު ބަޔަކީ ކަނޑަށްވުމާއެކު މި ސަރަހައްދު ހިމާޔަތްކުރުމުގައި އެމްއެންޑީއެފް އިން އިސްދައުރެއް އަދާކުރަމުން ދާކަމަށެވެ.
އުރީދޫ އިން އެމްއެންޑީއެފްއަށް ހަދިޔާކޮށްފައިވަނީ:
- އޯޝަން ރީފް އެމް 105 ޑިޖިޓަލް ޑުއަލް ޗެނަލް ކޮމިއުނިކޭޝަން ޑިވައިސް އެއް
- ލުބެލް ލެބް އަންޑަވޯޓާ ލައުޑް ސްޕީކަރެއް
- އޯޝަން ރީފް ފުލް ފޭސް 2، ޑައިވިން 3 މާސްކު
އުރީދޫ އިން ބުނީ އެކުންފުންޏަށް 20 އަހަރު ފުރުން ފާހަގަކުރުމުގެ ގޮތުން 2025 ވަނަ އަހަރު ބޭއްވި ކަނޑުއަޑީގެ އެންމެ ބޮޑު ޕެނަލް ޑިސްކަޝަންގެ ގިނިސް ވޯލްޑް ރެކޯޑު ހެދުމަށް މި ޑައިވިން އިކުއިޕްމަންޓް ބޭނުންކޮށްފައިވާކަމަށާއި އަދި މި ހަރަކާތް ކުރިއަށް ގެންދިއުމަށް އެމްއެންޑީއެފްގެ ބޮޑު އެހީތެރިކަމެއް ލިބިފައިވާކަމަށެވެ.
މިކަމާ ގުޅިގެން އުރީދޫގެ ސީއީއޯ އަދި މެނޭޖިން ޑިރެކްޓަރު ހާލިދު އަލް ހަމާދީ ވިދާޅުވީ ކަނޑުއަޑީގެ މުވާސަލާތީ ވަސީލަތްތަކާއި ސަލާމަތާއި ރައްކާތެރިކަން އަދި ކަނޑުއަޑީގެ ތިމާވެށި ހިމާޔަތް ކުރުމުގައި އެމްއެންޑީއެފް އަށް އެހީތެރިކަން ފޯރުކޮށްދިނުމަކީ ލިބޭ ބޮޑު ފަހުރެއް ކަމަށެވެ.
މިކަމާ ގުޅިގެން ޗީފް އޮފް ޑިފެންސް ފޯސް މޭޖާ ޖެނެރަލް އިބްރާހިމް ހިލްމީ ވިދާޅުވި މި އެހީގެ ސަބަބުން ރާއްޖޭގެ އޮޕަރޭޝަނަލް އިފެކްޓިވިޓީ އަދި މެރިޓައިމް ގޮންޖެހުންތަކަށް އިޖާބަ ދިނުމުގެ ގާބިލްކަން އިތުރުވެ، ގައުމީ ސަލާމަތާއި ރައްކާތެރިކަމަށް އިތުރު އެހީއަކަށް ވެގެންދާނެކަމަށެވެ.
