ބިންވެރިޔާ ސްކީމްގެ ދަށުން ގޯތި ދޫކުރަން ހަމަޖެހިފައިވާ ގިރާވަރުފަޅުގެ ލޭންޑް ޔުސް ޕްލޭނަށް ގެނެސްފައިވާ ބަދަލާ އެއްގޮތަށް ގިރާވަރުފަޅުން ގޯތި ލިބިފައިވާ މީހުންގެ މެދުގައި ގުރުއަތު ނެގުން އަންނަ ހޮނިހިރު ދުވަހު ބާއްވަން ނިންމައިފިއެވެ.
ހައުސިން މިނިސްޓްރީން ބުނީ، ކުރިން ޝާއިއު ކޮށްފައިވާ ގިރާވަރުފަޅުގެ ލޭންޑް ޔުސް ޕްލޭންގައި 610 ގޯތި މަދުވާތީ، އެ އަދަދު ހިމަނައިގެން ގިރާވަރުފަޅުން ދޫކުރަންޖެހޭ ޖުމްލަ 4,072 ގޯތި ހިމެނޭހެން އާ ލޭންޑް ޔޫސް ޕްލޭން މި މަހުގެ 26 ގައި ގެޒެޓުގައި އާންމުކޮށްފައި ވާނެ ކަމަށެވެ. މި ބަދަލާ ގުޅިގެން، "ބިންވެރިޔާ" ސްކީމްގެ ދަށުން ގިރާވަރުފަޅުން ގޯތި ލިބިފައިވާ ފަރާތްތަކަށް ކަނޑައެޅިފައިވާ ބިމުގެ ސަރަޙައްދުތަކަށް ބަދަލު އަންނާނެތީ، އާ ލޮޓް ނަންބަރުތައް ކަނޑައެޅުމަށްޓަކައި އަލުން ގުރުނެގުމަށް ނިންމާފައިވާ ކަމަށް އެ މިނިސްޓްރީން ބުނެއެވެ.
އެގޮތުން އަންނަ ހޮނިހިރު ދުވަހުގެ ހެނދުނު 09:30 ގައި ގުރުއަތުލުން އޮންނާނީ ސޯޝަލް ސެންޓަރުގެ ހޯލުގައި ކަމަށް ހައުސިން މިނިސްޓްރީން ބުނެއެވެ. މި ގުރުއަތުލުން ޕަބްލިކް ސާވިސް މީޑިއާ (ޕީއެސްއެމް) އިން ވަގުތުން ދުރަށް ދެއްކުމަށް ވެސް ވަނީ ހަމަޖެހިފައެވެ.
ގިރާވަރުފަޅުން ދޫކުރާ ގޯތީގެ އަދަދާއި ބޮޑުމިން
- 1250 އަކަފޫޓުގެ 2603 ގޯތި
- 1650 އަކަފޫޓުގެ 1214 ގޯތި
- 2050 އަކަފޫޓުގެ 254 ގޯތި
- 2450 އަކަފޫޓުގެ 1 ގޯތި
ގުރުއަތުނެގުމަށް ހަމަޖެހިފައިވާ ސަރަހައްދަށް ގޯތި ލިބިފައިވާ ފަރާތްތަކުގެ ތެރެއިން ކޮންމެ ޕްލޮޓަކަށް އެއް ފަރާތަކަށް ވަދެވޭނެ ކަމަށާއި ގޯތި ލިބޭ ފަރާތުގެ ބަދަލުގައި އެހެން ފަރާތަކުން ހާޒިރުވާން ބޭނުންވާ ނަމަ، އެކަން އަންގައިދޭ ލިޔުމާއި އަދި ގޯތީގެ ވެރިފަރާތުގެ އައިޑީ ކާޑުގެ ކޮޕީގެ އިތުރުން ބަދަލުގައި ހާޒިރުވާ ފަރާތުގެ އައިޑީ ކާޑުގެ ކޮޕީއާއެކު ހާޒިރުވުމުން އެ ސަރަހއްދަށް އެ ފަރާތަކަށް ވަދެވޭނެ ކަމަށް ހައުސިން މިނިސްޓްރީން ބުނެއެވެ. ގޯތިލިބޭ ފަރާތްތަކަށް ލިބިގެންދާ ޕްލޮޓްގެ ގުރުއަތުނެގުމުގެ ކަންކަން ކުރިއަށް ގެންދާނީ އެކަމަށް ކަނޑައަޅާފައިވާ އެ މިނިސްޓްރީގެ މުވައްޒަފުންނެވެ.
ގުރުއަތުނެގުން ކުރިއަށްދާއިރު ގޯތި ލިބިފައިވާ ފަރާތަށް ހަމަޖެހިގެންދާ ޕްލޮޓް ހިޔާވެހި ޕޯޓަލްއިން ވަގުތުން ފެންނާނެ ކަމަށް ވެސް ހައުސިން މިނިސްޓްރީން ބުނެއެވެ. އަދި އެފަރާތަކަށް ލިބޭ ފްލޮޓް ނަންބަރު އެސްއެމްއެސްގެ ޒަރިއްޔާއިން އެނގޭނެ ކަމަށް ވެސް ހައުސިން މިނިސްޓްރީން ބުނެއެވެ.
ގޯތި ލިބޭ ފަރާތްތަކުގެ ގުރުނަގާ ނިމުމުން، ގޯތި ހަވާލުކުރުމުގެ އެއްބަސްވުމުގެ ސޮއިކުރުމާއި ގޯތީގެ ރަޖިސްޓަރީ ހަވާލުކުރުމުގެ މަސައްކަތް ކުރިއަށް ގެންދާނެ ގޮތުގެ މައުލޫމާތު ފަހުގެ ތާރީހެއްގައި ހިއްސާކުރާނެ ކަމަށް ހައުސިން މިނިސްޓްރީން ބުނެއެވެ.
