އައްޑޫ އިކުއަޓޯރިއަލް ހޮސްޕިޓަލުގައި ގާއިމްކުރި ކެތެޓަރައިޒޭޝަން ލެބޯޓަރީ (ކެތު ލެބު) ގެ ހިދުމަތް ފަށައިފިއެވެ.
މިއީ، މާލެއިން ބޭރުގައި ގާއިމުކުރި ފުރަތަމަ ކެތު ލެބެވެ. އައްޑޫ ސިޓީގައި ހިތުގެ ބަލިތަކަށް ދެވޭ ފަރުވާ އިތުރަށް ފުޅާކުރުމުގެ ގޮތުން ކެތު ލެބުގެ ހިދުމަތް ފަށާފައިވަނީ އައިޖީއެމްއެޗާ ގުޅިގެންނެވެ.
ކެތު ލެބުގެ ހިދުމަތް ފެށުމާއި ގުޅިގެން މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހީމް އަބްދުއްރައްޒާގް ހަލީމް ވިދާޅުވީ، އައްޑޫ ސިޓީގައި ކެތު ލެބުގެ ހިދުމަތް ފެށިގެން މިދިޔައީ ސަކޭތަ އިންސައްތަ ދިވެހިންނާ އެކުގައި ކަމަށާއި ބޭނުންވަނީ ދިވެހިންގެ އަތްމަތީގައި ބާއްވައިގެން ސިއްހީ ހިދުމަތްތައް ފުޅާކުރުން ކަމަށެވެ.
އައިޖީއެމްއެޗް އިން ބުނީ ދެ ހޮސްޕިޓަލް ދެމެދުގައި ވެވުނު އެއްބަސްވުމުގެ ދަށުން އައިޖީއެމްއެޗްގެ ހިތުގެ ބަލިތަކާ އިންޓަވެންޝަނަލް ކާޑިއޮލޮޖީ ގެ ޓީމެއް ކޮންމެ ދެ ހަފްތާއިން އެއްފަހަރު އައްޑޫ އަށް ޒިޔާރަތްކުރާނެ ކަމަށެވެ. މި ޓީމުގައި އިންޓަވެންޝަނަލް ކާޑިއޮލޮޖިސްޓުންނާ، ތަޖުރިބާކާރު ނަރުހުންނާ، ކެތު ލެބު ޓެކްނީޝަނުން ހިމެނޭކަމަށް އެ ހޮސްޕިޓަލުން ވަނީ ބުނެފައެވެ.
އައްޑޫގައި މި ހިދުމަތް ތައާރަފުކުރެވުމާއެކު މިހާތަނަށް، 6 ބަލި މީހަކަށް ފަރުވާދެވިފައިވާކަން ފާހަގަކޮށް އައިޖީއެމްއެޗް އިން ބުނީ މިއީ މުޅި ދެކުނުގެ ރައްޔިތުން ހިތުގެ ބަލީގެ ފަރުވާ ހޯދުމަށް މާލެއަށް ބަރޯސާވާންޖެހޭ މިންވަރު ކުޑަކޮށްދީ އަމިއްލަ ރަށުގައި ތިބެގެން ފެންވަރު ރަނގަޅު ހިދުމަތް ހޯދުމަށް ފަހިވެގެންދިޔަ ފުރުސަތެއް ކަމަށެވެ.
އައްޑޫ އިކުއަޓޯރިއަލް ހޮސްޕިޓަލުން، އެންމެ ފުރަތަމަ މަސައްކަތްކުރީ ކެތު ލެބު އައުޓް ސޯސްކޮށްގެން ހިންގުމަށެވެ. އެހެންނަމަވެސް ފަހުން ވަނީ އެ ކެތު ލެބު އައިޖީއެމްއެޗާ ގުޅިގެން ހިންގަން ނިންމާފައެވެ. އައިޖީއެމްއެޗްގައި ހުންނަ ކެތު ލެބު ވެސް މިހާރު ހިންގަނީ އެ ހޮސްޕިޓަލު ގައި މަސައްކަތްކުރާ ދިވެހި ޑޮކްޓަރުންނެވެ.
