މޯބައިލް އެޕްލިކޭޝަން މެދުވެރިކޮށް ޓެކްސީ ހިދުމަތް ދޭނަމަ ޓްރާންސްޕޯޓް މިނިސްޓްރީ މެދުވެރިކޮށް ހާއްސަ ހުއްދައެއް ހޯދަންޖެހޭ ގޮތަށް ގަވާއިދު އިސްލާހުކޮށްފިއެވެ.
އެ މިނިސްޓްރީން މިއަދު ގެޒެޓު ކުރި އިއުލާނެއްގައި ބުނީ، މި ބަދަލުތައް ގެނެސްފައި ވަނީ ޓެކްސީގެ ހިދުމަތް އިތުރަށް ހަރުދަނާކޮށް، ފަސިންޖަރުންނާއި ޑްރައިވަރުންގެ ހައްގުތައް ރައްކާތެރިކުރުމަށްޓަކައި ކަމަށެވެ. އަދި މި ބަދަލުތަކުގެ މައިގަނޑު މަގްސަދަކީ ހިދުމަތުގެ ފެންވަރު މަތިކޮށް، ދަތުރުފަތުރުގެ ނިޒާމު އިތުރަށް ތަރުތީބުކުރުން ކަމަށް ވެސް މިނިސްޓްރީން ވަނީ ބުނެފައެވެ.
އެގޮތުގެ މަތިން މިއަދު ގެޒެޓުކުރި އިސްލާހުގައިވާ އެއް ބަދަލަކީ ޓެކްސީ ސެންޓަރެއް ރަޖިސްޓްރީ ކުރުމަށް ޓަކައި ބޭނުންވާ އުޅަނދާއި ޑްރައިވަރުންގެ އެންމެ، މަދު އަދަދު 100 އިން 50 އަށް މަދުކުރުމެވެ.
މީގެ އިތުރުން ވެސް ގެނައި އިތުރު އިސްލާހުތަކުގެ ތެރޭގައި:
- ކުންފުންޏަކުން ދަތުރުފަތުރުގެ ހިދުމަތް ދޭ ނަމަ، އެކަމަކީ އެ ކުންފުންޏެއްގެ މެންޑޭޓުގައި ހިމެނޭ ކަމެއްކަން ކަށަވަރު ކުރަން ޖެހޭ. އަދި ގަވާއިދާ އެއްގޮތަށް ރަޖިސްޓަރީކޮށް ހުއްދަ ހޯދުން، ޓެކްސީގެ ހިދުމަތް ދޭ ކުންފުނިތަކަށް ލާޒިމްވާނެ
- ލައިސަންސް އޮންނަ ޓެކްސީ ޑްރައިވަރުންނަށް އެއް ވަގުތެއްގައި ދެ ޓެކްސީ ސެންޓަރެއްގައި ރަޖިސްޓަރީވެގެން މަސައްކަތް ކުރުމުގެ ފުރުސަތު ލިބިދޭ. އެ ބަދަލުގެ ސަބަބުން ޑްރައިވަރުންނަށް ލިބޭ އާމްދަނީ އިތުރުކުރުމަށް މަގުފަހިވާނެ ކަމަށް މިނިސްޓްރީން ބުނޭ
މީގެ އިތުރުން ދަތުރުވެރިންގެ ރައްކާތެރިކަން ކަށަވަރުކުރުމަށް ޓަކައި، މޮބައިލް އެޕްލިކޭޝަން ނުވަތަ އޮންލައިން ޕޯޓަލްތައް މެދުވެރިކޮށް ޓެކްސީ ހިދުމަތް ދޭން ބޭނުންވާ ފަރާތްތަކުން މިނިސްޓްރީގެ ހާއްސަ ހުއްދައެއް ހޯދައިގެން އެ ގޮތަށް ހިދުމަތް ދެވޭނެކަމަށް އިސްލާހުގައި ވެއެވެ.
ސަރުކާރުގެ ޓެކްސީ ލައިންގެ ހިދުމަތަށް ފަށަން ތައްޔާރުވަމުން އަންނައިރު، މިހާރު ވަނީ އެ ހިދުމަތަށް ބޭނުންވާ ޑްރައިވަރުން ހޯދުމުގެ މަސައްކަތް ކުރަމުންނެވެ.
ޓެކްސީ ހިދުމަތް ދޭން ފަށާނީ ސޮއިކޮށްފައި ހުރި ކޮންވެންޝަންތަކާ އެއްގޮތަށް އިލެކްޓްރިކަލް ވެހިކަލްތައް ވެސް ބޭނުން ކޮށްގެން ކަމަށާއި ސްޓެލްކޯގެ ޕަވާ ގްރިޑަށް އެކަށީގެންވާ ވަރަށް 20 ޕަސަންޓާއި 25 ޕަސަންޓާ ދޭތެރޭގައި އިލެކްޓްރިކް ވެެހިކަލްތައް ބޭނުން ކުރާނެ ކަމަށް މިނިސްޓަރު އަމީން މީގެ ކުރިން ވަނީ ވިދާޅުވެފައެވެ.
