ރާއްޖޭގައި ގާއިމުކުރާ ސްޕެޝަލް އިކޮނޮމިކް ޒޯން (އެސްއީޒެޑް) އެއްގައި ހިންގިދާނެ އިގުތިސާދީ މަސައްކަތްތަކާއި، އެއިން ޒޯނެއްގައި ހިމެނޭ ޖުމުލަ އިންވެސްޓްމަންޓުގެ އެންމެ ކުޑަ މިންގަނޑު ރައީސް ޑރ. މުހައްމަދު މުއިއްޒު އަލުން ކަނޑައަޅުއްވައިފިއެވެ.
މިއަދު ދިވެހި ސަރުކާރުގެ ގެޒެޓުގައި މިކަން އިއުލާނުކޮށްފައިވާއިރު، އިކޮނޮމިކް ޒޯނުގެ ގާނޫނުގައި ބުނާގޮތުން އެސްއީޒެޑް ތަކުގައި ހިންގިދާނެ މަސައްކަތްތަކާއި އިންވެސްޓްމަންޓުގެ އެންމެ ކުޑަ މިންގަނޑު ބޯޑް އޮފް އިންވެސްޓްމަންޓްސްގެ މަޝްވަރާގެ މަތީން ރައީސްގެ ގަރާރަކުން ކޮންމެ އަހަރަކު އެއްފަހަރު އިއުލާނުކުރަން ޖެހެއެވެ.
އެގޮތުން ސަސްޓެއިނަބަލް ޓައުންޝިޕްގެ ގޮތުގައި ސްޕެޝަލް އިކޮނޮމިކް ޒޯން ކަނޑައެޅުމަށް މަގުފަހިކުރުމަށްޓަކައި ޒޯނުގައި ކުރާ އިންވެސްޓްމަންޓަކީ 500,000,000 (ފަސްސަތޭކަ މިލިޔަން) އެމެރިކާ ޑޮލަރަށްވުރެ ކުޑަ ނޫން އަދަދެއްގެ އިންވެސްޓްމަންޓަކަށް ވާންޖެހޭކަމަށް ބަޔާންކޮށްފައިވެއެވެ. އަދި އެސްއީޒެޑްގައި ހިންގިދާނޭ އިގުތިސާދީ މަސައްކަތްތައް ކަމުގައި ކަނޑައަޅުއްވާފައިވަނީ، ޖުމުލަ 100 މިލިޔަން އެމެރިކާ ޑޮލަރަށްވުރެ ކުޑަނޫން އަދަދުގެ އިންވެސްޓްމަންޓްތައް ކަމަށްވެސް ބަޔާންކޮށްފައިވެއެވެ.
މީގެއިތުރުން ސްޓްރެޓީޖިކް އިންވެސްޓްމަންޓުތަކުގެ ތެރެއިން އިންވެސްޓްމަންޓެއް ހިމެނޭގޮތުން ޤާއިމުކުރުމަށް ހުށަހަޅާ ޖުމުލަ 100 މިލިޔަން އެމެރިކާ ޑޮލަރަށްވުރެ ކުޑަނޫން އަދަދެއްގެ އިންވެސްޓްމަންޓްގެ ތެރޭގައި ނުވަ ބާވަތެއްގެ އިންވެސްޓްމަންޓް ހިމަނުއްވާފައިވެއެވެ. އެއީ:
- އެކްސްޕޯޓަށް އިސްކަންދީގެން ހިންގާ މެނުފެކްޗަރިންގެ މަސައްކަތްތައް
- ޓްރާންސް ޝިޕްމަންޓް ޕޯޓް، އިންޓަނޭޝަނަލް ލޮޖިސްޓިކްސް ޕޯޓް، އެއާޕޯޓް، ބަލްކް ބްރޭކިން، ބަންކަރިން އަދި ޑޮކިން ސާވިސަސް
- ޔުނިވަރސިޓީ، ޓާޝަރީ ހޮސްޕިޓަލް، ސްޕެޝަލިޓީ ހޮސްޕިޓަލް، ދުނިޔޭގެ ފެންވަރުގެ ރިސާޗް އަދި ޑިވެލޮޕްމަންޓް ފެސިލިޓީތައް
- ދުނިޔޭގެ ފެންވަރުގެ އިންފޮމޭޝަން ކޮމިއުނިކޭޝަން ޓެކްނޮލޮޖީ (އައިސީޓީ)
- އިންޓަނޭޝަނަލް ޓްރޭޑް ސެންޓަރުތައް
- އިއާދަކުރަނިވި ހަކަތައިގެ ދާއިރާ
- ރާއްޖޭގައި ނެތް ޓެކްނޮލޮޖީއެއް ރާއްޖެއަށް އާންމުކުރުމަށް ހިންގޭ މަސައްކަތްތައް
- ފުޑް ސެކިއުރިޓީގެ ދާއިރާ
- ތެލާއި، ގޭހާއި، މިނަރަލް އެކްސްޕްލޮރޭޝަންގެ މަސައްކަތްތައް
މިއީ ބައިނަލްއަގްވާމީ އިންވެސްޓްމަންޓްގެ މައިދާނުގައި ދިވެހިރާއްޖެ އިތުރަށް ކުރިއަރައި، އީޖާދީ އުފެއްދުންތައް އިތުރުވެ، އިގްތިސާދީ ގޮތުން އެންމެން ކުރިއެރުވުމަށް މަގުފަހިވެގެންދާނެ ކަމެއް ކަމަށް އިކޮނޮމިކް މިނިސްޓަރު މުހައްމަދު ސައީދު މީގެކުރިން ވިދާޅުވެފައިވެއެވެ.
އަދި ދުނިޔޭގެ ރިއަލް އެސްޓޭޓް ވިޔަފާރި ކުރިއަރަމުން އަންނަ މިންވަރާ އެއްގޮތްވާ ގޮތުގެމަތިން، ރާއްޖެއަށް އާމްދަނީ އިތުރުވެ، ވަޒީފާގެ ފުރުސަތުތައް ފަހިވެ، ދެމެހެއްޓެނިވި ގޮތެއްގައި ކުރިއެރުން ލިބޭނެ ކަމަށް އޭނާ ވަނީ ވިދާޅުވެފައެވެ.
