ސްޕެޝަލް އިކޮނޮމިކް ޒޯން (އެސްއީޒެޑް) ގާނޫނުގެ ދަށުން ތަރައްގީ ކުރާ ފުރަތަމަ ޓައުންޝިޕް މަޝްރޫއު، 'އައިލާ ސަސްޓެއިނަބަލް ޓައުންޝިޕް'ގެ އަމަލީ މަސައްކަތް ފަށައިފި އެވެ.
"ސަސްޓެއިނަބަލް ޓައުންޝިޕް" މަޝްރޫއަކީ މީހުން ދިރިއުޅޭ ގޮތަށް އަދި ޓޫރިޒަމްގެ ވަސީލަތްތަކާއި އިގްތިސާދީ އެހެން ބައެއް މަސައްކަތްތައް ކުރެވޭ ގޮތަށް ނ. އަތޮޅުގައި ތަރައްގީ ކުރާ ސަރަހައްދެކެވެ.
މި ސަރަހައްދުގައި ރަނގަޅު ފެންވަރުގެ ސިއްހީ ހިދުމަތާއި ޓޫރިޒަމަށް މީހުން ތަމްރީނުކުރާ މަރުކަޒަކާއި ޒަމާނީ ފެންވަރަށް ދަނޑުވެރިކަމާއި އެކުއާކަލްޗާގެ މަސައްކަތްކުރާ ތަންތަން ގާއިމު ކުރުމަށް ރާވާފައި ވެއެވެ. މީގެ އިތުރުން ވެސް މި ޓައުންޝިޕްގައި ބޭނުންކުރާ ހަކަތައިގެ 60 ޕަސެންޓު އިއާދަކުރަނިވި ހަކަތައަށް ހެދުމަށް ވަނީ ނިންމާފައެވެ.
ޓައުންޝިޕް މަޝްރޫއުގެ ބިންގާއެޅުމަށް މިއަދު އެ ސަރަހައްދުގައި ބޭއްވި ހާއްސަ ރަސްމިއްޔާތު ޝަރަފުވެރިކޮށްދެއްވައި މަސައްކަތް ރަސްމީކޮށް ފައްޓަވައިދެއްވީ ރައީސް މުހައްމަދު މުއިއްޒު އެވެ.
މިއަދުން ފެށިގެން މަޝްރޫއުގެ މަސައްކަތްތައް ހަލުވި ކަމާއެކު ޝެޑިއުލްއާ އެއްގޮތަށް ކުރިއަށް ދާނެ ކަމަށާއި 2028 ވަނަ އަހަރުގެ ޖޫން/ޖުލައި މަހު ޓައުންޝިޕް ހުޅުވުމަށް ވަނީ އަމާޒު ހިފާފައެވެ. މި މަޝްރޫއު ހިންގުމަށް ހަވާލުކޮށްފައި ވަނީ ކްރިސްޓަލް ހޯލްޑިންގްސް ޕްރައިވެޓް ލިމިޓެޑްއާއެވެ.
ސްޕެޝަލް އިކޮނޮމިކް ޒޯން (އެސްއީޒެޑް) ގެ ގޮތުގައި ސަރުކާރުން ކަނޑައަޅާ ސަރަހައްދުތަކުގައި ހިންގޭނެ އިގުތިސާދީ މަސައްކަތްތަކުގެ ތެރެއަށް ސަސްޓެއިނެބަލް ޓައުންޝިޕްގެ ގޮތުގައި ތަރައްގީ ކުރެވޭ ގޮތަށް ރައީސުލްޖުމްހޫރިއްޔާ މުހައްމަދު މުއިއްޒު ކަނޑައެޅުއްވީ ހުސްވި އަހަރުގެ ޖެނުއަރީ 12، ގައި ނެރުއްވި ގަރާރަކުންނެވެ.
މި ގަރާރަށް ފަހު، "ޓައުންޝިޕް" މި ބަހަށް ރަސްމީ މާނައެއް ކަނޑައަޅައި، އެސްއީޒެޑުގެ އިންވެސްޓުމަންޓު ބޯޑުން އިއުލާނެއް ގެޒެޓުކުރީ މާޗު 18، ގަ އެވެ. ޖެހިގެން އައި ދުވަހު ކްރިސްޓަލް ހޯލްޑިންސްއަށް ވަނީ، ޓައުންޝިޕް ތަރައްގީކުރަން އިނީޝަލް ޕާމިޓު ދޫކޮށްފަ އެވެ
