އިގުތިސާދީ މިނިވަންކަން ކަށަވަރުކުރުމަށް ރާއްޖޭގެ ކަނޑުގެ މުއްސަނދިކަމުގެ ބޭނުން ހިފަން ޖެހޭކަމަށް ފިޝަރީޒް މިނިސްޓަރު އަހުމަދު ޝިޔާމް ވިދާޅުވެއްޖެއެވެ.
ރާއްޖޭގައި ގާއިމުކުރާ ސްޕެޝަލް އިކޮނޮމިކް ޒޯން (އެސްއީޒެޑް)ތަކުގައި ހިންގިދާނެ މަސައްކަތްތަކުގެ ތެރެއަށް ތެލާއި ގޭހާއި މިނެރަލް އެކްސްޕްލޮރޭޝަން މަސައްކަތްތައް ހިމަނާ އިއްޔެ ރައީސް ޑރ. މުހައްމަދު މުއިއްޒު ވަނީ ގަރާރު އިސްލާހު ކުރައްވާފައެވެ. މިކަމާ ގުޅުވާ ކުރީގެ އެންވާރަމަންޓް މިނިސްޓަރު އައިޝަތު ޝައުނާ ވަނީ ރާއްޖޭގެ ކަނޑުގެ އަޑިން ތެލާއި މިނެރަލް ހޯދުމުގެ މަސައްކަތް ކުރުމަކީ ތިމާވެއްޓަށް ގެއްލުންވާނެ ކަމެއް ކަމަށް ވިދާޅުވެފައެވެ.
އެގޮތުން ރާއްޖޭގެ ކަނޑުން ތެލާއި މިނަރަލް ހޯދޭ ގޮތަށް ގާނޫނު ބަދަލުކުރުމަކީ ވަރަށް ބޮޑު ކަންބޮޑުވުމެއް ކަމަށާއި އަދި މިއީ ކުރު ރާސްތާގެ ފައިދާއަކަށް ވިސްނުމަށްފަހު ކޮށްފައިވާ ކަމެއް ކަމުގައި ޝައުނާ ވަނީ ވިދާޅުވެފައެވެ.
މި ވާހަކަތަކަށް ރައްދު ދެއްވައި މިނިސްޓަރު ޝިޔާމް ވިދާޅުވީ ރާއްޖޭގެ އިގުތިސާދު ފަތުރުވެރިކަމާއި މަސްވެރިކަމުގެ ދާއިރާއަށް އެކަނި ބަރޯސާނުވެ، އެހެން ދާއިރާތަކަށް ފުޅާކުރެއްވުމަށް ރައީސް މުއިއްޒު ތަސައްވުރެއް ކަމަށާއި، މިއީ ދުރުވިސްނޭ އަދި އަމަލީ ގޮތުން މުހިންމު ފިޔަވަޅެއް ކަމަށެވެ. ޝިޔާމް ވިދާޅުވީ ރާއްޖޭގެ އިގުތިސާދަކީ ބޭރުގެ ލޮޅުންތަކުގެ ނުރައްކަލަށް ހުށަހެޅިފައިވާ އިގުތިސާދެއް ކަމަށާއި އެހެންކަމުން އިގުތިސާދީ ބިންގާ ފުޅާކުރުމުން މިފަދަ ނުރައްކާތައް ކުޑަވެ، ހަރުދަނާ ބިންގަލެއް އެޅިގެންދާނެކަމަށެވެ.
ޝިޔާމް ވިދާޅުވީ ދުނިޔޭގެ އެންމެ ބޮޑު އިގުތިސާދީ ސަރަހައްދު ތަކުގެ ތެރޭގައި ހިމެނޭ ގާތްގަނޑަކަށް 900،000 އަކަ ކިލޯމީޓަރުގެ ސަރަހައްދެއް ރާއްޖެއަށް ލިބިފައިވީ ނަމަވެސް، މިހާތަނަށް އޭގެ ބޭނުން ހިފިފައިވަނީ ވަރަށް ކުޑަ މިންވަރަކަށް ކަމަށާއި އެއީ މައިގަނޑު ގޮތެއްގައި މަސްވެރިކަމުގައި ކަމަށެވެ. އެހެންކަމުން ކަނޑުގެ މުއްސަނދިކަން ދިރާސާކޮށް ތަރައްގީކުރުމަކީ ދެމެހެއްޓެނިވި ގޮތެއްގައި ވަސީލަތްތަކުގެ ބޭނުން ހިފުމަށް ހުޅުވިގެންދާ އާ ދޮރެއް ކަމުގައި ޝިޔާމް ވަނީ ވިދާޅުވެފައެވެ.
އިތުރަށް ޝިޔާމް ވިދާޅުވީ މިކަން ކުރުމަށް މަސައްކަތް ކުރާނީ އިތުބާރުހުރި އަދި ގާބިލު އިންވެސްޓަރުންނާ ގުޅިގެންކަމަށާއި، މޫސުމީ ބަދަލުތަކުގެ ނުރައްކާ އެންމެ ބޮޑަށް އޮތް އެއް ގައުމަށް ވުމާއެކު ކޮންމެ އާ މަސައްކަތެއްވެސް ކުރިއަށް ގެންދާނީ އެކަމަށް ހާއްސަ ސަމާލުކަމެއް ދީގެން ކަމަށެވެ.
އެގޮތުން ތަރައްގީއަށް ހިންގާ ކޮންމެ މަޝްރޫއެއް ކުރިއަށް ގެންދާނީ ތިމާވެއްޓަށް ކުރާނެ އަސަރުތައް ވަރަށް ފުރިހަމައަށް އަދި ދެފުށް ފެންނަ ގޮތެއްގައި ދިރާސާ ކުރުމަށްފަހުގައިކަން ފާހަގަކުރައްވާ ޝިޔާމް ވިދާޅުވީ ކަނޑުގެ ދިރުންތަކަށް އެއްވެސް އުނިކަމެއް އަންނާނެ ފުރުސަތު ނުދެއްވާނެ ކަމަށެވެ.
