ރައީސުލްޖުމްހޫރިއްޔާ ޑރ. މުހައްމަދު މުއިއްޒު ޗައިނާއަށް މިހާރު ކުރައްވަމުްގެންދަވާ ދަތުރުފުޅުގައި އެމަނިކުފާނަށް މަރުހަބާ ދެނެންވުމުގެ ގޮތުން ޗައިނާގެ ރައީސް ޝީ ޖިޕިން އަދި މެޑަމް ޕެންގް ލިޔުއާން އިންތިޒާމްކޮށްގެން މަރުހަބާގެ ޖާފަތެއް ބާއްވައިފިއެވެ.
ރައީސް އޮފީހުން ބުނީ މި ހަރަކާތް ބާއްވާފައިވަނީ ޓިއަންޖިން މެއިޖިއަންގް ކޮންވެންޝަން އެންޑް އެގްޒިބިޝަން ސެންޓަރުގައި ކަމަށެވެ. އަދި މިއީ ޗައިނާގެ ޓިއަންޖިންގައި ބާއްވާ ޝަންހާއީ ކޯޕަރޭޝަން އޮގަނައިޒޭޝަން (އެސްސީއޯ) ސަމިޓުގައި ބައިވެރިވި ބައިނަލްއަގުވާމީ ޖަމިއްޔާތަކާއި މަލްޓިލެޓަރަލް އެޖެންސީތަކުގެ ލީޑަރުން އަދި ޒިޔާރަތްކުރާ ގައުމުތަކާއި ސަރުކާރުގެ އިސްވެރިންގެ ޝަރަފުގައި ބޭއްވި މަރުހަބާގެ ޖާފަތެއް ކަމަށެވެ.
ރައީސް މުއިއްޒު މިހާރު ޗައިނާއަށް ކުރައްވާ މި ދަތުރުފުޅަކީ ޗައިނާގެ ރައީސް ޝީ ގެ ދައުވަތަކަށް، އެސްސީއޯ ސަމިޓުގައި ބައިވެރިވެވަޑައިގަތުމަށް ކުރައްވާ ދަތުރުފުޅެކެވެ.
ޗައިނާގައި މިހާރު ކުރިއަށްދާ އެސްސީއޯ ޓިއަންޖިން ސަމިޓަކީ 31 އޮގަސްޓް އިން ސެޕްޓެމްބަރު 1، 2025 އަށް ޗައިނާގެ ޓިއަންޖިންގައި ބޭއްވުމަށް ހަމަޖެހިފައިވާ އެސްސީއޯގެ ހެޑްސް އޮފް ސްޓޭޓް ކައުންސިލްގެ 25 ވަނަ ބައްދަލުވުމެވެ.
މިއީ ޗައިނާއިން ކޮންމެ އަހަރަކު ބާއްވަމުން އަންނަ ސަމިޓަކަށް ވާއިރު މިފަހަރު އެއީ އެސްސީއޯ ސަމިޓް ބާއްވާ 5 ވަނަ ފަހަރެވެ. އެސްސީއޯ ފެށުނީ 1996 ވަނަ އަހަރު "ޝަންހާއީ ފައިވް"ގެ ނަމުން ނަންދީފައިވާ ސެކިއުރިޓީ އެލަޔަންސެއްގެ ގޮތުގައެވެ. ޗައިނާ، ރަޝިއާ، ކަޒަކިސްތާން، ކިރްގިސްތާން އަދި ތަޖިކިސްތާނުން ފިނި ހަނގުރާމައަށްފަހު އެ ޖަމާއަތް އުފެއްދީ ބޯޑަރުގެ މައްސަލަތައް ހައްލުކުރުމަށެވެ.
