ދިވެހިރާއްޖޭގެ ގައުމީ ތަރައްގީގެ ލަނޑުދަނޑިތައް ހާސިލުކުރުމަށް ޗައިނާ ސަރުކާރުން ފުރިހަމަ އެއްބާރުލުން ދޭނެކަމުގެ ޔަގީންކަން އެ ގައުމުގެ ރައީސް ޝީ ޖިންޕިން ދެއްވައިފިއެވެ.

ޗައިނާ ރައީސްގެ ދައުވަތަކަށް ޝަންހާއީ ކޯޕަރޭޝަން އޯގަނައިޒޭޝަން (އެސްސީއޯ) ސަމިޓުގައި ބައިވެރިވެވަޑައިގެންނެވުމަށް ރައީސް ޑރ. މުހައްމަދު މުއިއްޒު މިހާރު ޗައިނާއަށް ކުރައްވަމުންގެންދަވާ ދަތުރުފުޅުގެ ތެރެއިން ވަނީ ޗައިނާގެ ރައީސްއާ ބައްދަލުކުރައްވާފައެވެ.

ރައީސް އޮފީހުން ބުނީ މި ބައްދަލުވުމުގައި އިގްތިސޯދީ ތަރައްގީ، ވިޔަފާރިއާއި އިންވެސްޓްމަންޓް، ސަލާމަތީ އެއްބާރުލުން އަދި 2 ގައުމުގެ ގުޅުން އިތުރަށް ބަދަހިކުރުން ފަދަ މުހިންމު ދާއިރާތަކުން މަޝްވަރާކުރައްވާފައިވާ ކަމަށެވެ. އަދި ދިވެހިރާއްޖޭގެ ގައުމީ ތަރައްގީގެ ލަނޑުދަނޑިތައް ހާސިލުކުރުމަށް ފުރިހަމަ އެއްބާރުލުން ޗައިނާއިން ދޭނެ ކަމުގެ ޔަގީންކަން އެ ގައުމުގެ ރައީސް ދެއްވާފައިވާ ކަމަށް ރައީސް އޮފީހުން ވަނީ ބުނެފައެވެ.

އެކްސްގައި ކުރެއްވި ޕޯސްޓެއްގައި ރައީސް ވިދާޅުވީ ޗައިނާގެ ރައީސްއާ ބައްދަލުކުރައްވައި، މިހާރު ދެ ގައުމުގެ ދެމެދުގައި ކުރިއަށްދާ މަޝްރޫއުތައް އަވަސްކުރުމާގުޅޭ ގޮތުން މަޝްވަރާކުރައްވާފައިވާ ކަމަށެވެ. އަދި މިހާރު އޮތް އެއްބާރުލުން އިތުރަށް ފުޅާކުރެވިދާނެ ދާއިރާތަކާ ބެހޭގޮތުން ވެސް މަޝްވަރާކުރައްވާފައިވާ ކަމަށް ވެސް ރައީސް ވިދާޅުވިއެވެ.

ރާއްޖެއާއި ޗައިނާގެ ގުޅުން ބިނާވެފައިވަނީ އެތައް ދުވަހެއްގެ ގާތް ރަހުމަތްތެރިކަމާއި ހެޔޮ އެދުމުގެ މައްޗަށްކަން ރައީސް ފާހަގަކުރެއްވިއެވެ. ރައީސް ވިދާޅުވީ ރާއްޖެ-ޗައިނާ ކޮމްރެހެންސިވް ސްޓްރެޓެޖިކް ކޯޕަރޭޝަން ޕާޓްނާޝިޕްގެ ދަށުން ދެ ގައުމުގެ ގުޅުން އިތުރަށް ބަދަހިވެ، ވަރުގަދަވެގެންދާނެ ކަމަށެވެ.