ރާއްޖޭގެ ހާއްސަ އިގްތިސާދީ ސަރަހައްދުގައި ގާނޫނާއި ހިލާފަށް ހަރަކާތްތެރިވި ކަމަށް ބެލެވޭ ބޭރުގެ 2 މަސްބޯޓެއް އަތުލައިގެންފިއެވެ.
އެއީ ސްރީލަންކާއަށް ނިސްބަތްވާ 2 ބޯޓް ކަމަށް އެމްއެންޑީއެފްއިން މައުލޫމާތު ދެއެވެ.
އެމްއެންޑީއެފްއިން ބުނީ އެ 2 ބޯޓު ކޯސްޓްގާޑް ހުރަވީގެ ބެލުމުގެ ދަށަށް ގެނެސްފައިވަނީ ރާއްޖޭގެ ހާއްސަ އިގްތިސޯދީ ސަރަހައްދު ބެލެހެއްޓުމަށް އެމްއެންޑީއެފް ކޯސްޓްގާޑުން ހިންގި އޮޕަރޭޝަނެއްގައި މިމަހުގެ ރޭގެ ވަގުތެއްގައި ކަމަށެވެ.
އެ 2 މަސްބޯޓާމެދު ގާނޫނުގައިވާ ގޮތުގެ މަތިން އަމަލުކުރުމަށްޓަކައި، ދިވެހި ފުލުހުންގެ ހިދުމަތާ ހަވާލުކުރުމަށް އެ 2 ބޯޓު މާލެ ގެނައުމުގެ މަސައްކަތް ކުރަމުންދާ ކަމަށް އެމްއެންޑީއެފްއިން ބުނެއެވެ.
ދިވެހިރާއްޖޭގެ މަސްވެރިކަމުގެ ގާނޫނާ ހިލާފަށް ރާއްޖޭގެ ކަނޑުގެ ސަރަހައްދުގައި ހަރަކާތްތެރިވަމުންދިޔަ ސްރީލަންކާއަށް ނިސްބަތްވާ މަސްބޯޓެއް މިދިޔަ ޖެނުއަރީ މަހުގެ ތެރޭގައި ވެސް އެމްއެންޑީއެފްއިން ވަނީ އަތުލައިގެންފައެވެ.
