އދ. ގެ ކޮމިޝަން އޮން ދަ ސްޓޭޓަސް އޮފް ވިމެން ނުވަތަ އަންހެނުންގެ ކޮމިޝަންގެ މެމްބަރަކަށް ދިވެހި ރާއްޖެ ވުމަކީ ލިބުނު ބޮޑު ފަހުރެއް ކަމުގައި ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.

މިކަމާ ގުޅިގެން އެކްސްގައި ކުރެއްވި ޕޯސްޓެއްގައި ރައީސް ވިދާޅުވީ އަންހެނުންގެ ހައްގުގައި ކުރަން ޖެހޭ ހުރިހާ މަސައްކަތެެއް ކުރުމަށް ރާއްޖެއިން ތައްޔާރަށް ތިބި ކަމަށެވެ.

އދ ގެ އަންހެނުންގެ ކޮމިޝަނަށް ރާއްޖެ އިންތިހާބުވެފައިވަނީ 2026 އިން 2030 އަށް ކަމަށާއި، މި ކޮމިޝަނަށް އިންތިހާބުވި އެހެން ހުރިހާ ގައުމުތަކަށްވެސް ތަހުނިޔާ ވިދާޅުވާކަމަށް ރައީސް ވަނީ ވިދާޅުވެފައެވެ. މިއާއެކު ރައީސް ވިދާޅުވީ ވޭތުވެދިޔަ އަހަރުތަކުގައި އަންހެނުންގެ ހައްގުތަކަށާއި، އަންހެނުން ބާރުވެރި ކުރުމުގެ ގޮތުން ރާއްޖެއިން ގިނަ މަސައްކަތްތަކެއް ކޮށްފައިވާ ކަމަށެވެ.

ރައީސް އިތުރަށް ވިދާޅުވީ ކޮމިޝަންގެ މަސައްކަތްތަކުގައި ހުރިހާ ގައުމުތަކުން އެކީގައި މަސައްކަތް ކުރައްވާނެ ކަމަށް އުންމީދު ކުރައްވާ ކަމަށެވެ.

ފާހަގަކޮށްލެވޭ ގޮތުގައި މިއީ ރާއްޖެ މި ކޮމިޝަންގެ މެމްބަރަކަށް ވި ފުރަތަމަ ފަހަރެވެ. މިކަމާ ގުޅިގެން ފޮރިން މިނިސްޓްރީ އިން ބުނީ މި ކޮމިޝަންގެ މެމްބަރަކަށް ރާއްޖެ ވުމުން ސަރުކާރުން އަންހެނުންގެ ހައްގުތަކަށާއި އަންހެނުން ބާރުވެރި ކުރުމަށް ދޭ އަހައްމިއްޔަތު ހާމަވެގެން ދާ ކަމަށެވެ.