މޯލްޑިވްސް މާކެޓިން އެންޑް ޕަބްލިކް ރިލޭޝަނަސް ކޯޕަރޭޝަން (އެމްއެމްޕީއާރްސީ) އިން ދުބާއީގައި އޮންނަ އަރަބިއަން ޓްރެވެލް މާކެޓުގައި ހުނަރު ދައްކާލުމުގެ ފުރުސަތު ދިވެހި އާޓިސްޓުންނަށް ހުޅުވާލައިފިއެވެ.
އެކްސްގައި ކުރި ޕޯސްޓެއްގައި އެމްއެމްޕީއާރްސީ އިން ބުނީ މި ފުރުސަތު ހުޅުވާލާފައިވަނީ މި މަހުގެ 28 އިން އަންނަ މަހުގެ 1ގެ ނިޔަލަށް ކަމަށެވެ.
މިކަމަށް ޝައުގުވެރިވާ ދިވެހި އާޓިސްޓުން މި މަހުގެ 9 ގެ ކުރިން އީމެއިލް މެދުވެރިކޮށް ބައިވެރިވުމަށް އެދި ހުށަހެޅުމަށް އެމްއެމްޕީއާރްސީ އިން ވަނީ އެދިފައެވެ. ދުބާއީގެ ވޯލްޑް ޓްރޭޑު ސެންޓަރުގައި ބާއްވާ މި ފެއާގައި އެމްއެމްޕީއާރްސީ އިން ދަނީ ކޮންމެ އަހަރަކުވެސް ބައިވެރިވަމުންނެވެ.
މި އިވެންޓުގެ ބޭނުމަކީ ދުނިޔޭގެ އެކި ކަންކޮޅުތަކުގައި ތިބި ފަންނުވެރިން އެއްތާކުން ބައްދަލުވުން ކަމަށާއި، ފަތުރުވެރިކަން ޕްރޮމޯޓު ކުރުންކަމަށްވެސް އެމްއެމްޕީއާރްސީ އިން ވަނީ ބުނެފައެވެ.
ފާހަގަކޮށްލެވޭ ގޮތުގައި އެމްއެމްޕީއާރްސީ އިން ގެންދަނީ ފަތުރުވެރިކަން ޕްރޮމޯޓުކުރުމަށްޓަަކައި ގިނަ މަސައްކަތްތަކެއް ކުރަމުންނެވެ. އެގޮތުން 3 އަހަރު ދުވަހުގެ މުއްދަތަކަށް ދުނިޔޭގެ މަޝްހޫރު ފުޓްބޯޅަ ކްލަބް ލިވަޕޫލް އެފްސީ އާއެކު ވަނީ ރާއްޖޭގެ ފަތުރުވެރިކަން ޕްރޮމޯޓުކުރުމަށް އެއްބަސްވުމެއްގައި ސޮއި ކޮށްފައެވެ.
އެމްއެމްޕީއާރްސީ އިން ވަނީ މި އެއްބަސްވުމާއެކު މި އަހަރު ރާއްޖެއަށް އިތުރު 1 ލައްކަ އަށް ވުރެ ގިނަ ފަތުރުވެރިން އަންނާނެ ކަމަށް ލަފާކޮށްފައެވެ.
