އިނގިރޭސިވިލާތުގެ ލިވަޕޫލް ފުޓްބޯލް ކްލަބް (އެލްއެފްސީ) އާއި މޯލްޑިވްސް މާކެޓިންގް އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) ވިޒިޓް މޯލްޑިވްސްއާ ގުޅިގެން ބައިނަލްއަގުވާމީ ޕާޓްނާޝިޕެއް ގާއިމު ކުރުމަކީ ލިބުނު ވަރަށް ބޮޑު އުފަލެއް ކަމަށް ލިވަޕޫލް އެފްސީގެ އެމްބެސަޑާ އިއަން ޖޭމްސް ރަޝް ވިދާޅުވެއްޖެއެވެ.
އިއަން ރަޝް ވަނީ ލިވަޕޫލްގެ އަކްސާ ޓްރެއިނިން ސެންޓަރަށް ރައީސް ޑރ. މުހައްމަދު މުއިއްޒު ޒިޔާރަތްކުރެއްވުމުން އެމަނިކުފާނަށް ހޫނު މަރުހަބާއެއް ވިދާޅުވެފައެވެ.
އިއަން ރަޝް ވިދާޅުވީ، މިދިޔަ ސީޒަންގައި 200 މިލިއަނަށް ވުރެ ގިނަ ފޮލޯވަރުންނާ އެކު ގާތްގަނޑަކަށް 12 ބިލިއަން ވިއުސް ލިބިފައިވާ ލިވާޕޫލް އެފްސީ އަންނަނީ ދުނިޔޭގެ އެކި ކަންކޮޅުތަކުގައި ތިބި ސަޕޯޓަރުންނާ ގުޅުމުގައި ހަރަކާތްތެރިވަމުންނެވެ. އެ ގޮތުން ވިޒިޓް މޯލްޑިވްސްއާ އެކު ވެވުނު އެއްބަސްވުމަކީ ހަމައެކަނި ޓޫރިޒަމާ ގުޅޭ ޕާޓްނާޝިޕެއް ނޫން ކަމަށް އިއަން ފާހަގަ ކުރެއްވިއެވެ.
މިއީ ޝެއާޑް ވެލިއުސްގެ އިތުރުން ދެމެހެއްޓެނިވި ގޮތެއްގައި ދުނިޔެ ހިމާޔަތް ކުރުމަށް ކުރެވޭ މަސައްކަތެއް ގޮތުގައި ވެވުނު އެއްބަސްވުމެއް ގޮތުގައި އިއަން ފާހަގަކުރެއްވިއެވެ. ވިޒިޓް މޯލްޑިވްސް އިން އަންނަނީ ކަނޑުގެ ލޮނުގަނޑު އުފުލުމާއި މޫސުމަށް އަންނަ ބަދަލުތަކުގެ ނުރައްކާ ބޮޑު ޖަޒީރާ ގައުމަކަށް ދިމާވެފައިވާ މުހިންމު މައްސަލަތައް ހައްލު ކުރުމަށް މަސައްކަތް ކުރަމުން ކަމަށް އިއަން ވިދާޅުވިއެވެ.
މި ޕާޓްނަރޝިޕް މެދުވެރިކޮށް ލިވާޕޫލް އެފްސީން ވިޒިޓް މޯލްޑިވްސްއާ ގުޅިގެން މި މަސައްކަތްތަކަށް އެހީތެރިކަން ފޯރުކޮށްދީ، ކްލަބުގެ އެވޯޑް ހާސިލްކޮށްފައިވާ ސަސްޓެއިނަބިލިޓީ ޕްރޮގްރާމް، ދަ ރެޑްވޭގެ ބޭނުން ހިފައި ހޭލުންތެރިކަން އިތުރު ކުރުމަށާއި، ރަނގަޅު ފިޔަވަޅުތަކެއް އެޅުމަށް ވަނީ ހަމަޖެހިފައި ކަމަށް އިއަން ވިދާޅުވިއެވެ
ލިވަޕޫލް އެފްސީގެ "އޮފިޝަލް ޓޫރިސްޓް ޑެސްޓިނޭޝަން ޕާޓްނަރު"ގެ ގޮތުގައި ދިވެހިރާއްޖެ ހަމަޖައްސައި އެމްއެމްޕީއާރުސީ/ވިޒިޓް މޯލްޑިވްސް އިން އެކަން ހާމަ ކުރީ މިދިޔަ މާޗް މަހުގެ 13 ވަނަ ދުވަހުއެވެ.
މި މަސައްކަތް އިތުރަށް ހަރުދަނާ ކުރުމަށް، އެލްއެފްސީ ޕާޓްނާޝިޕްގެ ދަށުން، ވިޒިޓް މޯލްޑިވްސް އިން ވަނީ، މާޗު 27 ވަނަ ދުވަހު، އިނގިރޭސިވިލާތުގައި އައުޓްޑޯ ކެމްޕެއިނެއް ފަށާފައެވެ. ތިން މަސް ދުވަހުގެ މުއްދަތަށް މި ހަރަކާތް ކުރިއަށްދާއިރު، އިނގިރޭސިވިލާތުގެ މުހިންމު ތަންތަނުގައި ހައި އިމްޕެކްޓް އައުޓްޑޯ އަދި ޑިޖިޓަލް އިޝްތިހާރުތައް ބޭނުން ކުރާނެއެވެ.
