އަލިފާން ރޯވެ، އެނދި 'ހޮޅުދޫ ބޯޓު' ކިޔާ މުދާ އުފުލާ ބޯޓު ރޭ ދަންވަރު އަޑިއަށް ގޮސްފައިވާ ކަމަށް އެމްއެންޑީއެފް އިން ބުނެފިއެވެ.
“ހޮޅުދޫ ބޯޓު”ގައި ރޯވީ ހިރިލަންދޫ އިން ފުރައިގެން މާލެ ދަނިކޮށް ތ. ކަނޑޫދޫ ކައިރިންނެވެ. 11 ދިވެހިން އަދި 7 ބިދޭސީންނާއެކު ޖުމްލަ 18 މީހުން އެ ބޯޓުން ދަތުރު ކުރި އިރު ސަލާމަތްވެފައި ވަނީ 17 މީހުންނެވެ.
އެ ހާދިސާގައި ގެއްލުނީ ލ. މާވަށަށް ނިސްބަތްވާ އަލީ މުޝްފިގް މުހައްމަދު ޝަރީފް، 25، އެވެ. އޭނާ ހޯދުމުގެ މަސައްކަތް އެމްއެންޑީއެފް އިން އަދިވެސް ކުރަމުން އެބަދެއެވެ.
އެ ހާދިސާ އާއި ގުޅޭ އެންމެ ފަހުގެ މައުލޫމާތު ހިއްސާ ކުރަމުން އެމްއެންޑީއެފް އިން ބުނީ، 'ހޮޅުދޫ ބޯޓު' ދަންވަރު 2:07 ހާއިރު އެ ސަރަހައްދަށް އަޑިއަށް ގޮސްފައިވާ ކަމަށެވެ. އަދި ހަމަ އެހެންމެ ބޯޓުގެ ބައިތައް އޮޔާދާތީ، އެ ސަރަހައްދުން ދަތުރުކުރާ ފާރާތްތަކުން ހާއްސަ ސަމާލުކަމެއް ދިނުމަށް އެމްއެންޑީއެފް އިން ވަނީ އިލްތިމާސްކޮށްފައެވެ.
މުޝްފިގް ހޯދުމުގެ މަސައްކަތް އެމްއެންޑީއެފް ސެންޓްރަލް އޭރިއާ ކޮމާންޑް ކޯސްްޓްގާޑުން ކުރަމުން އަންނައިރު އެ މަސައްކަތުގައި ޑްރޯން ވެސް ބޭނުން ކުރަމުންދާ ކަމަށް އެމްއެންޑީއެފް އިން ބުނެއެވެ. މީގެ އިތުރުން ވެސް އެމްއެންޑީއެފް ސެންޓްރަލް އޭރިއާ ކޮމާންޑްގެ ސިފައިން ގުޅިގެން ކަނޑުމަތިންނާއި ޑައިވްކޮށްގެން އަދި ވައިގެ މަގުންވެސް އޭނާ ހޯދުމުގެ މަސައްކަތް ކުރަމުން ދެއެވެ.
މިހާދިސާގައި ބައެއް މީހުންނަށް ޒަހަމްވެފައިވާ އިރު، ދެ މީހަކަށް ތ.ކަނޑޫދޫ މަރުކަޒުގައި ފަރުވާވެސް ދީފައި ވެއެވެ.
އެ ބޯޯޓުގައި އަލިފާން ރޯވީ ކަނޑޫދުއަށް ވަދެ މުދާ އަރުވައިގެން ހިރިލަންދުއަށް ގޮސް، އެ ރަށުން ފުރި ފަހުންނެވެ. ނަމަވެސް ބޯޓުގައި ރޯވާން ދިމާވި ސަބަބެއް މިހާތަނަށް އެއްވެސް އިދާރާއަކުން ހާމަކޮށްފައި ނުވާއިރު ބޯޓުގައި ހުރި މުދަލާ ގުޅޭ ތަފްސީލެއް ވެސް ލިބިފައި ނުވެއެވެ.
